¹ E fecha sendá digno ri konfiansa: Si aggú kelé se pastó, kelé makaneo kaiko. ² Po tando, pastó ten ke se kú juisio. Éle ten ke tené un mujé numá. Éle ten ke tené juisio, ten ke se sensible, oddenao, ke posá ri éle sendá abietto pa uto jende kelá. Éle ten ke sabé insiñá a uto. ³ Éle polé se beberó ri ron nú, ke nú sendá kuentero, si nú ten ke se amable, trankilo. Éle polé se agayou kú burú nú. ⁴ Éle ten ke kuirá bié posá si i má moná ri éle ten ke respetalo i asé kaso kuandi éle chitiá. ⁵ Pokke si un ombe a sabé manejá posá si nú, ¿kumo éle polé kuirá ilesia ri Rioso? ⁶ Éle polé sendá nuebo ri kunosé Rioso nú, pa éle nú yená ri ogguyo i kaé kumo dianche aí kondenasió. ⁷ Éle ten ke tené un reputasió kaiko kú jende ri juela, pa éle nú kaé endi deglasia i trampa ri dianche. ⁸ Má diákono ri memo fomma ten ke se digno ri un palabra nú má. ⁹ Ané polé sendá beberó ri rón nú ni agayúo. Ané ten ke sendá ri belá belá kú konsiensia limpia. ¹⁰ Ané ten ke sendá aprobao, pa siribí kú juisio. ¹¹ Má changaina ri memo fomma ten ke sendá digna. Polé sendá kaluniadora nú. Ten ke tené juisio endi to má kusa. ¹² Má diákono ten ke sendá mailo ri un changaina nú má. Ané ten ke kría bié má moná i kuirá posá si. ¹³ Pokke a ke lo ke asé má kusa bié i tan resibí onra kú konfiansa endi fe ri Kristo Jesús. ¹⁴ I tá kribí to e kusa pa bo pokke kelé bae pronto. ¹⁵ Poro si I polé bae nú, I tan kribí pa bo sabé kumo asé má kusa bie endi posá ri Rioso, ke sendá ilesia ri Rioso bibo, pilar kú sopotte ri belá. ¹⁶ Ten diskusió nú ri ke belá sendá rebelao kú ngande pierá: "Éle a miní endi kanne, jue justifikao po Epiritu, guatiáo po má ángele, jue proklamao andi má nasione, un chochá ri jende a kreé endi Éle i jue yebao endi ngloria