¹ Kumupititiri yimbiti. Lipisarome lyaDaviti. Hompa, mparure kuvantu vavadona; ndjoro kuvarudipayi. ² Vavo kughayara vyavidona mudimushima davo; vavo kushapwita vita kehe liyuva. ³ Maraka ghavo kuremeka yira mayoka ghaghushungu wambaroka. ⁴ Mpopere kumavoko ghavadini Karunga, Hompa, ndjovore kuvarudipayi, ava vanakaro namaghano ghakungandapo. ⁵ Valinenepeki vana nteyere viraha; vana yandjumuna likwe vavo kuna nteyere shiraha kundjira. ⁶ Ame kuna kughamba kwaHompa ashi, ove Karunga wande. Teyerera kumutaku wande wankenda. ⁷ Hompa, Karunga wande, wankondo dakuvhura kumpopera; Ove kwa fukililire mutwe wande mushirugho shavita. ⁸ Hompa, washapa vanandjo evi vanashana; washa shuvilira maghano ghavo aruwane. ⁹ Kwava vanankundurukido, renka maghayarodona ghavo ava vyuke vavene. ¹⁰ Makara ghakutwera ndi avawere; Vavukumine mumundiro, mundjombo yapiro shinko, ngavadire kutundamo nka. ¹¹ Washa shuvhilira vantu vavighamba vya kutjutjupita vantu mushirongo. Maghudito ndi aye kwavo vashanango kudjonaghura vaghunyavo. ¹² Nayiva ashi Hompa ngahama kwavo vana kuhepo nakuruwana vya ghuhunga kwavo. ¹³ Ghushiri vantu vavahungami ngava tapa mpandu kulidina lyoye; Vahungami ngava paruka mulikaropo lyoye.