¹ Vaporofete vavipempa vayire kuvantu, ano vashongi vavipempa ngavakaya nka kukwenu. Mukaholya-holya ngavaya nambudi dakudjonaghura dakupira ghushili, ntaninka ngavakananitapo Hompa ogho avashito. Vavo kunakuku yitira naghumwavo lidjonaghuko pawangu-wangu. ² Vantu va vayingi ngavatamburako mashongo naghukaro dona wavo, ntani kupitira mwavo ndjira yaghu shili ngayidjonaghuka. ³ Nankango davo daghumbudi dakuyita lidjonaghuko ngavamupukita. Matokoro ama tengekero ghavo ghapwakare, ano mpanguro yavo pepi yinakara. ⁴ Nkeneshi Karunga kapi aghupilirepo va engeli ovo vadjonino, ano ngoli kwavakandulire kumundiro wanaruntje nakuvakutura mumango dalikurundema dogoro liyuva lyampanguro, ⁵ Ano nkeneshi, Hompa kapi ashuvilire udjuni wandjo, ano apopere Noah morwa ghuhungami wendi, kumwe navantu ntambiri opo ayitere ruhandjo mughu djuni waghurunde, ⁶ ano nkeshi ghuye kwasholire nkurumbara damuSodom naGomorrah dikare mutwitwi nakuvapa matengekero ghakuvadjonaghurapo vikare shihonena shovyo vyashoroko mughurunde, ⁷ Ano ghuye kwa yoghoramo tupu muhungami ghumwe Lot, ogho ahepiro kughukaro dona wavantu vaghurunde - ⁸ muhungami ghuno, kwatungire mukatji kavo mayuva namayuva, nakutjutjupa mukenga kuviruwana dona vyavo - ⁹ keneshi Hompa ndje aruwanino navintje vino, ghuye ayiva mukupopera vahungami muvimpagwa nakutura mumango vadini Karunga ngavawane matengekero muliyuva lyampanguro. ¹⁰ Oghune ghushili kuhamena kuvantu ovovakaro namadovo gharutu nakushentja veta. mukuku nenepeka nakukutumba vavene, vavo kapivakara naghoma pakushentja vapongoki. ¹¹ Vaengeli kwakara nankondo dadinene, ngolivavo nakadidishi kushwaghura vantu kushipara shaHompa. ¹² Vantu vano kwakara yira vikorama vyakupira kughayara, kwavashampuruka mumango nalidjonaghuko. Vavo nakuyivashi vighamba vyavo vyamashwaghu. Ano muvindjonaghura vyavo mo ngavava hanawira, ¹³ Ruhepo rwarudona ndjo mfuto ya viruwanadona. Vavo kughayara ashi ruviya rwamuliyuva ruhafomo . Vavo kwanyata ntani kapi vakushuka. Vavo kupembura kuviruwana dona vyavo pakukarakumwe nanwe mukudjombwana. ¹⁴ Vavo kwa kara na mantjo gharu shonda; waronka nakurorokashi mukuruwana ghudona. Vavo kupukita vadimutjima daghureru mukuruwana ghudona, ntani dimutjima davo kwadideghura mumakurulya. Vavo vana ovo vafinga! ¹⁵ Vavo kwa shuva ku kwama mundjira ya ghuhunga mbyo vatjandjuka, mukukwama ndjira ya Balaam mona Beor, ogho ahoro kutambura mfuto yava vakupira ghuhunga. ¹⁶ Enengoli awana makuyaghuko kughukaro dona wendi--shidongi shakumwena kwaghambire muliywi lyashinaghuntu mukushayikita ghuporofete wamarayi. ¹⁷ Vano vantu makora ghahana mema ndi lime linakutundo kumugogomo. Kaghudi-ghudi kalikurundema kwaka vatulikira. ¹⁸ Vavo ku ghamba vyakuku pandayika. Kupitira mumadovo ghapa nyama, kupitira mumadovo paghuntu, vavo kushongaghura vantu ovo vanakushana kushenduka mukutunga navantu vamapuko. ¹⁹ Vavo kwavatwenyidira limanguruko, ene naghumwavo vapika vaghufuki. Mbyovyoshi muntu kukara ghupika kovyo vyamufundo. ²⁰ Nangeshi vashendukire ghufuki waghudjuni kupitira mughukonentu waHompa namuyogholi Yesus Krisitus nakuku kwatakana navo mukufunda, viruwana vyavo vya ghurunde kuna ku wederere kupitakana vyaku hova. ²¹ Hashako tupu kwavo ndi kapi va yivire ndjira ya ghuhunga, kupitakana mukuyiyiva nakukupora kudimuragho dakupongoka odo vavapire. ²² Vitegho vino ghushili kwavo: ''Mbwa kulya virukivyayo,ano shinguru oshovanakushu kuvyukira mumatata."