¹ Klaramente Epiritú chitiá ke endi tiembo ke a miní aggú jende tan rejá fé i tan palá tañío a faso epiritú kú má insiñansa ri dianche ² endi ngaño kuklinche. Konsiensias ri si tan makká. ³ Ané tan proibí kasaase i kujé kumina ke Rioso a kreá pa kompatí kú asío ri nglasia lendro ri má kreyente kiene a miní a kunosé belá belá. ⁴ Pokke to kusa ke Rioso a kreá sendá kaiko, na ke suto kujé kú asío ri nglasia asé rechasao nú. ⁵ Pokke e santifikao po palabra ri Rioso i ri má orasió. ⁶ Si bo tan presettá e kusa ante má numano, bo tan sendá un buen moso ri Jesucristo. Pokke bo a ta sé nutrio po má palabra ri fe i po insiñansa kaiko ke bo a seguí. ⁷ Poro nú seguí má itoria profana ke changaina karrusiana ta gongorokia. Mejó makania pa bo seguí piaroso. ⁸ Pokke entrenamiento fisiko sendá poko úti, poro pierá sendá úti pa to má kusa. i ten promesa pa e mbila i pa mbila ke a tan miní. ⁹ E fecha sendá ri konfiansa i meresé kompleta aseptasió. ¹⁰ Pokke e po eto ke suto a se luchá i makania kú kutú. Pokke suto a ten konfiansa endi Rioso bibo, ke sendá sabbaro ri to jende, poro apotamente ri má kreyente. ¹¹ Proklamá i insiñá e kusa. ¹² Nú rejá ke niggú jende represíe jubentú ri bo. Mejó se ejemplo pa ané ke tá kreé, endi palabra, kodduta, gongorokó, fe i puresa. ¹³ Ata ke I tan bobé, okupá endi lettura, endi koressió i endi má insiñansa. ¹⁴ Nú obbilá ri dón ke tá endi bo, ke Rioso ndá bo a trabé ri má chakero ri Rioso, kú má imposisió ri mano ri má karrusiano. ¹⁵ Kuirá i asé to e kusa, pa má jende guatiá ke bo ta kresé endi Rioso. ¹⁶ Palá tañío ri bo memo i ri insiñansa. Seguí endi e kusa. Po asé e kusa a sabbá a bo memo i a kiene ta kuchá.