1 Tangenu Hompa. Ame ngani tapa mpandu kwaHompa namutji wande naghuntje mulipongero lyavahungami, mulipongo lyavo. 2 Virughana vyaHompa vinene, vyavyo kwataterera kwanavantje vavishanango. 3 Virughana vyendi vinene nkavyatungika, ntani lipongoko lyendi lyakolita nanaruntje. 4 Ghuye kwarughananga vininke vyaviwa ovyo ngatumu vhurukirapo; Hompa Karunga ghakara nankenda naghufenkenda. 5 Ghuye kutapa ndya kwavo vamukwamango mughushiri. Ghuye ngavhurukita likukwatakano lyendi. 6 Ghuye kwaneghedire virughana vyendi vyankondo kuvantu vendi mukuvapa ghupingwa wadimuhoko. 7 Virughana vyalighoko lyendi lihuguvaropo lyalinene nalimanguruko; marawireghendi naghantje kughamuhuguvarera. 8 Ghagho kwaghatulipo nanaruntje, nakughakengurura nawa-nawa namughushiri-shiri. 9 Ghuye kwatapa ghufundo kuvandu vendi; ghuye kwatulitapo likukwatakano lyendi nanaruntje; ghupongoki naghuwa mulidina lyendi. 10 Kumufumadeka Hompa ndjo mbarekero yaghunongo; ovo vakwamango marondoro ghendi mbo vakwatango lighano lyaliwa. Litangango lyakarererapo nanaruntje.