¹ Ané bae pá uto paraje rí lago, endi settó rí ma Gadarenos. ² Kuandi Jesús a baja rié bákka, un ombe kú epíritu puekkisusio a mini a Éle rí ma tumba. ³ Ese ombe a posá endi tumba. Ya narie a poléba a tajá ele ni kú kabua. ⁴ Éle ataba maniao nchochá ri bé kú kabua. Éle a lompé ma kabua, y ma sepo asé emfaratao. Narie a teneba kutú pá mania ele. ⁵ I endi ria asina kumo okurana andi ma tumba i endi monde, éle asé un jarana i á se sajá kú piegra filao a éle memo. ⁶ Kuandi éle a guatiá a Jesús á legua, Ele á kolé i á jimká lande ri Éle. ⁷ Éle jablá endi bo atta: ''¿Ke i tené ke asé kú bó, Jesús, Moná ri Rioso Atto? I rogá bó pó Rioso memo, ke nú atabaná mi.'' ⁸ Pokke Jesús a chitiá ele: ''Sali ri ombe epiriti puekisusio.'' ⁹ Éle á prundá: ''¿kumo ase ñama?'' Éle á chitiá ''i a se ñama legión, pokke suto sendá nchochá.'' ¹⁰ Éle á rogá á Jesús un i uto be ke nú retira ri ese settó, ¹¹ Asina ke kumo un kuagro rí piangulí á kumé endi loma, ¹² ané á rogá á ele chitiando: " mandá suto lendrá ri piangulí; rejá suto lendrá endi ané. ¹³ Éle a rejá a ma epiriti puekisusio, ané á lemdrá andi piamgulí, i á jogaó 2.000 piamgulí andi mar, pokke ané á rebokká loma bajo. ¹⁴ I ma ombe ke á kuilá piangulí á guí a ndá fecha endí uto pueblo i paraje rí to kusa ke pasá. ¹⁵ I kuandi majaná á miní á Jesús ane a guatiá ombe á teneba nchocha ri epiriti puekisusio kiatá bitilo, sendáo i kuguisio ane a sendí miero. ¹⁶ Ané ke a miná a ombe ke a tá fundió pó dianche, kondá a má uto lo ke atá pasá, i tambie chitiá aseka ri má piangulí. ¹⁷ Ané a rogá a Jesús ke baé rí settó ri ele. ¹⁸ I kuandí Éle a subí endi barka, ombe ke taba fundió a miní a Jesús. Ombe a tá rogá ke rejá í kú Ele. ¹⁹ Jesús a tá rejá nú, poro a chitiá a éle: ''bae a posá ri bo i a má gende sí, y chitiá lo ke Rioso asé pó bo, i supliká ké nda.'' ²⁰ Asina ké ombe a bae i nda fecha ri ma ngande kusa ké Jesús a tá asé pó ele endi dakápolis. I tó ané a ta kelá enkantao. ²¹ Kuandi Jesús a krusá uto bé endi barka asia uto lao, ngande chocha ri gende tá miní a ele, Éle taba palao a lao ri mar. ²² Lingó ri má kanbimbante ri siruma ri judio, yamao Jairo,a miní i kuandí guatiá a Jesú, ele a kai endi má pie ri Jesú. ²³ Éle a tá rogá lingo i uto bé, chitiando: ''moná mí chirindiga tá a la lagga. I rogá bo, miní kú yo i poné mano sí i tendá a ele pá saná i pá ele bibí.'' ²⁴ Asina ke Éle a bae kú éle i ngande chocha ri gende a siguí ele, í ané a trinká a Éle a lao sí. ²⁵ Abia aí muje ké a taba chakosa kú flujo ri polá denje ase dolingo año. ²⁶ Ele a taba sufri un chocha nbajo kuilao ri chocha ri mekiro i ele ngata tó burú ke a teneba, poro endi be ri sindí mejó ele a taba peo. ²⁷ Ele a tá kuchá má fecha ri Jesús. Asina ke ele a bae ri tra ri Éle kuandi taba jarreando lendro ri chocha ri gende, i a tendá chepa ri ele. ²⁸ Pokke ele atá chitiá: ''si a tendá chepa si, i tán saná.'' ²⁹ Kuandi ele a tendalo, polao ri ele a palá, i ele a sindí ke kuepo si taba sano rí kusa ke ele a sufrí. ³⁰ Jesús a sindí ke kutú ri Éle tá salí, i Éle a botiá pó lendro ri chocha ri gende i a prundá: ''¿Kiene güé ke a tendá chepa mí?.'' ³¹ Ma risípulo a chitiá: ''miná é chochá ri gende ke a ta trinká bo i bo a prundá: ¿Kiene jüe lo ke a tendá mí?.'' ³² poro Jesús a miná pa tó lao pá guatia kiene a ngaló. ³³ Mujé a sabienda lo ke abia pasao, tubo miero i tetemblando. Ele a kela kayao ri lande rí Jesús i ele a kondá to ma bela belá. ³⁴ I Jesús a chitiá: ''moná, fe si a sana bo. Andá endi pá i kurá ri achake.'' ³⁵ Kuandi Jesú ata chitiá, a miní ma gende rí posá ri kanbinbate rí siruma ri judio, chitiando. ''Moná sí atá lungá. ¿Pokké tá moletá a piacha?'' ³⁶ Poro kuandi Jesús a kucha lo ke ane a chitiá, a chitiá Jesús a kanbinbante ri sinagoga: ''temé nu. Solo kreé.'' ³⁷ Éle a rejá nú ke niggú gende bae kú Éle, númá Pedro, Jakobo i Juan, numano rí Jakobo. ³⁸ Ané a miní a posá rí kanbinbante rí sinagoga. Jesús a guatiá choch+a rí gende kongojá, gende yolando i jipiando. ³⁹ Kuandí Éle a lendra a ma posá, a chitiá. ''¿Pokké ané a tá a kongojao i yolando? Monasita nú lungá, ele ata drumi.'' ⁴⁰ Ané arí ri Éle. Poro Éle a saká a tó ané i ngaló a paé i maé ri monasita i a ané lo ké tabá kú Éle, i a salí pa lendro ri kaposénto andi taba monasita. ⁴¹ Éle a ngala mano ri monasita, i a chitiá: ''Talita kumi,'' ké a sendá, ''moná chirindinga palá.'' ⁴² I rí nbe monasaita a palá i jarriá (pokke a tené dolingó año). Ané tabá asomblao i asutao. ⁴³ Éle a mandá pa ane kayá boka i nú chitiá é kusa. I a chitialó ndá ri kume a moná.