1 Lipisalomu lyaDaviti. Ame kuna kukuyimbira rushumo rwakuhamena kunkenda naghuhungami; koye, Karunga, Ame nikupandure narushumo. 2 NAshana kuyendera mukarowa ghuhunga. Liyuva ke ngaghuya kwande? Ngani yende naghukaro waghuwa mumundi wande. 3 Kapi nganihokwa vyavidona kumeho yande. Nanyenga virughana vyavo vanyengo Karunga; kapi ngani hamenako. 4 Vantu vavipempa ngani kugaghunuka navo; Ame nakulimburukwashi ghudona. 5 Ngani djonaghura wakushopa ghunyendi. Ame kapi ngani kara nashinanga namuntu wakukunenepita wakudjindja mantjo. 6 Ame ngani renka valimburukwi mushirongo vakare pepi name. Ovo vakaro namaghukaro ghamawa ngavandughanene. 7 Vapukiti kapi ngava yimana mundjugho yande; vanavipempa kapi ngani vatambura kumeho yande. 8 Kehe ngurangura Ame ngani djonaghura vadona mushirongo. Ngani tunditamo varughani ghudona navantje mumbara yaKarunga.