¹ Kwamupititili yimbiti; mukutwara mumaghano gha Yedutuni. Pisaromu yaDaviti.

Ame kutaterera shiporepore kwaKarunga tee; liparu lyande kutundilira kukwendi.

² Aghuru ndje liwe lyande naliparu lyande; ghuye ndje rushungu rwande rwarure; kapi nganikunyunga nawa-nawa. ³ Dogoro ruvede munke, anwe namuvantje ngamuhomona muntu, ngamuvhure kumumborora afe yira likuma linayeyamo ndi rugumbo rwakuyeya? ⁴ Anwe kukuyuvha naye nkwandi vyakumughupa palivango lyendi lyalifumano; anwe kwahora kutanta vipempa anwe kumutungika natunwa twenu, ngoli mudimutjima denu kumufinga. S shera ⁵ Ame kutaterera shiporepore kwaKarunga tee; morwa lihuguvaro lyande kwalitura mumwendi; ⁶ Aghuru ndje liwe lyande naliparu lyande; ghuye ndje rushungu rwande rwarure; kapi nganikunyunganga. ⁷ NaKarunga ndje liparu lyande nashikoda shande; liwe lyankondo dande naghughameno wande mwaKarunga. ⁸ Huguvarenu mumwendi shirugho nashintje, anwe vantu; pimpirenu dimutjima denu mumwendi Karunga ndje ghughameno wetu ⁹ Vyaghushiri vahepwe navimweshi, ngoli vanenentu vanavipempa; Vavo kuvaviha navantje, vareru yira navimweshi. ¹⁰ Mwashahuguvara mulihepekeromo ndi muwidi wamashaka; ndi mwashahuguvara mulimona lyahana mulyo, morwa kapi ngamuyiminamo nyango; mwasha tupika dimutjima denu movyo. ¹¹ Karunga kwatantire rumwe, rwaghuviri mpo naviyuvhire vino: nkondo kwahama kwaKarunga. ¹² Shimpe kukoye, Hompa, kwahama likukwatakano lyaghuhunga, morwa ove kufuta nkehe ghuno muntu kutwara muvirughana vyendi.