¹ Simoni Petrusi, mupika namu apostoli waYesusi Krisitusi, kovo vatamburo lipuro lyaliwa lyakukufana nolyo twatambura, lipuro lyaghu hungami waKarunga namuyogholi wetu Yesusi Krisitusi: ² Ndi nkenda nampora vikuwederere mulishetakano naghukonentu waKarunga naYesus Hompa wetu. ³ Munkondo dendi dashahuru vininke navintje vyaliparu nevi vyaghuKarunga kwavitupa kupitira mughukonentu nashikoda shendi shakutikiliramo. ⁴ Kupitira movino mo atupera maghuwa namatwenyidiro ghamanene, mposhi nanwe mukare vahami mughunankondo waKarunga, nakusheduka viruwana dona ovyo vyatundango kumadovo ghamughudjuni. ⁵ Mukonda yovino, ruwana ghunene mukuwederera ghuwa kulipuro lyoye, ano kughuwa wedererako ghukonentu, ⁶ kughukonentu wedererako likupangero, kulikupangero wedererako lididimiko, kulididimiko wedererako ghupongoki ⁷ kughupongoki wedererako shihoro shaghu kurwa, kushihoro shaghukurwa wedererako shihoro shana vantje. ⁸ Vininke vino nkene avikara nakukulira mumoye, ngavikughupako kukupira kuyita ndi kuyima ghukonentu waHompa Yesusi Krisitusi. ⁹ Ene ngoli kogho vyapira vinke vino kwara namantjo ghakukenga papepi ghuye shitwiku, kuvhurama ashi vamukushura kundjo dendi dakare. ¹⁰ Mpongolishi, vaghunivande, damekenu kuruwana mupameke liyitolyenu namatoghororo ghenu, nkene amuruwana vininke vyangoli, kapi ngamupunduka. ¹¹ Ndjira yino ngayigharura mavero ghaghuntungi wanaruntje ghaKarunga namuyogholi wetu Yesusi Krisitusi. ¹² Mpongolishi, ame nakuwapayikili mukumuvhurukita vininke navintje, mpili momo mwaviyiva, waronka mbyo mwakara naghushiri wakupama. ¹³ Ame kunakughayara ashi kuvingwapera, mpopa nakara shimpe nanwe, nimukora ngede murupe rwakumuvhurukita. ¹⁴ Ame nayiva ashi mayuva gha liparu lyande masheshu ana hupoko, mukondashi Hompa wetu Yesusi Krisitusi avintjorwera. ¹⁵ Kuniruwana mpopo nahulira muruku rwakumushuva anwe munavhuruka navintje. ¹⁶ Atwe kapitwakwama vitimwitira vyamantimwe-ntimwe kovyo twamuneyeda kuhamena ghuna nkondo naliyo lyaHompa wetu Yesusi Krisitusi, enengoli atwe vambangi vaghuHompa wendi. ¹⁷ Ghuye kwawanine mfumwa naghuyerere kuvashe Karunga muruku ropo lyayire liywi mughu yerere lyashighuHompa, nakughamba ashi, '' Ghuno ndje monande ogho nahora, ogho andjendo kumutjima.'' ¹⁸ Atwe naghumwetu kwayuvire liywi linakutundo muwiru ruvede oro atwe tunakara kumwe naye pandundu yakupongoka. ¹⁹ Atwe kuna kara nankango yaghu porofete wakutikiliramo, oyo yimurenkito muvikwate lighano yira shite osho shinakutemo mulivango lyamundema dogoro kukukya kwaliyuva ngura-ngura shitape ghukenu mudimushima denu. ²⁰ Mwanavintje vino yivenu ashi kwato nkango yaghu porofete yakutunda kulifwatururo lyapaghu ntu. ²¹ Kwato nkango daghuporofete dakutunda kumapandero ghavantu, nani ngoli vantu kwaghambanga nkango yaHompa kupitira mumpepo yakupongoka.