1
Pandurenu Karunga. Tapenu mpandu kwaKarunga, mbyo vyoshi ghuye muwa, nka nkenda yendi yanaruntje.
2
Are wakuvhura kuvharura virughana tetukita vyaKarunga ndi are wakutikitamo pandura ovyo arughana.
3
Walirago ndjegho wakurughana vyaghuhunga, navakutikitamo veta yendi.
4
Mvhurukeko, Karunga, pakushorora nkenda kuvantu voye; mvhatereko name nange kuna kuvapopera.
5
Wangu nimone ruvigha rwavatovororwa voye, nipembure muruhafo rwamuhoko ghoye, naghuwa wavo vahamo koye.
6
Atwe twadjona yira vanyakulyetu; twarughana mapuko, nka mbyo twarughana ghudona.
7
Vashetu kapi vakuhafitire kuvitetu ovyo warughanine muEgipite; vancenunwine virughana vyoye vyavingi vyashihoro shoye shanene, vavo kwakurwanitire palifuta, lifuta lyaligeha.
8
Nampiri ngoli, ghuye ava popelire mukonda yalidina lyendi wangu ashorore nkondo dendi dadinene.
9
Arawelire lifuta lyaLigeha, nalyo alikukuta. Makura avapititiri mushinko, yira mumburundu.
10
Ghuya avapopelire mumavoko ghavo vavanyengiro, nakuvayovora mumavoko ghavakankore.
11
Ngoli mema ghadividire vakankore vavo; naghumweshi wavo aparukiropo.
12
Ntani vapulire nkango dendi, nakuyimba mpandu yendi.
13
Shimpenka vavhuramine wangu-wangu ovyo arughanine; kapi vatatelireku mapukururo ghendi.
14
Vakalire nalidovo lyalinene mumburundu, nakusheteka Karunga mushirongo shalivhu-livhu.
15
Mpo avapire ovyo vashanine, ngoli avatumini ghuvera waghudito.
16
Mukamba vakalire mfudu kwaMosesi naAaroni, varuti vakupongoka vaKarunga.
17
Livhu aligharuka limine vaDathani nakufika vakwame vaAbiramu.
18
Mundiro aghu hwamamukatji kavo; mundiro aghu veveke vadona.
19
Vavo avarughana ntana paHorebi nakufumadeka shishwi shikuvo shakushonga.
20
Vavo kwaghulitire ghuwa waKarunga kushishwi shantwedu yakulya mushoni.
21
Vavo vavhuramine Karunga muyovoli wavo, ogho arughanino virughana vyavinene muEgipite.
22
Ogho arughanine vininke vyavitetu mushirongo shaHamu navirughana vya nkondo kulifuta lyaligeha.
23
Mpoghambire ndi avadjonaghurepo --- ngoli Mosesi, mutovoroli wendi, aputukiripo kumeho yendi, akushenge mukuvyuta ghugara wendi adire kuvadjonaghura.
24
Vavo vashwenine shirongo shashiwa; vavo kapi vapulire matwenyidiro ghendi,
25
Vavo kwavhungutire mutende davo, nka kapi valimburukire kwaKarunga.
26
Mpo ayerwire livoko lyendi nakuvaghana ashi ngavafera mumburundu,
27
Ruvharo rwavo ngaruhanena mudimuhoko, nakuvahanena muvirongo peke.
28
Vavo kwatonganenine Baali paPeori nakulya ndjambo yakutapa kuvafe.
29
Vava kwashangumwine ghugara navirughana vyavo, makura ghuvera aghuya mwavo.
30
Makura Phinehasi mpo ashapukire apangure, naghuvera mpo wamwenine.
31
Ovi kwavimuvarwelire ghuhungami naruvharo rwendi naruntje.
32
Shimpenka vavo vagarapitire Karunga pamema ghaMeriba, naMosesi ahepire konda yavo.
33
Vavo vatjutjupitire Mosesi, mpo aghambire vyakudira kuyivhira.
34
Vavo kapi vahanaghulire dimuhoko yira momo ava rawelire Karunga,
35
ngoli vavo avakuvongo nadimuhoko nakukushonga ndjira davo.
36
Nakufumadeka vintjwantjwo vyavo, ovyo vyavayitiliro lidjonaghuko.
37
Ava djambere vanavavo vavamati navavadona kumpepodona,
38
Vavo vatetire honde yahanandjo, honde yavana voye vavamati navavakadona, ovo vadjambilire kuvintjwantjwo vya muKanaani, kunyateka shirongo nahonde.
39
Vavo avakunyateke vavene navirughana vyavo; muvirughana vyavo vafanine yira vikumbu.
40
Mpo agarapire Karunga kuvantu vendi, nakunuta vantu vamwene.
41
Ghuye kavatapanga mumavoko ghadimuhoko, navo vavanyengo vavapangere.
42
Vakankore vavo kuvapangera, nakuvavarughanita kutwara kunkondo davo.
43
Maruvede ghamangi kayanga aya vavhatere, ngoli vavo shimpe avamukananita nakuturapo veta kundjo danaghumwavo.
44
Naposhi, ghuye kuvayuvha kumaghudito ghavo nange ayuvhu kunkugho yavo yamuhatero.
45
Ghuye kuvhuruka makukwatakano navo makura kukushighura konda yashihoro shendi shashinene.
46
Ndje wakurenkita vaketi vavo vavafere nkenda.
47
Tupopere, Hompa, Karunga wetu. Tupongayike tutundemo mudimuhoko wangu tutape mpandu kulidina lyoye lyakupongoka naghuwa mumpandu yoye.
48
Renka Karunga, Karunga waIsraeli, vamupandure naruntje kunaruntje. Vantu navantje vaghambe ashi, ''Ameni.''
Pandurenu Karunga.