Kwamupititili yimbiti. Pisaromu lyaDaviti. ¹ Yuvha liywi lyande, Karunga, tegherera kurushivano rwande; parura monyo wande kughoma wavanankore yande. ² Mbateke kovivanakukuyuvha mukaholya-holya vadinikarunga, nakumbunga yavaruwani ghudona. ³ Vavo kurora maruraka ghavo yira marufuro; vavo kunonga ndayi davo, nkango dadidona, ⁴ Morwa vaponye kutundilira mumavango ghamukaholya-holya kuvantu vahana ndjo; kuvareka tupu vavo kuvaponya naghomashi ngoghu. ⁵ Vavo kukukorangeda naghumwavo mukughayadara vyavidona; vavo kukuyonga kumwe mukaholya-holya mukategha viraha; vavo kutanta, '' Are avhuro kutumona?'' ⁶ Vavo kutulitapo maghano ghaghundjoni; '' Tunamana, '' vavo kutanta, ''Maghano ghakutikiliramo.'' Maghayadaro ghamunda namutjima wamuntu wamuntu wakudama. ⁷ Ngoli Karunga ngavhura kuvaponya; naruvirishi vavo kuvhura varemane kundamba dendi. ⁸ Vavo ngavavhura kupunduka vawe, kutundilira kumaraka ghavavene ogho anavavyuko; navantje ovo ngavavavamono ngavapuka dimutwe davo. ⁹ Vantu navantje ngavatjira nakughamba virughana vyaKarunga. Vavo ngavateda kughayara kovyo arughana. ¹⁰ Vahungami ngavahafera mwaKarunga nakuwana ghuvando mumwendi; vahungami navantje ngavakunenipitira mumwendi.