Kwamupititili yimbiti. Pisaromu. Ntjumo daDaviti. ¹ Morwa ove, Karunga wamuSiyoni, oko linakutaterera litangaghuko lyetu; matwenyidiro ghetu kughatwara kukoye. ² Ove wayuvhango ndapero, vantu navantje kukoye ngavaya. ³ Ndjo dakeheliyuva dinatuvyuka; ngoli morwa ndjo detu, ove kuvhura kuditughupirapo. ⁴ Vamutungike muntu ogho watoghorora mukumuyitapepi nove morwa ayatunge mulivha lyoye. Atwe ngatukuta kumaghuwa ghamundjugho yoye, ndjugho yoye yakungoka. ⁵ Mughuhungami ove kutulimburura mukurughana vininke vyavitetu, Karunga waliparu lyetu; Ove ve vahuguvara navantje oko wakahura ghudjuni navo ovo vakaro ghure mbindakano yalifuta. ⁶ Morwa ove warenko ndundu diyimane, ove ve wadimango nankondo. ⁷ Nka ove ve wakumwenikida linungo lyamafuta linungo lyamankumpi ghalyo, namuyoyo wambunga. ⁸ Ovo vatungo kuruha rwakuntji rwaghudjuni kuna kumenga kuvishoroka yavirughana vyoye; ove kwarenka ghupumeyuva naghutokero ghushange. ⁹ Kwaya ghuyapopere ghudjuni; ove kughuvhetawira; ove kughungaghope ghunene; dimukuro daKarunga kwayura mema; ove kutapera vantu rukokotwa ntjeneshi ghuna wapeke ghudjuni. ¹⁰ Ove kutekera virwa kehepa; kufutira nawa dimutunda davirwa; ove kutulitapo mvhura yayisheshu yakushetekera; ove kutungika vimeno mukatji kavirwa. ¹¹ Ove kuyenga mwaka namaghuwa ghoye, nandjira yoye yamurongerero kwayura navivyaviwa. ¹² Maghulitiro muwiya kuna kushonya ndaghu, nandundu vanadidwateke ruhafo. ¹³ Maghulitiro vanaghadwateke navighunda; dimuramba nka vanadifiki napantje narukokotwa; vavo kunakuyiyira morwa ruhafo, nakuyimba.