¹ Pisarome yaDaviti. Rupandu rukare kwaHompa, liwe lyande, ogho adewirango mavoko ghande vitana nyara dande ndwa. ² Ghuye ndje mupopeli namughameni wande, ruhunga rwarure namuparuli wande. Ghuye ndje shikukandulito eshi nahuguvara, ghuye ndje a mfundirango dimuhoko. ³ Hompa, muntu koye vinke, ghuka muyive; monamuntu ghuka mupakere mbiri? ⁴ Muntu yira munku; mayuva ghendi yira momu wayendanga mundwire. ⁵ Hompa, nyongeka liwiru ghusheghumuke; guma ndundu ditutumuke muti. ⁶ Tuma maruvadi ghahanaghure vanankore vande; Ponya mashevo ghoye ava pambanite.. ⁷ Ghonyonwena livoko lyoye kuwiru; Ngamene kulimutondo lyamema, mparure kulivoko lyavayeni. ⁸ Ava vadirango kughamba ghushiri vipempa vyavo mwato mu. ⁹ Nashana nikuyimbire rushumo rwarupe, ove Karunga; kuna shana nivete shimburumbumba shangeya murongo nikuyimbire, ¹⁰ ove watapango liketo kuvahompa, ove waparuliro mupikoye Daviti. ¹¹ Mparure nakungupamo mulivoko lyavana virongo. Tunwa twavo kughamba vipempa, vipempa vyavo mwato muno. ¹² Vana vetu vavamati ndi vakare yira shimwenwa eshi shina kukuro shasho shina pama ntani vana vetu vavakadona ndi vafane yira ngundi, daghurenga dantembeli. ¹³ Vishete vyetu ndi viyure muyangu wakehe vino, ntani ndjwi ndi divare mayovi namayovi dimurongo mumayana ghetu. ¹⁴ renka ngombe detu dikuvharatane ghunene dahana kufita-fita. Mundjira detu ndi mupire mutaku naliguvo. ¹⁵ Waragopa muhoko oghu wakaro ngoweyo; waragopa muhoko oghu wakaro Karunga ndje Hompa.