¹ Éle a lendrá uto be endi masiruma rí Judio, i taba un ombe ke a teneba mano sí seka. ² Ma génde a guatiá Éle ku ojo penené pa sabé si Éle tamba saná mano rí e ombe endi ría rí lankoló pá polé akusá a Éle. ³ Jesús a chitiá a e ombe rí mano seka: "lebandá i palá endi merio ri ané". ⁴ Antonse Éle a chitiá a ma génde: "¿ Asé kúsa rí bien andi lonkoló a sendá kaiko u asé kúsa ri má; sabba mbila u asé lungá ? Poro ané a kayá. ⁵ Éle a guatiá a enrereró ri ané enjurio, i tribulao po kolasó ri ané ndulo, Éle a chitiá a ombe "tirá mano sí." Éle a motrá i Jesús a saná mano ri éle. ⁶ Asína ke ma Fariseo a kompinchá ku ma Herodianos, kondla ri ané pokke keleba matá a Jesús. ⁷ Antose Jesú a bae ku risipulo sÍ pa endi Mar. Nchochá ri jende a miní trá Ele ri Galilea I Judea, ⁸ ri Jerusalén ,Idumea ma ayá ri Jordan i enrreroró ri Tiro i Sidón. chochá ri jende a kuchá tó ma kusa ke Jesú taba asé asina ke ané miní pandi Éle. ⁹ Jesús a pirí a ma rissipulo sí ke ané ten un bákka pa Éle pa gentio trinká a Éle nú, ¹⁰ Kúmo Éle a saná un chochá, tó ma génde ke a tá chakoso a miní pa tentá a Éle. ¹¹ Kuandi ma epirítu puekkisusio a guatiá Éle, ané a kaé lande rí Éle, jaraniando, í chitiaban:"Bo sendá moná rí Rioso." ¹² Í Jesús a mandá a ané ndá konosé Éle nú. ¹³ Éle a subí andi monde atto, i a ñamá a to lo ke Éle a kelé i ané a miní. ¹⁴ Éle mentá a ma dolingó (a kiené Éle a ñamá apostoles) pá ané polé tá ku Éle i ndá ma fecha rí Éle, ¹⁵ i ten autorirá pá retirá e dianche. ¹⁶ Éle nda nombe a dolingo: Simón a kien Éle a sé ñamé Pedro; ¹⁷ Jakobo, moná rí Zebedeo, í Juan numano rí Jakobo, a kiene Éle a ñamá Boanerges, e kusa sendá, Moná rí trueno, ¹⁸ Í Andrés, Felipe, Bartolomé, Mateo, Tomás, Santiago, moná rí Alfeo, Tadeo, Simón Zelote, ¹⁹ Í Judas Iscariote, kien jueba leita. ²⁰ Antonse Jesús a bae pa posá ri éle, í ma chochá ri génde jundá uto be asína ke ané polé nú kumé un chito ri kumina. ²¹ kuandi ma famia rí Éle a kuchá e fecha, ané a kelé yebá a Jesús ku ané," pokke ané a chitía:" Ele tá soyao." ²² Ma eskriba ke a bajá rí Jerusalén a chitiá:" ke Jesús tá fundio po belsebú", i, "Po ma kambimbante rí dianche Éle a retirá ma dianche". ²³ Jesús a ñamá ané pa lande rí Éle, a chitía ané endi parabolas: ¿ Kúmo polé dianche retirá a dianche? ²⁴ Sí un reino tá pattio ku éle memo, e reino tan pelé. ²⁵ Sí un posá tan pattí éle memo, e posá tan pelé. ²⁶ Sí Satana tan palá e memo, i a tá ribirio, éle nú kapá rí prebalese; sino ke a yegá a fin. ²⁷ Poro narie á polé lendrá a posá rí un ombe kú kutú i jutá ma kusá ri éle, si ombe nu tá malao lingó antose pogra jutá kusa éle. ²⁸ Belá belá i chitía tó má pekaro ri ma pekaro rí moná rí ombe a polé peddona, aún blafemia ke enú a chitía; ²⁹ poro e ke blafema kondla epíritu sando, nukka polé tén peddo, pokke e kupable rí pekaro etteno. ³⁰ Jesúsa chitía e kúsa Pokke ané jablabá, "Éle teneba epíritu puekkisusio." ³¹ Maé í numano Sí a miní i ané a kelá juela. Ané a mandá po Éle. ³² Í un kuagro a miní i a sendá a rerero rí Éle, i ané a chitía: ''Maé sí i numano sí a kelá juela i ané atá buká a bó." ³³ Éle a reppodé: ''¿kiené jué maé i numano mí?'' ³⁴ Éle a guatiá a rereró a ané ka a tá sendao andi nsikulo a rereró rí Éle i a chitía: ''¡Guatiá,a ki a tá maé ku ma numano mí! ³⁵ Asína ké kuakie ké tá asé ma bolundá rí Rioso, e génde sendá numano mí, numana mí i maé mí."