¹ Kuandí Éle bobbé a Kapernaúm repué rí uno rías. Má génde rí aí a kuchá ké Éle taba andi posá. ² Asína ké un chocha rí génde a jundá tanto ke kéla pueto nú, ni endí lao rí puetta, i Jesús a chitía e palabra. ³ Antonse aggún má ombe a miní a Éle í á tre un ombe tieso, kualíngo génde a kaggalo. ⁴ Kuandi ané nú polé yegá aí sékka rí Éle pokke tabá kú un chochá rí génde, ané a kitá ma techo rí ríba andí Éle taba palao. Í kuandi ané asé un joyo, ané a bajá balentíela ku ombe tieso. ⁵ Kuandí Jesús a guatiá fé rí ané, Éle a chitía a ombe tieso: "Mona mí, pekaro rí sí ta peddonao". ⁶ Poro aí a taba aggún rí ma eskriba ke tabá sendao í ané a pensá lendro rí kolasó: ⁷ "Kúmo polé é ombe kombesá é kúsa? Éle blasfemá! Kiene polé perddoná pekaro sí nú á sendá Rioso?". ⁸ Rí nbé Jesús, a konosé endi epirítu sí lo ké ané tabá pensá lendro rí sí. Í Éle a chitía: "Pokké enú tá pensá é kusa andi kolasó? ⁹ Ké a sendá má fasí, chitía a ombé tieso, 'pekaro rí sí sendá perddonao, o chitía: Palá, kujé balentíela sí, i jarria?' ¹⁰ Poro pá enú sabé ké Moná rí Ombe tén autorirá endi tíela pá perddona pekaro", Éle chitía a ombe tieso: ¹¹ I a chitía bo: palá, kujé balentíela i baé pa posá sí. ¹² Éle a palá i rí nbé a kujé balentíela sí, i a baé pa posá flende rí tó enú. Asína ke enú a kelá kú asombro i ané andá ngloría a Rioso, í ané a chitía: "Suto a guatiá e kúsa nú". ¹³ Éle a kujé má, pa andi lago, i tó ma chochá rí génde a miní a Éle, í Éle taba insiña. ¹⁴ Kuandí Éle pasá, Éle guatía a Leví, mona rí Alfeo, sendao andi paraje ondé sé pagá má impueto i a chitía: "seguí mi. "éle a palá i a seguí. ¹⁵ Í kuandí Jesús taba kumédo endi posá rí Leví, un chochá rí kobraore rí impueto i génde pekaora, taba kuméndo kú Jesús i ma rissipulo sí, pokké taba un chochá i ané a seguílo. ¹⁶ Kuandi ma eskribá, kiene gueba Fariseos guatiá ké Jesús tabá kuméndo kú ma génde pekaora i kobraore rí impueto ané á chitía á ma rissipulo: "Pokké Éle ta kumé kú má kobraore rí impueto í génde pekaora? ¹⁷ Kuandi Jesús a kuchá é kúsa, a chitía ané: "génde ké tén kutú endi kueppo tén nesesirá ri mekíro nú, génde lo ké tá chakoso sendá lo ké tén nesesirá rí mekíro. I a miní nú pa ñamá génde guena, I miní pa génde pekaora." ¹⁸ Ma rissipulo rí Juan í rí Fariseos tambá ayunándo. Ané á miní í a chitía: "Pokké ma rissipulo rí Juan í ma rissípulo rí Fariseos sé ayuná, poro rissipulo Sí tán ayuná nú?". ¹⁹ Jesús a chitía, "Polé má imbitáro rí un matrimonio ayuná, kuandí konkolá a tá aí ku ané? Miendla enú tené konkolá kú ané, polé ayuná nú? ²⁰ Poro ría tán miní kuandí konkolá sí, sendá kitao lejó rí ané, í endí é ría, ané tén ké ayuná. ²¹ Nú abé ombe ké asé kusé un píaso rí tela nueba andí bítilo acabao, rí uto fomma ma remiendo asé lompé í é kúsa nueba ta empeora. ²² Nú abé ombe ké ichá nbino nuebo lendro rí mbosó rí kuero akabao. Sí asé é kusa, ma nbino a patí ma mbosó rí kuero í nbino tan pelé í ma kuero tambié. Mejó kujé nbino nuebo í ichá lendo rí mbosó rí kuero nuebo. ²³ Endi ría lonkoló, Jesús á pasá pó aggún má losa kú lingó rí trigo í má rissipulo a komensá a kujé ramá rí trigo. ²⁴ Í má Fariseo a chitía a Éle: "Guatiá, ¿pokké ané ta asé é kusa ké a polé nú endi ría rí lonkoló?" ²⁵ Éle a chitía: "¿Enú a lé lo ké David asé nú kuandi taba kú nesesirá í kú kanatulé, éle i má ombe lo ké tamba kú éle? ²⁶ ¿Kumo lendra ai posa rí Ríoso kuandi Abiatar sendá pagré rí ai i a kumé e pan rí plesensía, ké poleba kumé nú, nú má pagré, i éle ndá un píaso a génde lo ké taba kú éle?" ²⁷ Jesús a chitía: "Sankoló a sendá pá ma génde, nú má génde pa sankoló. ²⁸ Asina jue, ké Mona rí Ombe sendá Ño, tambié rí Sankoló."