Lipisaromu lyaAsafi. ¹ Vyashiri Karunga muwa kuvaIsraeli, kwavo vakaro namutji wakukena. ² Ano ngoli kwandeko, maghuru ghande kaghasherumuta; mpadi dande hambara disheremete munda ³ mukonda ame nyengo nayuvhire yaghugara opo nakengire liweko lyavavantudona. ⁴ Ngoli vavo kwato kuyuva tjutju dogoro mumfa davo, ano ngoli vavo nkondo nka vavarera nawa. ⁵ Vavo vamanguruka kughudito wavawanango vakafumu vamweya; vavo kapi vavahepekanga yira vakafumu vamweya. ⁶ Maghunene kuvatina yira ghundjengedjwe ghunakaro muntingo davo; nyanya kuvafukilira yira rughodi. ⁷ Ovyo vyatundangomone ghutwiku wakuyita ndjo; vighayara vyavidona kupitira mudimutjima davo. ⁸ Vavo kuntemaghura nakughamba ghudona; mughugara vavo kuntjilita lihepeko. ⁹ Vavo vighamba vyavo vyamutunwa vyaghunkore namawiru, ntani maruraka ghavo kuhomokera pantunda yalivhu. ¹⁰ Ano ngoli vantu vendi ghavamupiruka ntani mema ghaghapwiliremo naghantjeya. ¹¹ Vavo kughamba, ''Weni omo ghaviyivanga Karunga? Ndi walye mpoghuliko ghuyivi wakwaKarunga wakundagha-ndagha? ¹² Vikwate lighano: ashi vano vantu vadona; vavo nkehepano kwato shinka, vavo kungaghopara nakungaghopara. ¹³ Vyaghushiri vyamaghoko ghoko tupu nakungira mutjima wande ntani nakukushire maghoko ghande mughunongo. ¹⁴ Ngoli liyuva lyande nalintje ame kwahepekeramo nakuntengeka nkehe ngurangura. ¹⁵ Ndi naghambire, '' Ame ngani ghamba vino vininke,'' makura ame ndi nganikara vanandjendi kuntji runo ruvharo rwavana voye. ¹⁶ Nampiri ngoli nashetekelireko kukwata lighano vino vininke, vyakalire ghudito ghunene kwande. ¹⁷ Ngoli ame mponayendire mundjugho yaKarunga mpongoli nayakwatire lighano mapuliro ghavo. ¹⁸ Vyaghushiri vature mulivango lyaghusheneta; ndi ghuvaghurumwite kulidjonaghuko. ¹⁹ Vavo weni weni vakara mburundu pakarughoghona! Vavo vaye kughushayero nakuyamanitira kulihudi lyalinene. ²⁰ Vavo yira muntu wakurota ghogho anakurambuko ntantani; Hompa, opo ngaghurambuka, kapinka ngaghu ghayara kwado ndjodi. ²¹ Ngoli mutjima wande kwaguvire, morwa ame naremanine ghunene. ²² Ame navincenunine nka kapi nakengire nawa; ame nakalire yira shikorama shakudira kughayara wana kumeho yoye. ^{23 24} Ngoli ame nkehepano nove nakara; ove wakwaterera lighoko lyande lyarulyo. Ove ngaghu mpitititirame namaghano ghoye kumwe nakuntamburame mughuntungi ghoye. ²⁵ Ghare ghankareropo muliwiru nkwandive ? Kwato pano pantunda yalivhu wakuvhura kuhafera nkwandi ve tupu. ²⁶ Rutu rwande namutjima wande munadiri nkondo, ano ngoli Karunga ndje nkondo dande damutjima wande naruha nanaruntje. ²⁷ Ovo vakarero ghure nove ngava myokerera; ove ngaghu djonaghura navantje ovo vadiro kukukarera mughushiri koye. ²⁸ Ano ngoli kwandekome, vyakurughanako nkwandi kugwanekera kwaKarunga. Ame namutura Hompa Karunga ghuvando wande. Ame ngani ngambipara virughana vyoye navintje.