¹ Ame na tjango yino mbudi, ame ghumwe nakengo vihuna kwa Hompa Karunga ogho atoghona na mburo yendi, mukonda ya ghugara na lishandu lyendi lya linene. ² Ghuye kwa ntjida naku ntininika nuyende ruvede rwa matiku mu mundema, mundjira yaku pira ramba na ghukenu. ³ Ghuye kehe pano kutoghona parutu rwande, kwa kara nanyanya ku kwande. ⁴ Ame kwa mona vihuna dogoro shipapa shapa rutu rwande kwa remana mbyo shaku tjindja shifane yira shamu kurupe; Ghuye kwa tjoraghura vifupa vyamu rutu rwande. ⁵ Ghuye kwa tunga dorongo yamu livhu yaku pama, mbyo ampaterera nukare munda, ame kumona vihuna ku viruwana vya ghudito vyaku fa naku rambuka. ⁶ Ghuye kwa ntura mudorongo yamu livhu yamu mundema, kwa fana yira mu shirongo shava fe shamu mundema. ⁷ Ghuye kwa tunga dorongo yamu livhu yaku dama ghunene ntani yaku pama kwato ku tundamo. Ghuye kwa manga ku maghuru naku maghoko ghande na maghuketanga ⁸ ame kehe pano kulira naku shungida ku kwendi, ano ngoli ghuye kwato kulimburura ndapero yande. ⁹ Ghuye kwa titika ndjira dande na dintje ntani kwa dika likuma lya mawe lyaku pama lyaku kundurukida; mbyo vantura munda nukare tupu waku renda-renda mo mo kwato kutunda mo. ¹⁰ Ghuye kwa fana yira limbungu lyaku vanda lyaku kwata vantu; ntani kwa fana yira nyime wa kufa ndjara waku vanda waku kwata vantu; ¹¹ ghuye kwa fana yira limbungu lyaku tjida vantu vaku hanaghuke vatjwayuke kehe ghuno kwa pentjendi. ¹² Ghuye kuna kwata ghuta wendi wa nkandja mbyo ana pameke ngumba mu ghuta wendi wa nkandja kuna nana aponye parutu rwande. ¹³ Makura ngumba yendi yina ngene murutu rwande mbyo yina tomona ngera yande ame kuna kukora ghunene. ¹⁴ Vantu navantje ame vana ku shepa, ntani ame vana ku shwaghura. ¹⁵ Hompa Karunga kwa tapa ruhepo na runyando ku kwande ntani ame kuna fana yira muntu waku nwa ghushungu waku shana kufa. ¹⁶ Ghuye kwa tura mawe na musheke mukanwa kande nutafune dogoro mayegho ghande kutjoka, ntani kwa ntura nu shungire pa livhu mu mutwitwi naku ku kwita mutwitwi parutu rwande. ¹⁷ Ame kapi na kara na mpora mu mutjima wande; ntani ame kwa ruhafo munda ya monyo wande. ¹⁸ Ame ku ghamba ku kwande na ghumwande ashi, "Ame kwato nkondo daku damuna mudigho waku hura pano ntani ame kwa huguvara tupu mwa Hompa Karunga wande." ¹⁹ Ame kehe pano ku vhuruka naku ghayara ruhepo rwande na runyando rwande, ntani naku renda-renda kwande muno mu ghudjuni, ntani ame kuna fana yira muntu wa kunwa ghushungu waku korwa waku shana kufa. ²⁰ Ame kapi nganu vhurama ruhepo rwande naku kora kwamu mutjima wande ntani na ruguvo rwamu monyo wande. ²¹ Hompa Karunga wande ame kuna ku shungida ku koye ghumpopere ntani ame kwa huguvara mumoye tupu: ²² Shihoro sha Hompa Karunga kwato ku shaya ntani kwa kara na nkenda yayinene ntani ku pakera mbili vantu vendi kehe pano, ²³ Ghuye kutu kunga matiku naghantje naku turambwita mu mbili kehe liyuva; atwe kwa kara na lihuguvaro mu mwendi. ²⁴ Ame na yiva ashi, "Hompa Karunga kwa tapa ghupingwa ku kwande," ame na hepa kuhuguvara naku taterera ku kwendi nga tikitemo nkando dendi. ²⁵ Hompa Karunga muwa kwavo vaku huguvara mu mwendi naku taterera ku kwendi, ntani navo vaku mushana kumu wana. ²⁶ Kuwapa nkene muntu waku didimika naku taterera kwa Hompa Karunga ngamu yoghore, ghuye kuna mwena ko tupu mpore. ²⁷ Kwa wapa ntani kwa hungama nkene muntu waku ruwana naku tjimpuka liyuywa ghuye shimpe muteke ntani ghuye muna ntjoka kuna kara na nkondo murutu daku shimpa mudigho wa ghudito. ²⁸ Ghuye ana hepa ku damuna mudigho wa Hompa Karunga, aku kambeke pa mapepe ngaghu shimbe. ²⁹ Muntu wa weno ana hepa kulya mbundu naku yenda mu mbundu ntani naku rara mu mbundu - ghuye ana hepa kukara na lihuguvaro mwa Hompa Karunga ngamu popere. ³⁰ Nkene kuna ku toghona ku litama lyaku rulyo, piruka ghutape litama lyaku rumontjo nalyo vali toghone, ntani ove kutambura tupu kwa kehe ghuno waku kutuka naku ku shwaghura. ³¹ Hompa Karunga ku garapa tupu ku vantu vendi mu shirugho sha shifupi, ntani ghuye kwato shuva naku shwena vantu vendi, ³² ntani Ghuye kutapa matengeko ku vantu vendi ovo ahora navo atoghorora va wapeke ghukaro wavo, ntani kwa kara na nkenda na shihoro shashinene ku vantu vendi. ³³ Ghuye kwato ku kara na ruhafo paku mona vantu vendi kuna guvu ntani kuna kuhepa. ³⁴ Kehe ghuno waku kisha naku hepaka vantu vamu dorongo, ³⁵ ntani waku shwena ku ruwana ghuhunga ku vantu naku shipara sha Hompa Karunga, ³⁶ ntani naghu waku fukilira vantu mu mpanguro vapire ku wana mpanguro ya ghushili - Hompa Karunga ku kenga navintje ntani Ghuye kwato ku pulitira vya weno! ³⁷ Are waku vhura kughamba nkango makura ngavi shoroke ovyo ana ghamba, nkwandi mbyovyo aghamba naku tokora kare mwene Hompa Karunga? ³⁸ Hompa Karunga wamu liwiru ndje waku tokora ashi ghudona na ghuwa ghushoroke mu ghudjuni? Kapi vya hungama ashi atwe vantu vamu ghudjuni to shivanene Hompa Karunga? ³⁹ Naku wapa shi muntu wamu runde ku shivana, nkene kuna ku mutengeka mukonda ya ghurunde wendi? ⁴⁰ Tuwapekenu ghukaro wetu na viruwana vyetu, tuku shighure tuvyuke kwa Hompa Karunga. ⁴¹ Turapererenu naku tapa dimutjima detu, naku yerura maghoka ghetu muliwiru kwa Hompa Karunga: ⁴² naku ghamba ashi, "Hompa Karunga atwe kwa ruwana ghurunde na ndjo kushipara shoye, atwe kapi twa limburuka ku veta doye, ntani ove kapi wa dongononapo ndjo detu ntani ove kapi watu ghupirapo pa ndjo detu. ⁴³ Makura ove mbyo wa garapa ku kwetu mbyo watera lishandu lyoye na ghugara ghoye pa petu, ove mbyo watu dipaya natuntje twa pwapo, ntani kwato nkenda ntani kwa waku shuvapo. ⁴⁴ Ove kwa ngena mbyo wa vanda mu maremo mposhi ndapero detu ngadi pire kutika kukoye. ⁴⁵ Ove kwatu tjida tutjwayukire ku virongo vya peke ntani vana nkore vetu kutu mona atwe yira vantu vaku purumuka, kwato mulyo. ⁴⁶ Vana nkore vetu kutu finga kehe pano, ⁴⁷ atwe kwa kara na ghoma kehe kuno ngatu yenda, vantu ku vhura kutu dipaya, mukonda shi atwe vantu va ruhepo ntani twa mona vihuna. ⁴⁸ Maruntjodi kuna kuroka mu mantjo ghande yira mukuro waku pupa mema mukonda shi vantu vetu kwa kufa ghunene. ⁴⁹ Muruntjodi kuroka kehe liyuva mu mantjo ghande kwato ku shaya, ntani kwato kupwa mo, ⁵⁰ dogoro Hompa Karunga wamu liwiru nga kurumane nga kenge pa livhu ku kwetu. ⁵¹ Amen kuna ku yuvha kukora ku mutjima paku mona kwavi vya shoroko ku vakadi vamu shitata shetu. ⁵² Vana nkore vande ame vana kushana yira shidira ndi ngava vandipaye, vavo kwa shana ku ndipaya pahana konda ndi ghundjoni. ⁵³ Vavo kwa tima likwina lyaku dama mbyo va mvhukuminamo ntani mbyo vadekako limuwe lya linene, ⁵⁴ makura mbyo vateramo mema dogoro likwina kwa yura mema, mutwe wande kwa ngena naku mbwituka mu mema. Ame ku ku yuvha ashi, 'Amen kuna kufa ngoli weno!' ⁵⁵ Ame kuna kara kuntji ya likwina lya mema, kwa shungida naku raperera kwa Hompa Karunga, nushane mbatero. ⁵⁶ Ame kwa lira ku kwendi ashi, 'Hompa Karunga wande paturura matwi ghoye, yuvha naku tambura ndapero yande.' ⁵⁷ Makura Ghuye kwaya papepi name; naku ghamba ashi, 'Kapi shi ghukare na ghoma.' ⁵⁸ Hompa Karunga, ku popera vantu vendi mu ruvede rwa mpanguro vatunde mu ndjo, Ghuye kwato ku pulitira vana nkore vendi vadipaye vantu vendi! ⁵⁹ Hompa Karunga kwa yiva ghundjoni ogho varuwana vana nkore yendi ku vantu vendi. ⁶⁰ Hompa Karunga ku kenga navintje vyamunda ya mutjima wa muntu, ntani kupangura mughuhunga ntani kuneyeda vana nkore vendi ashi vantu vendi kwato ghundjoni. ⁶¹ Hompa Karunga wande, ove ku yuvha omo vana ku ntuka naku ntjwaghura, ntani wa yiva navintje ovyo vana kushana ku ruwana vana nkore ku kwande. ⁶² Vana nkore yande ame vana kutuka naku shwaghura, liyuva na lintje. ⁶³ Va kenge omo vana shungiri vavo ame vana kughamba mwamu dona; vavo ame vana ku shwaghura mu ntjumo davo daku shengerekeda. ⁶⁴ Hompa Karunga, futita vana nkore voye, ku twara mu viruwana vyavo. ⁶⁵ Va pangure ghuva fite ntjoni ku viruwana vyavo! Tapa mafingo ghoye ku kwavo! ⁶⁶ Hompa Karunga ove kwa garapa ku kwavo, vatjidemo naku va djonaghurapo ngava pwemo muno mu ghudjuni!"