¹ Hompa Karunga kwa garapa ghunene ku muhoko wendi wa Siyoni, yira liremo lya litipu lina vindakano kuwiru ya shitata sha Yerusalemu. Shitata sha Siyoni kwa wapire ntani kwa fughulire ghunene ano ngoli pa weno kuna shi vhukuma shitundeko kuwiru mbyo shina were pa livhu shikare kughure naye. Hompa Karunga nkene kuna garapa, ku neyeda lishandu lyendi, ntani ghuye kwato ku vhuruka ashi livhu ngo ghulyatero wa mpadi dendi. ² Hompa Karunga kwa djonaghurapo vitata vya va Yuda, ghuye kwato ku fera nkenda muhoko wa vantu vendi. Mukonda ya ghugara wendi, ghuye kwa djonaghura naku hanaghurapo makuma ghaku pama gha vitata vya va Yuda; Ghuye kwa yita lishwaghu mushirongo naku muhoko wendi naku vampititi va shirongo vakare kwato nkondo. ³ Mukonda ya ghugara na lishandu lyendi lya linene, ghuye kwa tetako mbinga da nkondo da muhoko wava Isirayeli di tundeko. Ghuye kwa honya lighoko lyendi, ntani kwato kupopera muhoko wendi kuva na nkore vavo. ⁴ Ghuye kuna kara yira mundiro waku twera ghunene waku veveka ruvharo rwa Yakopu va pwepo. Hompa Karunga kuna wapayiki ghuta wendi wa nkandja na ngumba, dado kuna neye ku kwetu, ntani atwe kuna kara yira vana nkore vendi. Ghuye kuna kuwapayikiri muku dipaya vantu vamu muhoko wendi wa Siyoni ovo ahora ghunene; Ghuye kuna kara na lishandu ntani na ghugara wa ghunene ku kwavo yira mundiro waku twera ghunene waku veveka. ⁵ Weno Hompa Karunga kuna kara yira muna nkore wa muhoko wendi wava Isirayeli. Ghuye kwa djonaghurapo muhoko wendi naghuntje wava Isirayeli. Ntani Ghuye kwa djonaghurapo matungo ghamanene naghantje ghamu shitata. Ntani Ghuye kwa dipaya vantu va vayingi mbyo awederera naku vhukita maghudito ku muhoko wendi wava Yuda vakare mu malira nkali. Ghuye kwa tuma vana nkore vetu, vatu homokere naku djonaghura ntembeli yendi yira momu va yungurura nga ndjugho ya ndunda yamu shipata. ⁶ Hompa Karunga kwa renka vantu vendi, kwato kuponga ntani kwato kudana mayuva ghavipito vyaku pongoka. Vantu va Hompa Karunga kwa vhurama kuponga kumwe va raperere mu liyuva lya Sabata, ntani kwa vhurama kuponga kumwe vadane mayuva gha vilika vyaku pongoka, Ghuye kwa nyenga va Hompa vetu na va Pirisiteli vetu mukonda ya kupira kulimburuka ku kwendi, Ghuye kwa garapa ghunene ku kwavo. ⁷ Hompa Karunga kwa shwena Alutare yendi ntani kwa nyenga shidjambero shendi ntani kwa tunda mo mu ntembeli yendi. Ghuye kwa tuma vana nkore va djonaghure ntembeli na ndjugho daku pongoka. Vana nkore vendi kuna kuyimba na ruhafo mu ntembeli yendi, yira momu va ponganga vantu vendi va yimbe naku dana vilika vya mayuva ghaku pongoka. ⁸ Hompa Karunga kwa tuma vana nkore va bomaghure matungo na makuma gha shitata sha Yerusalemu. Ghuye kwa meta ghunene wa shitata nashintje mbyo ataghura mutunda waku kundurukita shitata na shintje, mbyo atokora muku bomaghura makuma naku djonaghura matungo gha shitata na shintje. Matungo na makuma kwa rundumuka naku myoka; ntani shitata na shintje kwa hanaghukapo. ⁹ Makungu na mavero na ghantje kwa tjokaghuka naku rundumuka awere palivhu; vana nkore kwa tjoraghura naku djonaghura vikugho vyaku mavero gha shitata. Hompa wa shirongo na matimbi na vampititi vamu shirongo kwava kwata va vatware mughupika ku virongo vya peke, ntani mushirongo kapi mwa kalire vantu vakurongo veta da Moses, ntani Hompa Karunga kapi katapanga mbudi na mamoneko ku vaporofete ndi vatape ku vantu. ¹⁰ Vakurona vamu shitata sha Siyoni kuna shungiri mulivhu kuna ku kumbata kuna kukende kuna guvu ntani kuna mwena teyete. Vavo kuna kara muliguvo lya linene ntani kuna ku kwiti mutwitwi kumutwe mbyo vana dwata ntjako daku tavaghuka. Vanuke va vakadona vamu Yerusalemu kuna nyongama dimutwe davo mu livhu kuna kulira ntani kuna kara muliguvo. ¹¹ Mantjo ghande kuna roroka mu kulira maruntjodi; ntani ame kuna kukora ghunene munda ya mutjima wande; ntani ame kuna kara na liguvo lya linene paku mona vantu va vayingi kuna rara mundjira, shinene po yira vanuke va vakadona ntani na vakeke vamu shitata shetu omo vana kufa ku ndjara. ¹² Vanuke kuna kulira vatantere va nyokwavo ashi, "Yina atwe kuna kufa ku ndjara naku linota?" mpopo tupu vavo ku kugandera pa livhu, makura kufera pa maghoko ghava nyokwavo. ¹³ Anwe vantu vamu Yerusalemu, weni omo mwa fana? Kwato vantu vahepo rumwe muno mughudjuni yira momu muna kuhepa anwe, kapi nayiva ashi kumu ruwana weni ntani kumu tantera weni anwe va Siyoni ntani ngamu yuvhako ngamu yoghoke ngamu paruke? Ghuvera wenu na vironda vyenu kuna nenepa yira mema ghamu lifuta. Are waku vhura kuverura ghuno ghuvere wenu? ¹⁴ Vaporofete venu kuna ku ghamba ashi vavo kuna wana mbudi na mamoneko yaku tunda kwa Hompa Karunga, nane ngoli vavo kuna kughamba naku tapa mbudi ya vimpempa. Vavo kapi vana kumu tantera ashi anwe kwa djona ku shipara sha Hompa Karunga ntani kapi vana kumu popere ku ndjo denu naku vana nkore venu, mbyo vana kutapa mbudi na mamoneko na ndjodi da vimpempa ku kwenu ashi, kuna tundu kwa Hompa Karunga, nane ngoli yino mbudi na mamoneko ghavo vavene, ntani yino mbudi ya vimpempa makura anwe kuyi tambura naku yihuguvara, vavo kumu pukita. ¹⁵ Vantu na vantje vaku pita mundjira kuna kumu shepa naku kanda maghoko ghavo paku mukenga omo muna fana. Vavo kuna kumu tuka naku mu shwaghura naku punga ku dimutwe davo, paku kenga ku kwenu, vantu vamu Yerusalemu, vavo ku ghamba ashi, "Ngoli vya ghushili shino shitata kava shi twenyanga ashi, 'Yerusalemu yayinene shitata sha ghufughuli mu ghudjuni na ghuntje,' ntani shitata sha ruviya na ruhafo mu ghudjuni naghuntje'?" ¹⁶ Weno vana nkore venu na vantje kuna ku mushepa naku mushwaghura naku mufinga, vavo kuna ku ghamba ashi, "Shitata na shintje tuna mana ku djonaghura! Atwe kwa taterera ruvede rwaku fana weno shirugho shashire ghunene! Weno ruvede runa tikimo ngoli, atwe kuna ku vimona na mantjo omo vina ku shoroka!" ¹⁷ Hompa Karunga kuna ruwana vino, muku tikitamo nkango dendi kwavyo aghamba kwenu shirugho shina kapito. Ghuye kwa tapa marondoro mbyo ana tikitamo nkango dendi. Ghuye kwa djonaghurapo vantu navantje kumwe na shitata pa hana nkenda, ntani mbyo amu tapa mu maghoko ghava na nkore venu vaku tongorore; ghuye kwa tapa maruvinga gha nkondo kuva na nkore venu vamu djonaghurepo. ¹⁸ Hompa Karunga kwa shana ashi ndi makuma ghamu Yerusalemu ngo akaliro na liywi lyaku ghamba, naku lira ntani naku shungida yira vantu! Ntani ghuye kwa ghamba ashi lira ghunene maruntjodi ghaduke yira mukuro waku pupa mema matiku na mwi. Ove shungida naku lira ghunene kwato ku shayeka, ntani twikira kuraperera kwato ku shayeka. ¹⁹ Rambuka, matiku kehe pano raperera, ntani tongonona naku tapa maghudito ghoye naghantje kwa Hompa Karunga! Yerura maghoko ghoye mu liwiru, shungida kwa Hompa Karunga wa nkenda aku popere nove na vana voye vano kuna bwakama ntani kuna kufa ku ndjara, mukonda shi kwato ndya daku lya va paruke. ²⁰ Hompa Karunga, kenga vantu voye omo vana ku hepa, va fereko nkenda. Shimpe kapi twa mona ove ghutape matengeko ghuku fana weno ku vantu voye, ntani kapi vya hungama ashi vakadi ku shampuruka monendi atunde mulira lyendi makura ku mulyapo mukonda ya ndjara, ntani kapi vya hungama ashi mukadi kushampuruka monendi kurera ana kuru makura ngamu lyepo? Ntani kapi vya hungama vyaku dipayera va Pirisiteli nava porofete va Hompa mu ntembeli ya kupongoka? ²¹ Vimpu vya vantu vakufa vakondi na vanuke kuna rara mundjira mu mbundu. Ntani vana nkore kuna dipaya vamati na vakadona na maghonga, vimpu kuna rara mundjira; mukonda ya ghugara na lishandu lya Hompa mbyo ana tumu vana nkore venu vamu dipaye ntani kwato kumu fera nkenda. ²² Hompa Karunga kwa tuma vana nkore venu, va tunde ku maruha na ghantje va homokere shirongo shenu yira vantu vaku dana shipito, Hompa Karunga kwa neyeda ghugara na lishandu lyendi, ntani vantu mbyo va kara na ghoma wa ghunene, kwato waku shenduka ntani kwato waku parukamo; vana nkore vetu kwa dipaya vana vetu na vantu vetu kumwe nava mpititi vetu vamu shirongo.