¹ Tapenu mpandu kwaKarunga, mbyovishi ghuye muwa, nankenda yendi yanaruntje. ² Navantje ovo aparura Karunga tokwenu tumupande, ovo apopera mumavoko ghavanankore. ³ Ghuye kwamughupamo muvirongo vyapeke, kutundilira kughupumeyuvha nange kughutokero, kutunda kumboyera nange kughutcuma. ⁴ Vateranganine mumburundu mundjiradamo nka kapi vawanine mbara mwakuvhura kutunga. ⁵ Mbyovyoshi vavo vafire ndjara nalinota, makura ava kuhupwiri. ⁶ Mpo vakuyire Karunga mumaghudito ghavo, makura avapopelire momwavyo vyavatukukitiro. ⁷ Ghuye ava pititiri mundjira yakuvyukilira wangu vavhure kuyenda mumbara vakatungemo. ⁸ Ehe vantu vapovo vavhure kupanda Karunga mbyovi shihoro, shendi shinene navininke tetukita ovyo arughana kumuntu! ⁹ Akumwitire ovo vakaliro nalinota, nakukutita ovo vakaliro nandjara avayudire navininke vyaviwa. ¹⁰ Vamwe vakalire mumundema namumundulye wamfa, mudorongo vaheperomo namumaghuketanga. ¹¹ Ovi nekonda yakukananita nakushapukira nkango yaKarunga nakushwena mapukururo ghagho wamunene ngudu. ¹² Ghuye kwadidipikire dimutjima davo odo dakukutiro; vavo vatenyangelire nka kwato ghumwe wakuvavhatera. ¹³ Ntani vana kukugha kwaKarunga mumaghudito ghavo, makura ghuye kuvatunditamo mumaghudito ghavo. ¹⁴ Ghuye avaghupumo mumundema namumundulye wamfa nakundembura maghuketanga ghamango yavo. ¹⁵ Vawapera vantu ovo kupanda Karunga shihoro shendi shanaruntje navitetu vyaviyingi ovyo arughanena vantu! ¹⁶ Konda ghuye atjoraghura mavero ghavikuvo nakuhanaghura vighalito vyavikuvo. ¹⁷ Vavo kwagovapire mundjira davo damakantji nakuhepera mukonda yandjo davo. ¹⁸ Vakombanitire shihoro shakulya ndya, nakushuwene pepi-pepi nalivero lyamfa. ¹⁹ Ntani ngoli vana kukugha Karunga mughudito wavo, mpo avaghupiremo muvinka vyavo. ²⁰ Ghuye atumine nkango yendi yiyavaverure, nakuvayovora mulidjonaghuko lyavo. ²¹ Vawapera vantu ovo kupanda Karunga shihoro shendi shanaruntje navininke tetukita navintje ovyo arughanena vantu. ²² Vawapera kutapa muyambo wampandu nakuyuvhita virughana vyendi nantjumo. ²³ Vamwe kuyendera mulifuta muviniva nakurughana ndando navirongo vyapandje. ²⁴ Vamonine virughana vyaKarunga navitetu vyendi mulifuta. ²⁵ Mbyovishi avaghulire nakurambwita mpepo yalikundungu olyo lyayeraghuliro mankumpi mulifuta. ²⁶ navikepa vya yerukire ghunene muwiru; nakuvyuka palitondo. vatukukire nakukuhupwira. ²⁷ Vavo pakuvataghuka nakupundaghuka yira vankorwi kwato ovyo vanakuvhura. ²⁸ Ntani vana kukugha Karunga mughudito wavo ogho, ghuye avaghupumo mughudito wavonka. ²⁹ Amwenikida likundungu, namankumpi agha mwena. ³⁰ Ntani vanakuhafa konda yakukutura lifuta, nakuvayita kuliyenga olyo vapangire. ³¹ Vantu ovo ndi vawapera kupanda Karunga shihoro shendi shanaruntje navirughana tetukita ovyo arughanena vantu! ³² Nka vawapera kumuyuvhita mumbunga yavantu nakumupandura mundango yamatimbi. ³³ Ghuye kupaka dimukuro mburundu, vidiva vyamema livhu lyalikukutu. ³⁴ nalivhu lyandombe likare lyakutcopoka mukonda yaghudona vantu vapo. ³⁵ Ghuye kupaka mburundu shidiva shamema nalivhu lyalikukutu rudjadja rwamema. ³⁶ Ghuye kwatuliremo vakandjara vatungemo, nakutungamo mbara omo vatunga. ³⁷ Vavo vadikiremo mbara mulimamo mafuva, nakutapeka vikunino vyavhinyu, nakuyitamo muyangu djuni. ³⁸ Ghuye ava shwere lirago wangu vavukatane. Kapi ashanine vimuna vyavo shi visheshupe. ³⁹ Vavo makura avasheshupa nakushwaghuka kuruhepo namaghudito ghomadona. ⁴⁰ Ghuye ava nyengita kuvampititi nakuvarenkita varendarende mumburundu, mwahana ndjira. ⁴¹ Ngoli ghuye ayovoliremo vakaruhepo mumaghudito ghavo nakutakamita liro lyendi yira ndjwi. ⁴² Vahungami pakuvimona evi ava hafa, ngoli vadona navantje avamwena. ⁴³ Wandunge avighayare ovi nakuteda muvirughana vyashihoro shaKarunga shashinene.