¹ Pisarome yaDaviti. Hompa, koye nakukugha; yiya wangu kukwande. Ndjuvhe nkene kuna kukukugha. ² Ndapero yande ndi yikare yira ndjambo yalidumba lyaliwa kushipara shoye. Naliyeruro mavoko ghande yira ndjambo yangurova. ³ Hompa, turako mukungi kukanwa kande; kunga muvero wangevo dande. ⁴ Washa pulitira mushima wande ghunyenene vininke vyandjo mukuruwana ghudona navanandjo. Washa mpulitira nilye ndya davo. ⁵ Renka muntu wamuwa avhure kuntoghona; ndi a nkuyilire mwamuwa, ngoli ame kapi nganikengerera muntu wamudona awaveke mutwe wande, mbyevishi ame kurwanita kehe pano viruwanadona vyendi nandapero dande. ⁶ Vampititi vavo ngava vavukumako kundagha-ndagha yamawe; vantu ntani ngavatikapo ashi nkango dande daghushiri. ⁷ Ngava ghamba ashi, ''Yira vitondo vana kutavaghura vavitetaghure navifupa vyavo movavirundayika ngoweyo pamakwina ghamayendo. ⁸ Shiri-shiri mantjo ghande kukoye, Hompa, Karunga; mumoye monivanda; Washa ntjuva nahana lipopero. ⁹ Mbatere kuviraha evi vanteyera, kuntenda davaruwani ghudona. ¹⁰ Renka varuwani ghudona vafe mumakwe ava vene ngoli ame niparuke.