¹ Éle a komensá a insiñá ma é uto lao rí lago. í un chochá rí génde a jundá kú Éle, antonse a trepá endi bákka endi mar, i un chochá ri génde a taba lao rí mar endi kosta. ² Éle a empesá a insiñá a un chochá rí kúsa endi parábola, Éle chitía ané e ma insiñansa, ³ "Kucheno, ma semblaró a salí a semblá. ⁴ Kuandí Éle a semblá ma semía, un chochá rí semía a kai endi kaddume, ma kajambá rí nsulú a miní a kumélo. ⁵ Ma uto semía a kai endi tíela ku piegra, í a kelá pu ensima. í a nase ri nbé i kumo nú teneba tíela pa kujé pa bajo. ⁶ Poro kuandi só a salí, semía a kemá pokke ané teneba raí nú, i a seká. ⁷ Ma uto semía a kai lendro rí malesa i polé kresé nú. Pokke malesa a jogá ma semía ndá fruto nú. ⁸ Ma uto semía a kai endi tiela guena é semía a nasé i ndá fruto po chochá, po trinalingó, po sinalingó i po lingonaná má rí lo ke jué semblao. ⁹ Éle a chitía lo ké ten oreja pa kuchá kúcheno. ¹⁰ Kuandi Jesús a kelá só, génde lo ke taba sékka rí Éle i ku ma dolingo rissípulo a prundá pokke bo sé chitía andi parabola. ¹¹ Jesús a chitía: "A Enú i tán motrá ma míterio rí reino rí Rioso. Í a ma uto í ta chitía endi parábola. ¹² RÍ FOMMA KE KUANDÍ ANÉ GUANTIÁ, SÍ ANÉ GUATIÁ, PORO NÚ TA BÉ, Í PA KE ANÉ KUCHÁ, SÍ ANÉ ENTENDÉ LO KE TA KUCHÁ NÚ, POKKE RI UTO FOMMA SENDÁ, KÉ ANÉ TAN KOMBETTI A RIOSO, Í RIOSO PEDDONÁ ANÉ. ¹³ Éle a chitía: "Enú ta entendé parabola nú? Kúmo ta entendé ma uto parabola? ¹⁴ Ma semblaró ke a semblá semía, sendá a ké lo ke a semblá palabra. ¹⁵ Semía lo ké a kaí jundo kaddume, sendá palabra lo ke jue semblao i kuandi ané a kuchalo, Satanás miní ri nbé i a jutá palabra lo ke jué semblao endi ané. ¹⁶ Ma uto a sendá lo ké asé endi ma piegra ke a resibi ma palabra ku jorochería. ¹⁷ Ané ten raí endi ané memo nú, poro a tá palao, po un tiembo; kuandí asé miní ma botrokolo po kausa rí palabra, ané a sé tropesá rí nbé. ¹⁸ Í ma uto semía sendá lo ke a nasé andi malesa ke asé kuchá ma palabra, ¹⁹ poro ma afán rí mundo, ke engaño rí burú a lendrá i jogá ma palabra, po é kúsa ma semía ndá fruto nú. ²⁰ Antonse ma uto lo ké a kae andi tíela guena, anda fruto po trinalingó, po sinalingó, i atá po lingonaná to lo ke jue semblao." Pokke enú sendá lo ke a kuchá ma palabra i a resibilo. ²¹ Jesús a chitía: "Akaso enú tré un mechón prendío rí lendro rí posá pa poné rí bajo rí baúl ku balentíela? Enú tá kújelo i ponelo endi kandelero. ²² Asína memo ná ta kundilo ke sendá rebelao nú ni ná ngualao ke sendá empenankao nú. ²³ Jesús a chitía: lo ke ten oreja pa kuchá kucheno. ²⁴ Éle chitía: "Paleno tañío lo ke ta kuchá, pokke ku ma memo meria ke enú asé merí a uto ku é memo bo sendá merío i ma. ²⁵ Pokke lo ke ten, tan ndalo pa ten ma, poro lo ke nú ten, tan kita lo ke é teneba. ²⁶ Éle chitiá, "Reino rí Rioso sendá kúmo ombe lo ké a semblá semia endi tíela. ²⁷ Éle ndrumi po okurana i asé lebandá endi ría poro a sabé, kúmo gué semía asé nasé i kresé nú. ²⁸ Tíela asé prorusí lingó glano po e memo. Primó sendá ma oja. Repué ma espiga repué ma nglano mauro. ²⁹ Í kuandi glano ta mauro endi espiga rí nbé éle kujé ma kuchiyo pokke kosecha a miní ya." ³⁰ Éle a chitía: "¿Kú ke I polé kompará Reíno rí Rioso i kú ke parabola polé kombesá? ³¹ sendá kúmo semia rí mostasa, ke kuandi asemblao sendá chírrindinga rí to ma semia semblaó endi tíela. ³² i kuandi asé kresé sendá ngánde ma ke to planda rí juetto, i kú ma rama ngandisíma ke ma kujumbá rí nsulú asé posá, bajo rí sombla rí éle." ³³ Kú chochá rí parabola Éle sebá chitía pá ané entendé. ³⁴ Poro Éle kombésaba a ané sin parabola nú. Aunke repué kúndilo Éle asé chitía to ma kúsa a rissipulo sí. ³⁵ Endi é ría kuandi tadde a miní Éle a chitiá a ma rissipulo: "Tando pa uto lao." ³⁶ Asína ke ané a reja e chocha rí gende, i a yebá a Jesús kú ané, pa andi bákko. Uto bákko a taba kú Éle tambié ³⁷ Í á komensá un ñamola enbejukao kú burruká, i ma ola taba pa lompé lendro rí bákko, asína ke bákko taba yená rí apú. ³⁸ Jesús taba andi popa rí bákko drumindo kú kabea endi mojarika. Ma rissipulo a lebandalo chitiándo: "¿Piacha bo impottá ke suto lungá agué nú?" ³⁹ Éle á depettá. i a rregaña burraká i a chitiá kú mar. "Tené pá." Í ma burruká a kabá i miní kamma. ⁴⁰ Éle a chitía: "¿ Pokké enú tén miero? ¿ Enú tén fé nú?" ⁴¹ Ané taba kú miero po chochá i a chitiá kú ané memo: ¿ Kiene antonse sendá Éle lo ke a chitía a mar i mar a kelá kieto?