¹ Aghano ngo madina gha matimbi gha liraghona lyovo vakaliro muupika mu Babyloni ovo vayendiro kumwe na Ezra ku Jerusalem opo akalire Artaxerxes hompa. ² Gershom wa mu lira lya Phinehas, Daniel wa mu lira lya Ithamar. Hattush wa mu lira lya David. ³ Zechariah wa mu lira lya Shekaniah, owo a tundiro mu lira lya Parosh, ntani nava kafumu lifere na ro ntano vakutunda kuntapuko yendi. ⁴ Mulira lya Pahath-Moab, kwa tunddire mo Eliehoenai mona Zechariah wa mukafumu ntani na vakafumu mafere maviri. ⁵ Mulira lya Zattu,kwa tundire mo Ben Jahaziel ntani na vakafumu mafere matatu. ⁶ Mu lira lya Adin, kwa tundire mo Ebed mona Jonathan wa mukafumu ntani na nakafumu ro ntano. ⁷ Mu lira lya Elam, kwa tundire mo Jeshaiah mona Athaliah wa mu kafumu ntani na vakafumu ro ntambiri. ⁸ Mu lira lya Shephatiah, kwa tundire mo Zebadiah mona Michael wa mukafumu ntani na vakafumu ro ntantatu. ⁹ Mu lira lya Joab, kwa tundire mo Obadiah mona Jehiel wa mukafumu ntani na vakafumu mafere maviri na ro na ntantatu. ¹⁰ Mu lira lya Bani, a mutundu Shelomith mona Josiphiah wa mukafumu ntani na vakafumu lifere na ro nta yimwe. ¹¹ Mu lira lya Bebai, a mutundu Zechariah mona Bebai wamukafu ntani na vakafumu ro mbiri na ntantatu. ¹² Mu lira lya Azgad, a mutundu Johanan mona Hakkatan wa mukafumu ntani na vakafumu lifere limwe na vakafumu murongo. ¹³ Va lira lya Adonikam avaya muruhulilira. Oghano ngo madina ghavo: Eliphelet, Jeuel, na Shemaiah ntani na vakafumu ro nta yimwe. ¹⁴ Mu lira lya Bigvai, a mutundu Uthai na Zakkur ntani na vakafumu ro nta mbiri. ¹⁵ Ezra aghamba ashi; Ame kwa pongayikire mbunga pamukuro owo watambo ku Ahava makura atukara mushitanda mayuva matatu. Ani dimburura shi vapristeri mo vakakalire ngoli vaLevi kapi vakalire mo. ¹⁶ Makura ani yita Eliezer, Ariel, Shemaiah, Elnathan, Jarib, na Elnsthan, na Nathan, Zechariah, ntani na Meshullan-ovo vakaliro matimbi-ntani aniyita nka va Joiarib na Elnathan-ovo vakaliro varongi. ¹⁷ Aniva tumu kwa Iddo, timbi wamu Kasiphia na varangekwa vendi vaka mutantere aka tutumineko vakafumu vamwe ovo ngatu yayenda navo ngava karuwane mu ntembeli ya Karunga yayipe. ¹⁸ Munkenda ya Karunga avatutumi mukafumu walidina lya Sherebiah, ntani na vana vendi ro na nta ntatu navaunyavo. Sherebiah kwakalire mukafumu wandunge . Ghuye kwatundire mu lira lya Mahli ntekuru da Levi mona Israel wa mukafumu. ¹⁹ Vavo kwa tumine nka Hashabiah na Jshaiah va mu lira lya Merari, kumwe nalikoro lyendi vakutika ro mbiri. ²⁰ Ava tumu nka vakafumu mafere maviri na vakafumu ro mbiri vaku karuruwana muntembeli ovo a tuliremo David na marenga ghendi va kwafe va Levi. ²¹ Opo pamukuro wa Ahava avitapa mpangero kwetu natuvantje ashi tudililire okuno twe kuna kukudidipita kumeho ya Karunga, tumu rombe atupititire muruyendo rwetu, atupopere navana vetu, ntani novyo twaweka navintje. ²² Ame kwafire ntjoni kuromba hompa vakavita ndi vakuronda nkambe vatukunge kuvanankore muruyendo rwetu, morwa twatantilire hompa ashi; "Karunga wetu kutungika kehe uno amuhuguvaro, ngoli ghuye kugarapera navantjeya vaku muvhurama. ²³ Mpo ngoli twa dililire oku atwe kuna kuraperera Karunga a tuhamene, Ayuvhu ndapero yetu. ²⁴ Ani toghorora vayenditi murongo na vaviri mu vapristeri: Sherebiah, Hashabiah, navaunyavo murongo. ²⁵ Makura aniva shetekere siliveri na ngorodo na maushwi ogho atapire hompa na vapukuruli vendi na marenga ghendi na mbunga ya Israel ashi ngavaviruwanite mu ntembeli ya Karunga. ²⁶ Opo natapire maushwi ghano kuvapristeri ani hovo kughameta, Siliveri adikara tona ro mbiri na mbiri, maushwi gha silveri lifere shiviha shavyo ro nta mbiri, shiviha sha ngorodo mayovi matatu namafere ma ne, ²⁷ marupasha ro mbiri gha ngorodo gha shiviha sha nta ntatu shitwa ne, ntani makende maviri gha ngorodo yene-yene mulyo wayo kupitakana ngorodo. ²⁸ Aniva tantere ashi, "Anwe kwa muhangwira kwa Hompa, Karunga owo vatongamenanga vakondi vetu, na maushwi nka, ntani na siliveri na ngorodo vyo mwatapa kundjambo ya Hompa mu likudjambero lyenu. ²⁹ Vikungenu nawa nakuvipungura dogoro ngamu kavivihe kumeho yava pristeri, va Levi, namatimbi gha lira ghona lya Israel mu Jerusalem mu nkonda da ntembeli ya Karunga wetu. ³⁰ Vapristeri na va Levi avavitambura silveri, ngorodo namaushwi ovyo vavihire nakuvitwara ku Jerusalem. ³¹ Mu mayuva murongo na maviri gha mwedi wakuhova, atutundu pamukuro wa Ahava tu yende ku Jerusalem. Karunga wetu kwakalire petu; Atupopere kulihomono lya vanankore vetu novo vakutuvandera muruyendo rwetu. ³² Opo twa katikire mu Jerusalem atuka pwiyumuka po mayuva matatu. ³³ Muliyuva lyaune mpo twa yendire mu ntembeli ya Karunga tuka vihe siliveri, ngorodo namaushwi nakuvitapa mumawoko gha Meremoth mona mu pristeri Uriah wa mukafumu. Kumwe naye kwa kalire mo Eleazer mona Phinehas wamukafumu, Jozabad mona Jeshua wamukafumu, ntani na Noadiah mona mu Levi Binnui wamukafumu. ³⁴ Vininke navintje kwa vivalire nakuvi viha nakuvitjanga paruvede ndoro. ³⁵ Vantu navantje ovo vaka tundiro kuupika mu Babyloni avatapa ndjambo dakushwakerera kwa Karunga wa Israel: ntwedu murongo na mbiri kuva Israel navantje, vikungwe dimurongo nta ne na ntayimwe, ndjwi ghona dimurongo nta mbiri na ntambiri, ntani na vimpendje murongo navi viri vyakudjambita kundjo. Vimuna navintje vino kwa vishwakerelire ku shidjambo sha Hompa. ³⁶ Avadamuna nka mbapira ya veta yahompa kumarenga nava pangeli vahompa mu Shirongo sha Utokero wa Mukuro wa Euphrates, makura vavo ava kwafa mbunga na ntembeli ya Karunga.