¹ Vaghunyande va kuhora, yino ntjangwatumwa yaghuviri nakutjangera kwenu, ano nadintje dakumuvhurukita mukupama mumaghano ghenu ² mposhi muvhuruke nkango nadi ntje odo vaghamba shirugho pita vaporofete vakupongoka kumwe nadimuragho daHompa wetu namuyogholi kupitira muvaapostoli. ³ Pakuhova yivenu vino ashi, vakakushentja ngavaya kumayuva ghaghuhura. Ngavayamushentja nakutwikira kutwara kumadovo ghavo. ⁴ Ngava ghamba ashi, ''ghaningo matwenyidiro ghalivyuko lyendi? Kutunda opo varara vashetu muturo, vininke navintjeya ndavyakarera ngoweyo kapi vyakutjindja, kuda oko lyavarekera lishito.'' ⁵ Kwaku vhuramita ashi shirugho shina kapito nkango yaHompa yaliwiru nalivhu kwakarapo kutunda mumema nakupitira mumema, ⁶ mo ngoli wadjonaghukire ghudjuni paruvede runya, kumema gharuhandjo. ⁷ Ku nkango dakuku fana liwiru nalivu kwavihorekera mundiro, ano mbyo vavipungwira liyuva lyampanguro nalidjonaghuko lyavantu vavadona. ⁸ Kapishi vishenduke mukuvidimburura vino, vaghunyande vakuhora, ashi liyuva limwe naHompa yira mayovi ghamwaka, ano mayovi ghamwaka yira liyuva limwe. ⁹ Hompa kapi akara namaranga kuhamena kumatwenyidiro ghendi, yira momo vavigharanga vamwe ashi maranga. Nani, ghuye kwakudidimikira koye. Ghuye kapi ashana ghumwe papenu akombane, nani ngoli namuvantje mukushighure. ¹⁰ Mpilingoli, liyuva lya Hompa nga liya yira momu ayanga muwidi. Liwiru ngalidongonokapo namuyoyo waghunene. Vininke navintje ngavavi shorapo namundiro, ano livu naviruwana dona vyalyo ngavi tura paghukenu. ¹¹ Mukurenka ashi vininke navintje ngavakavidjonaghura muruperuno, vantumunke ngamukakaro anwe? ghunahepa kuparuka liparu lyaghupongoki naliparu lyashighukarunga. ¹² Karenu muna kuwapayikiri naku didimika, anwe mutaterere liyuva lya Hompa. Muliyuva olyo, liwiru ngavalidjonaghurapo namundiro, ano vininke navintje ngaviyengumuka kughupyu waghunene. ¹³ Ene kutwara mumatwenyidiro ghendi atwe kunakutaterera liwiru lyalipe nalivu lyalipe, oko ngavakakara vahungami. ¹⁴ Mpo ngolishi, vaghunyande vakuhora, yiramomo munakutaterera vininke vino, ruwanenu mpopo muvhulira ngavayamuwane mwahana kavadi namarundiro kumehoyendi, mumpora. ¹⁵ Waro nka, turenu mumaghano lididimiko lyaHompa lyaliyoghoro, yira momo amutjangilire mukurwetu wakuhora Paulus, kutwara kughukonentu ogho vamupa. ¹⁶ Paulus kwaghambire vininke navintje vino muntjangwatumwa dendi, omo vyakara vinke vyaghudito kukwata lighano. Lincenuno lyavantu vakundenga-ndenga vatjindja vininke vino, yira momo vaviruwana kumatjangwa ghamweya, mukukudjonaghura naghumwavo. ¹⁷ Mpongoli ashi, vaghunyande vakuhora, yiramomo mwayiva vininke vino vinamukarero kumeho, kukungenu naghumwenu mposhi kapishi vamu pukukite kuveta daghuntu nakukombanita mapuliro ghenu. ¹⁸ Ene kurenu munkenda naghukonentu waKarunga namuyogholi wetu Yesusi Krisitusi. Ashi ndi ghuyerere ghukare kwendi kunamuntji nakumayuva ghanaruntje. Amen!