¹ Nú regañá a karrusiano, Si nú esottalo kumo si éle jueba tatá sí. Esotta má majaná kumo si ané jueba numano sí. ² Esotta a má karrusiana kumo mae sí, i má majanasita kumo numana endi to puresa. ³ Onrá a má biura, la ke sendá ri belá belá. ⁴ Poro si un biura ten moná o nieto, rejá ke ané nde muetra ri onó endi posá ri ané primó.Rejá pa ané rekompesá a tatá kú mae ri, pokke asina Rioso a sé komplasé. ⁵ Poro un biura ri belá belá ke a kelá sola a sé poné konfiansa endi Rioso. E siemple a tá pirí kú po oskurana i po to má ría. ⁶ pue má changaina ke sé bibí po plasé nú má a tá muetta, anke ta kú mbila. ⁷ Preriká e kusa pa ané polé sendá sin tacha. ⁸ Poro si aggú ndá pa má famía kú jende ri posá nú, éle a negá fé i sendá pío ke un inkrerulo. ⁹ Rejá kribí endi litta biura ri sinalingó jaño, mujé ri un ombe numá. ¹⁰ Éle ten ke se kunosía po má kusa kaiko lo ke éle se asé, si a kuirá má monasito, i asé resibí má guarumá endi posá si, i a labá má píe ri má kreyente, i a libiá jende akongojao, i a sendá debota a to kusa kaiko. ¹¹ Poro kú má majanasita biura, nu pémiti pa kribí endi litta. Pokke kuandi tan miní jarochería ke asé rebelá kondla ri Kristo, ané a kelé kasá má. ¹² Asina jue ke ané sendá kuppable, pokke reboca primó kompromiso. ¹³ Asina ke ané a se akostumbrá asé na nú. Ané asé bae ri posá endi posá i ané kelá pa sé na nú si nú tambié sendá kuentera i entrometía, chitiando kusa ke nú ten ke chitiá. ¹⁴ Por tanto, I a kelé pa majanasita kasá, pa tené moná, i kuirá posá pa nú ndá opotunirá a dianche ri akusá po ta asé kusa mala. ¹⁵ Pokke agguna a bae pa lao ri Satána. ¹⁶ Si aggú changaina kreyente a ten biura aí famía, rejá pa e yulá pa ilesia polé yulá biura lo ke sendá ri belá belá. ¹⁷ Pemití ke má karrusiano ke se asé má kusa kaiko sendá konsirerao dinno ri bilingó onór, apotamente kú ake lo ke se makanía kú palabra i asé insiñá. ¹⁸ Pokke ta ekrito: "BO NÚ PONÉ BOSÁ A BUEI MIENDLA A TRIYÁ NGLANO" i "MÁ MOSO SENDÁ DINNO RI PAGO". ¹⁹ Nú resibí niggú akusasió kondla ri un karrusiano si nú ten má ri bilingó o trilingó perito. ²⁰ Korrejí pekaró ri lande ri má jende asina má uto kujé miero. ²¹ I ta oddená bo ri lande ri Rioso, ri Kristo Jesús i ri má angeles, ke bo ten ke mantené to e má regla i ke nú ten prejuisio i nú asé na po faboritismo. ²² Nú poné mano ri sí kú rapidé endi aggú jende. Nú pattisipá endi pekaro ri uto jende. Bo ten ke sendá puro. ²³ Bo nú polé bebé apú. Poro bo mejó bebé un chito ri bino po kausa ri estomago i má enfemerá lo ke bo ten. ²⁴ Má pekaro ri aggú jende sendá empernankao i kunosío, i bae ri lande ri ané pa juisio. Poro aggú pekaro a miní repue. ²⁵ Asina memo, aggú obra kaiko sendá empernankao i kunosía, poro má uto nú polé kelá okulto.