¹ Kuandi a salí ri aí i a miní a pueblo ri sí má risipulo a siguílo. ² Kuandi Lonkoló a miní, Éle insiñó andí masiruma rí judio. un chochá a kuchá i kelá enkantao. Ané a chitía: "¿Rí andi Éle tá kujé e má insiñansa? ¿ Ke a sendá e má sabijondo ke ndalo a Éle? ¿Ke a sendá e má milaagro ke Éle asé kú má mano? . ³ ¿Nú a sendá kampintero, e mona rí María numano rí jacob ( santiago), i José, Judas i Simón? ¿Nú a tá má numano akí kú tó suto?" i ané a sendí ofensa pó kuenda rí Jesús. ⁴ Jesús a chitía : "Un chakero rí Rioso tén baló endi to parajé, poro nú endi pueblo rí ele, ni lendro rí e memo, ni lendro ri posa rí éle". ⁵ "Éle poleba nú, asé kusa kú kutú aí nú má poné mano endí gende chakosa i má gende a kulá. ⁶ Má fatá, rí fé rí e má pueblo asombró a Éle. Éle jarriá tó má kaserio insiñanro. ⁷ Éle a ñama má dolingó risipulo i a mandá ané, rí bilingó, a bilingó; Éle ndalo autorírá endi má epíritu puekisusio. ⁸ Indaló rekao ke nú poleba nyebá niggú kusa kú ané pa andí biaje nú ma palo ri bastón: nú poleba nyeba kumina, ni nboso i ni niggú burú endí sinturó, ⁹ poro sí nyebá abakka, nú bítí bilingó túnika. ¹⁰ I Éle a chitía: "Kuandi enú lendra endi aggú posá, kelá ai ata ké a salí pnadí uto paraje. ¹¹ I sí aggún pueblo nú resibí ni kuchá kujé kamino pa uto paraje, sakurí má pobbo rí pie, kúmo perito a ané." ¹² Ané a salí i a kombesá, ke tó má gende teneba ke regobé rí má pekaro. ¹³ Echá juela un chochá rí dianche, i jundá kú manteka, i kulá un chochá rí chakoso. ¹⁴ Takurimbo Erodes a kuchá e kúsa pokke e nombe rí Jesús tó mundo a kunoseba aggú taba chitía: "Juán Bautista a palá rí muette i pó e kusa, e má kutú tá endí Éle". ¹⁵ Úto a chitía "Éle a sendá Elías" Tambié uto a chitía: "Éle a sendá chakero rí Rioso, kumo uto chakero rí Rioso ri uto tiembo lo ké a pasá". ¹⁶ Poro kuandi Erodes a kuchá e kusa a chitía : "Juan, kiene i a trosá má kabea, a palá". ¹⁷ Pokke Erodes memó a mandá a kujé a Juan pa ichá kú karena endí tramakua. Po kuenda rí Erodías (Changaina rí numanos sí Felipe), pué Erodes taba kasaó kú ele. ¹⁸ I Juan a chitía a Erodes: "Bo polé nú tené changaina rí numano sí". ¹⁹ Erodías a poné kondla rí Juan i Kelebá kitambila, poro ele poleba nú, ²⁰ pokke Erodes teneba repeto a Juan , i éle sabé ke ele a senda ombe juto i santo. i mantené a ele a sabbo. Kuandi éle a kuchá a Juan nda má fecha rí Rioso kelaba kú pá nú, poro éle ngutá kuchalo. ²¹ Poro nyegá e ría kuandi Erodías teneba má pocholá rí asé agguú kusa: endí e ría rí jarocheria rí Erodes Éle asé un kumina pa má ofisiales, i tó má kankamajan rí Galilea. ²² Monasíta rí Erodías a miní a saranguiá pa tó ané i é a komplasé a Erodes i a tó má imbitaro. Ló ke taba aí kuméndo.Takurimbo a chitía a majanasita: "Pirí má kusa ke bo a kel+e, pokke i a tá ndalo. ²³ Éle a sé juramento chitíando: "Tó má kusa ke bo a pirí, i tá ndalo, ata merio rí reino rí mí i tá nda bo". ²⁴ Ele a salí i a chitía a maé rí sí: ¿Ké i pole pirí? Ella a chitía: "Kabéa rí Juan Bautista." ²⁵ Rí un bé ané a lendrá kú bilanté a takurimbo e a chitía: "I kelé pá bó nda mi rí un bé endí palangána, kabéa rí Juan Bautista". ²⁶ Takurimbo a poné kú kongojá , pó kuenda rí juramento, i pó mé inbitaro, éle nú polé rejá rí a sé lo ké e pirí. ²⁷ Asina ke takurimbo a mandá un soddao rí éle i ndalo odde ke a tré kabéa rí Juan guaddia a baé i a trosá kabéa rí Juan endí tramakua. ²⁸ Éle a tré kabéa endí palangana i ndalo a majanasita, i majanasita tá ndalo a maé sí. ²⁹ kuchando eto, ma risippulo ri Juan a miní i a Kujé Kueppo ri ele i a poné endi un oyo ri muetto. ³⁰ Má appotole a reuní arerero rí Jesús, i a chitía tó e kúsa ke ané i insiñaó. ³¹ Éle a chitía, "apattena enú memo endi paraje gurilembo, rekanbeno pó un tiembo." Pué un chochá taba miní y taba nbae, i ané nú tomá tiembo apate pa rekansá ni tiembo pa kumé. ³² Ané a bae gurilembo endi bote pa un paraje apattao pó ané memo. ³³ Poro un chochá rí gende a miná lo bae i a rekonosé. Ma gende a kole juntao a pie rí tó paraje, i on yegá ai ante ke ané. ³⁴ Kuandi ané a yegá aí ke ané. Kuandi ané a yegá endi bera, Jesú a guatía un chochá rí gende, Éle teneba kompasion rí ané, pokke ané jueba kumo ma obeja sin pator. Asina ke Éle a empesá a inseñale un chochá rí kusa. ³⁵ Kuandi Juba tadde, ma risipulo rí ele a mini a Éle i an chitía: "E sendá un paraje apattao i aora sendá tadde. ³⁶ Reja ané bae pa kampo sekkano i a ma kaserio i kombla un kusa pa ané kume" ³⁷ Poro Éle a repondé i a chitía: "Nda enú aggu pa ané kume" Ané a chitía ¿Suto polé bae a kumbla rosiento peso rí pan i entregado ané pa ané kume?. ³⁸ Éle a chitía: ¿Kuanti pan enú a ten? salina i guatieno". Kandi ané a poné, ané a chitía: "Kilingo pan i bilingó pekao". ³⁹ Éle a mandá a tó ma gende a sendá po pilita sima rí yiebba biche. ⁴⁰ Ané a sendá en pilita, en pilita rí lingananai kinilango. ⁴¹ Miendra Éle on galá ma kilingó pan i ma biblingó pekao guatiando pa sielo a bendesí i a patí ma pan i an dao a ma risipulo pa tó ané. ⁴² To ané a kumé ata ke kelá jatto. ⁴³ Ma risipulo a recogé piaso rí pan, dolingó rí kanata takio, i to ma piaso rí pekao. ⁴⁴ Aí taban kilingó nananá rí omber kiene kume ma pan. ⁴⁵ Ai memo Éle ase ke risipulo rí ele lendraran endi bote, ané kujeban pandi uto lao ante ke Éle, Asia, Betania, miendra Éle memo repería a ma chochá rí gende. ⁴⁶ Kuandi ané a bae, Éle a trepá a ma montaña a orá. ⁴⁷ Tiembo okuro a yegá i má bote taba aora endi mitá rí mar, i Éle taba solo endi tiela. ⁴⁸ Éle a aguantía ke ané taba luchá kuma remo, pue ma biento taba kondra rí ané. Kumo a kuatta bigilia rí tiembo okuro Jesú a miní Asia ané, jarriando sobre mar, i keleba pasalo ri lagoo. ⁴⁹ Poro Kuandi ané a guattiao jariando andi mar an;e pensá ke Éle jueba un abusajo i ané a fomá una garibia. ⁵⁰ Pokke tó ané a guatialo i tagba sutaó. Poro ai memo Éle a jablá i a chitía: ¡Sendá kú balo! ¡I a sendá! ¡nú tene muero nú! ⁵¹ Éle a subí a bote ku ané, biento a reja rí soplá; ané taba asomblá rí Éle. ⁵² Pue ané nú abia tendio rí ma pan, pokke má mente rí ané fueba mu lento pa entedé lo ke ataba pasá. ⁵³ Kuandi ané a grusá, ané a guatiá ma tiela rí Genesaret i malalon el bote. ⁵⁴ Kuandi ané a salí rí bote, ma gende aí memo a rekonose ke jueba Jesú. ⁵⁵ Ma gende a kolé po merio rí ma region i a empesá a tre ma chakoso endi kamia ronde kiera ke kuchaba ke Éle taba miní. ⁵⁶ Ronde kiena ke Éle lendraba andi kaserio, o siurá endi ma kampo, ané ponia ma chakoso endi mekkao, i taban rogá si solamente porian toca bodde rí su chepa, i kuanti to ané tentá sendá sano