¹ Hompa Karunga, kenga kwa vino vina ku shoroko ku kwetu; atwe kuna kara na ntjoni ntani kwato waku tu fumadeka. ² Limona lyetu na ghungagho wetu kwatu shakana vantunda virongo; vavo kwa pinga naku tunga mu mandi ghetu namu ndjugho detu. ³ Vana nkore vetu kwa dipaya vashetu, makura va nyokwetu mbyo vana kara vafita va vyavo, ntani atwe kuna kara vantiwe. ⁴ Pakunwa mema atwe nkwandi kughura naku futa, ntani paku tjava vikuni nkwandi kughura naku futa kuva na nkore vetu. ⁵ Vana nkore vetu kuna kutu tjida ntani papepi vana kara weno vatu kwate; atwe tuna roroka kuduka ntani kwato ruvede rwaku pwiyumuka. ⁶ Atwe kuna ku ku tapa kuva Egipite naku va Siriya vatu kwate, mposhi tuwane ko tupu ndya da kulya tuparuke. ⁷ Vakurona vetu vakare kwa djona, ntani weno vafa kare, ano ngoli atwe shimpe kuna kuhepa naku futa ndjo davo na ghurunde wavo ogho va ruwana virugho vina kapito. ⁸ Vantu vetu kuna kuva pangera vapika vamu Babiloniya, ntani vavo kwato waku vhura kuva shutura vatunde mu mango namu ghupika wavo. ⁹ Atwe kuyenda kwaghure tuka shane ndya daku lya tuparuke, ntani monyo detu kwa kara mu shimponga kuva na nkore vetu, vavo kwa tunga mu wiya omo mwa karo nyango. ¹⁰ Marutu ghetu na shipapa shapa rutu kupya kumwi ntani kwa kitumuka, atwe kwa tongama mbyo twa ku kuta parutu mukonda ya mwi na ndjara. ¹¹ Vana nkore vetu kwa kwatera vakadi vamu Siyoni ku nkondo, ntani nka kwa kwatera ku nkondo vakadona va vanuke vamu Yuda. ¹² Vana nkore vetu kwa mangerera marughodi muntingo da vampititi vetu va va dipaye, ntani kapi va fumadeka vakurona vetu. ¹³ Vana nkore vetu kutininika va dinkantu va vamati vatwe mahangu ghaghutura, ntani kutininika vanuke va vamati vaka tjave naku damuna ndambo ya vikuni. ¹⁴ Vampititi vetu kwa tjwayuka mo mu shitata shavo kwato kupangura vantu, ntani vadinkantu kwa shayeka kuyimba ntjumo daku dana. ¹⁵ Atwe kwato ruhafo rwamu mutjima rwa pwamo ntani atwe kulira na ku guva kehe pano, kwato mbili yamu mutjima. ¹⁶ Nkata ya mapenda yaku dwata ku mutwe kwa wera pa livhu; lihudi na maghudito kuna ku shoroka ku kwetu, mukonda shi atwe kwa djona! ¹⁷ Atwe kuna roroka ntani kuna dombo dimutjima, mantjo ghetu kwato ku mona nawa kuna yura maruntjodi ¹⁸ Shitata shaku Ndundu Ya Siyoni kuna kara muporongwa kwato ogho ahuparomo, weno vikashama vyava mbwawa mbyo tupu vina karomo. ¹⁹ Hompa Karunga, ove, kupangera virugho navintje, ove kwa shungira ku lipuna lyoye lya ghuHompa ntani kupangera dimuhoko na dimuhoko virugho navintje. ²⁰ Mukonda munke ngaghu tuvhuramena dogoro ku naruntje naku naruntje? Mukonda munke ghutu kengerera tuhepe virugho navintje na mayuva ghama yingi? ²¹ Hompa Karunga, atwe vantu voye, tuvatere ngatu vyuke ku koye, ngatu kare na lirago. Tupeko virugho vya lirago na liparu lya liwa yira mayuva ghaku hova - ²² ndi walye ove kwatu shwena mbyo watu shuva naku tukengerera, nane shimpe kapi wa pwa ghugara ghoye waku kwetu ndi.