¹ Moye, Hompa, wakara ghuvando; narumweshi ngaghuntura mulishwaghu. ² Mpopereme ndenke vikare mulikungo lyaye lyaghupongoki; pirura matwi ghoye kwande nka ghumpopereme. ³ Kara kwande liwe lyaghuvando nkehe kuno ngani pirukira; ove watapa lirawiro lyakumpoperame, ove liwelyande nakuyeyameno. ⁴ Mpopereme, Karunga wande, ngupemo mulighoko lyavarughanidona, ngupemo mulighoko lyahedana nakanyanya. ⁵ Ghove lihuguvaro lyande, Hompa Karunga. Ame nahuguvalire moye kuvareka ame shimpe nimwanuke. ⁶ Moye ame kwankunga kutundilira mushira; ghaghuhuru ove wangupiromo nitunde mushira shavanane; litangaghuko lyande nkehepa ngalikaranga lyakoye. ⁷ Ame shihonenita kuvantu vavayingi; ove ghuturo wande waghunene. ⁸ Kanwa kande ngaka yura mukukutangaghuka, liyuva lyande nalintje ngani kufumadeka. ⁹ Washa nkomberera paruvede rwaghukurupe wande; ngashaghu nkombererame opo ngadipwa nkondo dande. ¹⁰ Ano ngoli vanankore vande ame tupu vatwenyaghuranga; ovo vakengerango liparu lyande kunteghe. ¹¹ Vavo kughamba, ''Karunga ghamushuvilira; mukwamenu mumughupepo; ano ghuye kwato wakumupopera.'' ¹² Karunga, washa karera ghure name; Hompa wande, kwangurako kumpoperame. ¹³ Varenke vafe ntjoni nakuvadjoghura, ovo vakarerango liparu lyande; ndi vavafukilire nalishweno nalishwaghu, ovo vantjanango kudjonaghura. ¹⁴ Ano ngoli ame nkehe pano ngani huguvara moye ntani nganikutanganga mwamunene. ¹⁵ Kanwa kande ngaka tanta vyaghupongoki naliyoghoro lyoye nkeheliyuva, nampindi ngoli kapi ngani kwato lighano. ¹⁶ Ame nganiya mughunankondo wavirughana vyaHompa Karunga; ame ngani twenyaghura ghupongoki, ghoye mpantjagho. ¹⁷ Karunga, ove wantjonga kutundilira wanuke wande; nampindi paweno ame ngani ngambipara kuvirughana vyoye vyakuwapera. ¹⁸ Mughushiri, nampindi opo ngani kurupa nakara namvhi mumutwe, Karunga, washa nkengerera, morwame nangambipara nkondo doye kuruvharo rwakukwamako, nkondo doye kwankehe ghuno ngayo. ¹⁹ Ghupongoki ghoye nagho, Karunga, wayeruka ghunene; ove warughano vininke vyavinene, Karunga, are ghakaro yirave? ²⁰ Ove wampitita nikenge maghudito ghamangi ghagho ngagha rambukanka kumwe nakutuvhumburanka tutunde mulitondo lyantunda yalivhu. ²¹ Wedererako ngoli mfumwa yande; mpirukire nakuntjengawida. ²² Ame nka ngani tapa mpandu koye nashivetito mulihuguvaro lyoye lyalinene, Karunga wande; ame koye ngani yimba kukutanganga nashivetito, mupongoki wavaIsraeli. ²³ Ngegho dande ngadi yashuka muruhafo opo ngani yimba litangango koye --- nampiri monyo wande, ogho wamangurura. ²⁴ Ruraka rwande naro ngarughamba vyakuhamena kughupongoki ghoye liyuva nalintjeya; ngoli vavo vavashwaghukita nakuvapukita, ovo vashanango kundemeka.