¹ Vantu vetu kwa hungama ntani kwa wapire yira ngorodo yaku kushuka ya ngushu ano ngoli weno kwa nyata; kuna fana yira ngorodo ya shitembwe, kwato mulyo! Vana nkore vetu kwa hanaghura mawe na ghantje, ghaku pongoka nagha ghamu ntembeli. ² Vana va va Siyoni mu Yerusalemu kwa pongire kumwe tupu yira ndundu ya ngorodo ya ngushu, pa weno kwato mulyo, kuna kara tupu yira lirova lyamu mema, va shonga vapoto na maghoko! ³ Vikorama vyava mbwawa kwa yiva kurera naku yamweka mashini vana vavo, ano ngoli vantu vetu ghukenya ghunene na vana vavo; kwa fana yira vidira vyava Mpo vamu wiya kwa shuva maghuta ghavo vayende kwa peke. ⁴ Vanuke kuna ya shama mukanwa mukonda ya linota, mbyo vana rondo pawiru vaka shane naku romba mema; vanuke kuna ku lira ku ndjara va shane ndya, ano ngoli kwato waku tapa ndya ku vanuke. ⁵ Vantu ovo kava lyango ndya dadiwa darupekwa, weno kwato ndya, kuna kufa ku ndjara. Vantu vaku dwata vyuma vyaghu-fughuli weno kuna shungiri mu mutwitwi namu mbundu. ⁶ Matengeko gha vantu vetu kwa pitakana gha vantu vamu shitata sha Sodomu, vavo kwava djonaghurapo tupu wangu-wangu mu shirugho sha shifupi ntani kapi vakalire muruhepo shirugho sha shire. ⁷ Vampititi vetu kwa kushukire naku kena yira mema ghalime, ntani kwa kena yira mashini; marutu ghavo kwa kena ntani kwa kushuka, vavo kwa kalire na marutu gha ndjewa-ndjewa ghaku vembera yira Diyamande. ⁸ Pa weno kuna shovagana ku vipara vyavo, ntani kwato kuva dimburura mundjira. Vavo kuna tongama parutu ntani vipapa vyavo kwa kukuta vyaku tjindja; marutu ghavo kwa kukuta ntani kwa kutjindja akare yira vitondo. ⁹ Vantu vaku fa ku lighonga paku rwa vita hashako tupu kupita kana vaku fa ku ndjara, mukonda ya lirumbu mushirongo, kwato muyangu mu mafuva ntani vantu kufa ku ndjara. ¹⁰ Vakadi kwa yita naku rera vana vavo na shihoro na nkenda na mpora; mukonda ya lirumbu na ndjara vavo kwa dipaya vana vavo vatereke ntani va lye; shitata sha Yerusalemu ove kwa mana kulya vana voye, makura vana nkore voye mbyo vana ku homokere vaku djonaghurepo. ¹¹ Hompa Karunga kwa garapa ku vantu vendi; ghuye kwa tera lishandu lyendi pa pavo. Ghugara wendi kwa shora vantu vamu Siyoni na shitata shavo na shintje dogoro kwa huparamo tupu mawe. ¹² Va Hompa vamu ghudjuni kwato ku vipura ashi vana nkore kuvhura ku tjora mavero gha shitata sha Yerusalemu va ngene munda. ¹³ Vino kwa shoroka mukonda ya ndjo na ghurunde wava Porofete na va Pirisiteli vakare vamu shirongo ovo vadipayo honde ya vantu vaku pira ghundjoni muno mu shirongo. ¹⁴ Va Porofete na va Pirisiteli vakare kwa renda-renda, mu shirongo, yira vantu vaku pira mantjo. Kwato waku vhura ku kwata parutu rwavo ntani na vidwata vyavo, mukonda shi kwa nyata ku honde ya vantu ovo vadipaya. ¹⁵ Kehe kuno vayenda vantu ku ghamba ashi, "Tundenu mo mu shirongo shetu! Anwe kwa nyata!" Vavo ku tjwayuka mo vayende kwa peke vaka renda-rende tunda shirongo yenda shirongo; kehe kuno vayenda vantu ku ghamba ashi, "Anwe kwato ku tunga mu shirongo shetu." ¹⁶ Hompa Karunga wavo kwava tjidamo vatjwayuke mo mu shirongo shavo. Vantu kapi vafumadeka nka va Pirisiteli ntani na vakurona vamu shirongo. ¹⁷ Atwe kwa taterera vantu vaku tupopera, ano ngoli kwato waku tupopera; ntani atwe kwa huguvara vantu vamu virongo vyama parambo vatu popere, ano ngoli kwato waku shana kutu popera. ¹⁸ Vana nkore vetu kutu shana naku tutjida kehe pano mundjira, vatu kwate naku tu tura mudorongo. Shirugho shetu kuna kutika kughuhura ntani mayuva ghetu kuna kupwa, vana nkore vetu ngava tu kwate ngava tudipaye natu vantje. ¹⁹ Vana nkore vetu kuduka naku tjwema ghunene yira likuvi lyaku tuka muwiru. Atwe kutjwayuka tuka vande ku ndundu, ano ngoli kuka vawana vana katika ko kare kuna vanda atwe vana ku taterera, paku duka tuyende mu mburundu tuka vande, ku ka vawana momo kuna vanda atwe vana kutaterera vatu homokere. ²⁰ Va Hompa vetu ovo atungika - Hompa Karunga ndi vaku tupititira naku tupopera, navo kwava kwata mughupika; vavo kuhepeka va Hompa vetu momu vana shana - ntani vavo kughamba ashi, "Anwe kwa tunga mu mundunduma wamu shirongo shetu yira vikorama va tura mu likwina lyaku dama mudorongo yamu livhu." ²¹ Anwe vantu vamu shirongo sha Edomu na shirongo sha Usi, karenu na ruhafo ntani na ruviya pa weno, mu shirugho shino shashifupi. Shirugho shenu kuna kuya nanwe ngamu nwa mo muno mu nkinda ya ghugara wa Hompa; nanwe ngamu korwa ngamu ku shutura vyuma ngamu kare muhere-here. ²² Anwe vantu vamu Siyoni, matengeko ghandjo denu kuna kutika kughuhura; kapi nka ngamu tunga mu virongo vya peke. Ano ngoli ku kwenu anwe vantu vamu Edomu, Hompa Karunga nga tapa matengeko ku kwenu; vantu na vantje ngava kenga ndjo denu odo mwa horeka.