¹ Pisaromu lyaDaviti, opo akalire mumburundu yaYuda. Karunga, ove Karunga wande! ove nakushana ghunene, rutu rwande rwapampepo runafu linota, narutu rwande rwapanyama runakuhepa, mushirongo shashikukutu nakuvhunduka osho shapiro mema. ² Mbyo nakunwika kukoye mundjugho pongoko, mukukenga ghunankondo ghoye nashikoda shoye. ³ Morwa likukwatakano lyoye lyaghuhungami lyapitakana liparu, ngegho dande ngadi kutangaghuka. ⁴ Makura ame nganikutungike shirugho osho nakuparuka; ame nganiyerure maghoko ghande morwa lidina lyoye. ⁵ Yira momo nalyanga ndya damuhokohoko nadamaghadighadi; naruhafo rwarunene rwangegho dakanwa kande mo nganikutangaghuka. ⁶ Omo naghayaranga vyakuhamena kukoye paghuro wande nakuteda nighayare kukoye muviri damatiku. ⁷ Morwa ove muvateli wande, namumundulye wamavava ghoye momulishangero lyande ⁸ Ame nakakatere kukoye; mbatere nalighoko lyoye lyarulyo. ⁹ Ngoli ovo vanakushano kudjonaghura liparu lyande ngavasheghumuka vayende kuruha rwakuntji rwaghudjuni; ¹⁰ ngavatapa mumaghoko ghavo varuwanitango marufuro, kumwe ngavakare ndya davambwawa. ¹¹ Ngoli hompa ngashangera mwaKarunga nkehe ghuno ogho ngaghaneno mumwendi ngahafa, ngoli tunwa twavaghambi vipempa ngavatushayikita.