Kwamupititili yimbiti; kutwara mwaShoshanimu. Pisaromu yaDaviti. ¹ Mparure, Karunga; Morwa mema anatura liparu lyande mughudito. ² Ame nadama mughudami walitata, kwahana livango olyo niyimana; ame kunakara mughudami wamema, oko runakara ruhandjo runakupupo papande. ³ Napiri nkondo mukulira kwande, mulighu wande ghunakukuta; mantjo ghande ghanadimi oku ame shimpe kunakutaterera Karunga wande. ⁴ Ovo vanyengo nahana kuvadjona vangi ghunene yira huki dakumutwe wande; ovo vanakushana kundipagha, vanankore yande mukukukitaghukira, vanankondo; vinke ovyo nadiri kuvaka, ovyo nganivyuta. ⁵ Karunga, wayiva ghudona wande, nandjo dande kapi dakuhorama. ⁶ Washa fitantjoni ovo vakuhuguvaro mukonda yande, Hompa Karunga munankondo; washarengwita ovo vanakukushano mukonda yande, Karunga waIsraeli. ⁷ Mukonda yoye mbyo nakarere muliyoghomokero; ntjoni kunafiki shipara shande. ⁸ Ame nakara muyeni muvakuruvande, mpentjande muvana vavanane. ⁹ Morwa ghupampi wandjugho yoye mbyo vinakuvheveko, naliyoghomokero lyavo wayoghomokera linawere kukwande. ¹⁰ Ntjene ame kunakulira nandya nakudilyashi, vavo kuntjwaghura. ¹¹ Ntjene aniruwana vyuma vyamalirankali nidwate; ame kukara shiruwanito shamutangu kokwavo. ¹² Ovo vanashungiro pamangeneno ghankurumbara ame vanakughamba; Ame ntjumo yavankorwe. ¹³ Ngoli kukwandeko, ndapero yande kukoye yinavyuka, Karunga, dogoro kuruvede oro ghukayitambwira; ndimburure mughuhungami waliparu lyoye. ¹⁴ Nkokemo mulitata, ngoli washantjuvilira nidame; ngupepo nitundepo povo vanyengo nakundjoghora mughudami wamema. ¹⁵ Washa shuvilira mema gharuhandjo ghamfike, shimpe nka washashuvilira litondo limine. Washa shuvilira kanwa kalikwina kambandere. ¹⁶ Ndimburure, Karunga, morwa likukwatakano lyoye lyaghuhunga liwa; mukonda ghufenkenda ghoye kukwande ghungi, mpirukire. ¹⁷ Washa horeka shipara shoye kwamukarelighoye, morwa ame muntjoni nakara; ndimburure wangu. ¹⁸ Yakukwande nakundjoghora. Mukonda vanankore yande, ame vanatokora. ¹⁹ Wayiva likuyaghuko lyande, ntjoni dande, nalipiro-mfumwa yande; vanyengi vande navantje kuna nkundurukida. ²⁰ Liyoghomokero linatjaraghura mutjima wande; ame vinandikopere ghunene; kuna kushana muntu amferenkenda, ngoli kwato ghumwe, kuna kushana mushengawidi, ngoli kwato ogho nakuwana. ²¹ Vavo kuna kutulira ghushungu mundya dande, mulinota lyande vavo kunakumpa vinyu yakushasha ninwe. ²² Renka shitafura shavo shinakaro kumeho yavo shikare likwe; opo vanakughayara ashi vavo mughughami, renka vakare muviraha. ²³ Renka mantjo ghavo ghakare mumundema mposhi vadire kumona; nakurenka kehepa maruvya ghavo ghashurungane. ²⁴ Vatetere ghugara ghoye nakurenka ghugara ghoye waghunene ghuvawane. ²⁵ Mavango ghavo ghakare marunda; varenke vadire kutunga mumandjugho ghavo ghantanda. ²⁶ Morwa kuhepeka ovo wafutita. Vavo kuvyukuruka mfuto yatjutju kovo waremeka. ²⁷ Vavarwire ndjo odo varuwana ndjo tunda ndjo; washavashuvilira vaye kulitomporo lyavahungami. ²⁸ Vadongononemo mumbapira yaliparu nka washavatjanga kumwe navahungami. ²⁹ Ngoli ame nimuhutu namuruguvo; renka liparu lyoye, Karunga, lindjimaneke kuwiru. ³⁰ Ame nganitangaghuke lidina lyaKarunga nantjumo makura nganivhure kumuyerura kumwe nakutapera mpandu. ³¹ Ovyo ngavihafito Karunga kupitaka hove ndi ntwedu odo dakaro nambinga namakondo. ³² Vatighona ngavavikenga kumwe nakuhafa; anwe munakushano Karunga, renke dimutjima denu diparuke. ³³ Morwa Karunga kuyuvha vanaruhepo ngoli kapi anyenga vankwati vendi. ³⁴ Liwiru nalivhu limutangaghuke, lifuta nankehe vino ovyo vyayendaghurangomo. ³⁵ Morwa Karunga ngapopera Ziyoni nakutungurura nkurumbara yaYuda; Vantu ngavatungamo nakukara yira ghupingwa. ³⁶ Ruvharo rwavakareli vendi mbo ngavashiweko; navo ovo vahoro lidina lyendi ngavatungamo