Lipisaromu lyaSolomoni. ¹ Tapa kwahompa lipongoko lyoye muvighamba, Karunga, ghupongoki ghoye kwa hompa wamukafumu. ² Mposhi ghuye ghapangure vantu voye naghupongoki navovaruhepo mulimanguruko. ³ Ndi ndundu dirupwite mpora kuvantu; renka vindundughona vitape ghupongoki. ⁴ Ngoli ghuye ghapangure varuhepo vantu; ano ngoli ghuye ghapopere vanuke vavahepwe nakumyona ghugceneghugcene vahepeki. ⁵ Ngoli ndi vakufumadeke ve mpopo linakara liyuva-yuva, ntani nangeshi shimpe kakwedi ndakakarera mwayendo ruvharo naruntje. ⁶ Ngoli ghuye kuwa kuwiru yira mushoni wakuteta, yira mata ghamema tekerango palivhu. ⁷ Ngoli vapongoki ndi ngavaviyare mumayuva ghendi, nka ngapa kare wanavyavingi vyampora dogoro mutwe katji ngaghutundepo. ⁸ Ngoli ghuye ghakare naghunankondo kutunda lifuta yenda lifuta, ntani kutundilira kumukuro dogoro ghushayero waghudjuni. ⁹ Ngoli ovo vatungo mumburundu vakunyongame kumeho yendi; ano ngoli vankore vendi ngava lye mbundu. ¹⁰ Ngoli hompa wavaTarishashi naliyana litape mfumwa; waronka ndi hompa wavaSheba navaSeba ngavatape ndjapo. ¹¹ Vyaghushiri, vahompa navantje ngavakugande kumeho yendi; ngoli muhoko nadintje ngadi mukarere. ¹² Ghuye kuvatera vantu vavahepwe ovo valirango navantu vavahutu ovo vakaro kwato wakuvatera. ¹³ Ghuye ghakara nankenda kuvahutu navahepwe, ano ngoli ghuye kukunga maparu ghavantu vavahepwe. ¹⁴ Gheye kumangurura maparu ghove kurunyando nanyanya, ngoli honde yavo yawapera mumantjo ghendi. ¹⁵ Ngoli ghuye ngaparuke! mposhi ngorodo davaSheba ngavaditape kwendi. Mposhi vantu nkehepano vamuraperereko; ngoli Karunga ngamutungiki kumayuva ghendinaghantje. ¹⁶ Ngoli viwana vyambuto ndi ngavimuvhukire mulivango ghatunga; pawiru yandundu ndi mbuto yavo pekaghuke. Mposhi nyango ngadikare yira Lebanoni; ngoli vantu ngavaviyare munkurumbara yira mushoni mulifuva. ¹⁷ Mposhi lidina lyendi ngaliyimane nanaruntje; waronka lidina lyendi ngali twikire mwayendo liyuva; vantu ngavavatungike mumwendi; mposhi dimuhoko nadintje ngadimuyite mutungi. ¹⁸ Ano ngoli Hompa Karunga, Karunga wavaIsraeli, karamutungi, ghare nka ghmwe wakurughana vininke vyaviwa. ¹⁹ Ngoli ghuntungi walidina lyendi ngalikare matungiko nanaruntje, ano ngoli ntundayalivhu ngayiyure ghuntungi wendi. Ameni naAmeni. ²⁰ Ndapero daDaviti mona wamukafumu waYesse mpodinapwere.