Pisarome yarupandu yaDaviti. ¹ Ame kuna shana nikutange, ove Karunga, Hompa wande; Ame ngani fumadeka lidina lyoye naruntje , nanaruntje. ² Ame ngani kufumadeka kehe liyuva nakutangaghuka lidina lyoye naruntje-nanaruntje. ³ Hompa munene, ghuye awapera kumufumadeka ghunene; ghunene wendi nakuvhurashi kughushetakanita. ⁴ Virughana vyoye ngava vifumadeka ava vanakaroko naruvharo oru ngaru kayoko ngava tanta virughana vyoye vyankondo. ⁵ Vantu ngava ghamba vyashikoda shoye nalifumano lyoye, ngoli ame ngani timwitira virughana vyoye vyakutetura. ⁶ Vantu ngava ghamba vyaviruwana vyoye vyankondo, ngoli ame ngani yuvhita ghunene ghoye. ⁷ Vavo ngava ghamba vyakuhamena ghuwa ghoye, ngava yimba vya kuhamena kughuna mbiri ghoye. ⁸ Hompa washihoro ghuye mukankenda kapi agarapanga wangu ghuye shihoro shendi shinene. ⁹ Karunga muwa kwanavantje; nkenda yendi yakudira kupwa kuvirughana vyendi navintje. ¹⁰ Vishitwa vyoye navintje ngavi kushamberera, Hompa; vapuli voye ngava kupandura. ¹¹ Vavo ngava ghamba vyashikoda shaghuntungi ghoye, vatante vyankondo doye. ¹² Vavo ngava yivita kuvantu virughana vyoye vyankondo naghupongoki waghuntungi ghoye. ¹³ Ghuntungi ghoye ngoghuntungi wakukarererapo, nalipangero lyoye lyamaruvharo naghantje. ¹⁴ Hompa kuyerura navantje vanakugho, nakushapwita navantje ovo vana kotomano. ¹⁵ Mantjo ghanavantje ove ana kutaterera; ove kuvapa ndya pashirugho sha ghuhunga. ¹⁶ Ove kughorora mavoko ghoye ghukutike vihoro vyavina monyo. ¹⁷ Hompa kuhungika mwa navintje evi arughananga. ¹⁸ Hompa kwakaranga pepi novo vamukughango, ava vamuyitango mulihuguvaro. ¹⁹ Ghuye kutikitamo vihoro vyavo vamufumadekango; ghuye kuyuvha mutaku wavo nakuvaparura. ²⁰ hompa kupopera navantje ava vahoro, ngoli ngadjonaghura po vadini Karunga navantje. ²¹ Ame ngani shamberera kehepano Hompa; renka navantje vana kuparuka, vafumadeke lidina lyendi lyakupongoka kunaruntje.