¹ Vamupande Hompa, viwa mukuyimbira Karunga wetu rupandu, vyavyo vyayenderamo, nakuhungama vyakumushamberera. ² Hompa kuna kutungurura Yerusalemu, ghuye kuna kupongoyika kumwe vantu vaIsiraeli. ³ Ghukuverura vakutjoka dimushima, nakudinga vironda vyavo. ⁴ Ghuye kwapanga shivaro shantungwedi, ndje adiruko madina. ⁵ Hompa wetu munene ghuye munankondo nadintje; ghuyivi wendi nakuvhurashi kughusheteka. ⁶ Hompa kuyerura ava varenkereramo, kunyikida vaghudinikarunga. ⁷ Yimbira Karunga rushumo rwa mpandu, yimba rupandu kwaKarunga wetu nashighumba. ⁸ Ghuye kwafika liwiru namaremo, nakuwapayikira livhu mvhura, kumenita mushoni kundundu. ⁹ Ghuye kupa ndya vikorama nakumakorova ghona apagha liranga. ¹⁰ Ghuye kapi ahaferanga nkondo dankambe, kundereko ruhafo kunkondo damaghuru ghamuntu. ¹¹ Hompa kuhafera ava vamutjiro, ava vahuguvaro mushihoro shendi. ¹² Panda Hompa, Yerusalemu, panda Karunga ghoye, Siyoni. ¹³ Ghuye kupameka marungavero ghoye, ghuye kutungika vantu voye. ¹⁴ Ghuye kwayita mpora kudimurudi doye, ghuye kukutika nandya dadiwa. ¹⁵ Ghuye kutapa mpangero, makura ayi kwangura kuya. ¹⁶ Ghuye kutuma ndaghu yayo kukara yira mututwi, kumwaya lighundu, lyalyo kukara yira mbundu. ¹⁷ Ghuye kutuma kawe yira vikarawe; are wakukora kughutenda oghu ana kutuma? ¹⁸ Ghuye kutuma veta dendi nakuhemuna materengendje, ghuye kurenkita mpepo yipepe namema ghapupe. ¹⁹ Ghuye kutapa mbudi yendi kwaYakobu, nampangera naveta dendi kwaIsraeli. ²⁰ Evino kapi aviruwana kudimuhoko dimwe, vavo kapi vayiva veta dendi . Pandenu Hompa.