¹ Ndapero yamaghudito mukukushenga nakulilira kwaKarunga. Yuvha ndapero yande, Karunga; yuvha nkugho yande. ² Washa vandeka shipara shoye kukwande muruvede rwamaghudito. Yuvha kwande. Nange me kunakukuyita, ndimburure. ³ Mbyovishi mayuvha kuna kupita yira muti, navifupa vyande kuna kutwera yira mundiro. ⁴ Mutjima wande ghuna rwapama, nka me nakara yira mushoni wakurembuka. Navhurama kulya kehe ndya. ⁵ Namanunga ghande ghamanene nakununga. Ame natongama ngudu. ⁶ Ame nafana yira shidira shamumburundu; Ame nakara yira kakuru mumarunda. ⁷ Ame kurara nahana turo yira shidira shamukuma, pantjasho pawiru yandjugho. ⁸ Vakankore vande kuntjwaghura liyuvha nalintje; vakuntjepa kufingilira lidina lyande. ⁹ Ame kulya mututwingo mboroto nakuvhonga vinwa vyande namaruntjodi. ¹⁰ Konda yaghugara ghoye waghunene, ghunandjerura nakumvhukumina palivhu. ¹¹ Mayuvha ghande yira mundulye wangurovha, nka menarembuka yira mushoni. ¹² Ngoli ove, Karunga, wanaruntje, nka ngadikuvhuruka dimuhoko nadintje. ¹³ Ngaghushapuka nakuferankenda Siyona. Ndoruvede rwakumuferankenda; ruvede rwa ruwa runatikimo ngoli. ¹⁴ Vakareli voye kwamuhora nampiri movamuhanaghura nakumufera nkenda kumbundu yandambo yendi. ¹⁵ Dimuhko ngadi fumadeka lidina lyoye, Karunga navahompa navantje vamughudjuni ngavatjira nkondo doye. ¹⁶ Karunga nga tungurura Siyona nka ngashorora ghuwa wendi. ¹⁷ Muruvede oro, ghuye ngalimburura davo ashuva; ghuye kapi ngashwena ndapero davo. ¹⁸ Evi ngavavitjangera mapupi ghakumeho, navantu ovo shimpe vadira kushampuruka ngavafumadeka Karunga. ¹⁹ Mbyovishi ghuye kunakukengera pano kutundilira mumutika waghupongoki wendi; kutundilira muliwiru Karunga kuna kukengera palivhu. ²⁰ Mukuyuvha kununga kwavakamango, mukushutura ovo vapangwira kumfa. ²¹ Ntani vantunga vayuvhita lidina lyaKarunga muSiyona nakumupandwira muYerusalema. ²² Oko vantu namaghuhompa ngagha kaponga-ponga mukurughanena Karunga. ²³ Ghuye kwangupa nkondo muliparu lyande. Mbyo afupipika mayuvha ghande. ²⁴ Mbyo naghambire ashi, Karunga wande, washa lingupa liparu lyande. ²⁵ Pashakare watulirepo livhu palivhango; mawiru ne shirughana sha mavoko ghoye. ²⁶ Navintje ngavidongonoka, ngoli ove wanaruntje; vyavyo ngavikurupayira vidwata; ove ngaghuvighupapo, makura ngavi dongonokapo. ²⁷ Ngoli ve momo wakara nakare, namwaka doye kapi ngadishaya. ²⁸ Vana vavakareli voye ngavatunga mulikaromo lyoye, naruvharo rwavo ngaru kara mulipopero lyoye.