¹ Kapishi kukwetu, Hompa, kapishi kukwetu, ngoli kulidina lyakuyita lifumano, kulikukwatakano lyoye lyaghuhunga ntani mulihuguvaro lyoye. ² Mukonda munke ngadi tupulira dimuhoko ashi, ''kuninko Karunga wavo?'' ³ Hompa wetu ghuye wamuwiru; ghuye kurughana nkehe vino ovyo anashana. ⁴ Dimuhoko' vintjwantjwo vyavo sisiliveri nangorodo, ovyo varughana vavene namavoko. ⁵ Ovyo vintjwantjwo vyakara nakanwa, anongoli nakughambashi, vyakara namantjo, anongoli kapi vyakenganga; ⁶ Vyakara namatwi, anongoli kapi vyayuvanga; vyakara namaghuru, anongoli kapi vyafumbwiranga. ⁷ Ovyo vintjwantjwo vyakara namavoko, anongoli kapi vyakwatanga; vyakara namaghuru, kapi vyayendanga; ndi vighambe mutunwa twavyo. ⁸ Navantje ovo vatendango vafana yira mbyo; kumwe nanavantje ovo vahuguvarango mumwavyo. ⁹ Israeli, huguvara mwaHompa; ghuye ndjemupopeli ghoye naghuvando ghoye. ¹⁰ Ndjugho yaAaroni, huguvara Karunga; ghuye ndje ghupopeli ghoye nashikukandulito shoye. ¹¹ Anwe mwafumadeka Karunga, huguvarenu mwendi; Ghuye ndje mupopeli nashikukandulito. ¹² Hompa ngatu vhuruka nakututungika; ghuye ngatuvhuruka nakututungika; ghuye ngatungika muhoko waIsraeli; ghuye ngatungika muhoko waAaroni. ¹³ Ghuye ngatungika navantje vamufumadeko vikareshi vakurona ndi vanuke. ¹⁴ Ndi Hompa Karunga awederere shivaro shenu mughuyingi wenu navankwami venu. ¹⁵ Ndi Hompa Karunga amutungike, ogho ashito liwiru nalivhu. ¹⁶ Liwiru lyahamena kwaKarunga; ano ngoli livhu alitapa kuvantu. ¹⁷ Vafe nakupandashi Hompa, nanavantje ovo vayendango mushirongo shavafe. ¹⁸ Ano ngoli atwe tuna kuparuko kutupanda Karunga naruntje nanaruntje. Tupandenu Karunga.