¹ Ame kuna kupanda Karunga namonyo wande naghuntje, nanavintje ovyo nakara navyo, Nitape mpandu kulyendi lyakupongoka. ² Ame kuna kutapa mpandu kwaKarunga namonyo wande naghuntje nakuvhuruka navintje vyaviwa ovyo andughanena. ³ Ghuye kukghupirapo ndjo doye nadintje; Ghuye kukuverura maghuvera ghoye naghantje. ⁴ Ghuye kwaparura monyo ghoye kulidjonaghuko; nakukudwateka nashihoro shashinene nankenda. ⁵ Ghuye kwakutita liparu lyoye navininke vyaviwa ashi ghudikantu ghoye ghukare ngoweyo yira lishambakodi. ⁶ Karunga kurughana mughuhunga vahepwe nakuvapa ovyo vyavahameno. ⁷ Ghuye kwashororwire maghayaro ghendi kwaMosesi, nakuneyeda vaIsraeli nkondo davirughana vyendi. ⁸ Karunga mukankenda nawashihoro; ghuye kukuvora mukugarapa; shihoro shendi shanaruntje. ⁹ Kapi arundiranga kehepa; kapi agarapanga kehepa. ¹⁰ Kapi ghatufutitanga mukutwara mundjo detu. ¹¹ Yira momo gharepa mawiru pawiru yalivhu, nashihoro shendi shinene kwavo vamutjiro. ¹² Yiva momo wakara ghupumeyuvha ghure naghutokero, ngoli gharepa maghupiropo ghandjo detu kwetu. ¹³ Momo aferankenda shavanavendi, naKarunga naye mo aferanga nkenda ovo vamutjiro. ¹⁴ Mbyovishi ayiva omo atushita, ghuye ayiva ashi atwe netuva mbundu. ¹⁵ Ashi muntu, mayuvha ghendi yira mushoni; kukuva kuyungumuka yira mucuko wamulifuva. ¹⁶ Mpepo kughuyungira, makura waghokudongonokapo, nanaghumweshi wakughumonanka. ¹⁷ Ngoli shihoro shaKarunga shanaruntje kwavo vakumutjira. Ghuwa wendi kwavo ngavakaroko naruntje. ¹⁸ Ovo vakukwatakano naye mughushiri. vakuvuruka mukulimburukwa veta dendi. ¹⁹ Karunga atura shipuna shendi shaghu hompa muliwiru. naghuhompa wendi kupangera nakuntje. ²⁰ Tapenu mpandu kwaKarunga, anwe vaengeli vendi, mapenda ghankondo nakutikitamo nkango yendi, nakulimburukwa kumushagharo wankango yendi. ²¹ Tapenu mpandu kwaKarunga, anwe vakavita vendi navantje, anwe vakareli vendi vakurughana vyaviwa. ²² Tapenu mpandu kwaKarunga, vishitwa vyendi navintje, mumavango naghantje ogho apangeranga. Ame nganitapa mpandu kwaKarunga namonyo wande naghuntje.