Marushumo ghaAsfi. ¹ Hompa, nkevyo watushwenena twe nanaruntje? Nke walye ghugara ghoye washorera ghunkore malyero ghavindjwi? ² Vavhurukite vantu voye, ovo waghulire mumwaka pita, lira lyowamangurura likare ghupingwa ghoye, ntani ndundu yaSiyoni, oko watunga. ³ Shenya ghukenge kulidjonaghuko nalintjeya, lidjonaghuko olyo vanankore vanarughana mulivango lyoye lyakupongoka. ⁴ Liyiyiro lyoye lyakankire mukatji ruvede rwa livango washororora; vavo ngavaturatura marembe ghavita. ⁵ Vavo kwagandire-gandiremo vitondo vyavinene mumutitu namakuvha. ⁶ Vavo ghavamyono nakuganda-ganda vikwavishongaghura navintje; ghavavitjoraghuramo namakuva nahamara. ⁷ Vavo kwatulireko mundiro kundjugho pongero; vavo kwakundurukidireko nkoko wakarera, kushingandera palivhu. ⁸ Vavo ghavaghamba kudimutjima davo, ''Atwe ngatuva djonaghurapo navantje.'' Vavo kwasholirepo mavango naghantjeya ghogho vatulitanga shigongi. ⁹ Atwe kapinka tuna kukenganka vineghedito; kwatonka mupumbi, waronka kwato mukatji ketu ghanayivo ashi mayuva ghakuhura pani ngavishaya. ¹⁰ Shirugho shukuhura pani, Hompa, ngava ntukaghurame vanankore vande? Ndi ngoli vanankore ngavarughanita lidina lyoye maghoko-ghoko mwaka nadintje ndi? ¹¹ Nke vyo ghunakuhonyene lighoko lyoye, lighoko lyoye lyarulyo? Ghupa lighoko lyoye lyarulyo mulirwakani lyoye kumwe nakuvadjonaghurapo. ¹² Ano ngoli Hompa ghakara kare hompa wande kutundilira mumwaka dakare, ogho ghayito liyoghoko pantunda yalivhu. ¹³ Ove wahangwire lifuta naghunankondo ghoye; ove wamyonine mutwe wamangwandja ghamumema yalifuta. ¹⁴ Ove wadjamine dimutwe davaLeviyathani; ghove wavarelire ovo kavakarango mundurundu. ¹⁵ Ove wapanunine vidiva nadimukuro; wapwililitire dimukuro dakupupa. ¹⁶ Liyuva lyoye, namatikunka ghoye waro; ove waturo liyuva nakakwedi pamwe tupu. ¹⁷ Ove waturo dimurudi nadintje pantunda yalivhu; ove waturopo kurombo nakufu. ¹⁸ Vavhurukite vanankore ovyo vakutukaghuranga koye, Hompa, ntani vantu vavavaya varughanitanga lidina lyoye maghoko ghoko. ¹⁹ Washa tapa liparu lyavankuti voye kuvikashama vyamiwiya. washa vhurama liparu lyakukarerera lyavantu voye. ²⁰ Vhuruka likukwatakano lyoye, lyamuhoko voye wamumundema mushirongo shayuro nyanya. ²¹ Washa kengerera vahepeki livawane lishwaghu; renka vahutu navanyandi vatangange lidina lyoye. ²² Shapuka, Hompa; kukandure mumfumwa yoye; vhurukashi weni vavaya vashwaghuranga nkehe liyuva. ²³ Washa vhurama liywi lyavo vakukushepa ndipo ovo vakufito matwi koye.