¹ Yaca cataca camita yewa imaca, yai yacalé icuerina ya ichulia yasu weneica iteca iri yai ideniecataica macaita iwali yai imaniricate iyacale iwaliwa yasi naléca irini cachainiwa nasána naiwacali iriwa. ² Nanaca yai isana naderi natanáca iriawa choii iyua Mardoqueo imana mawienita irí yai Bigtán yai Teres, pucheiba yasu uwinái yai icuerica yacále, nía icueyeica iwaluanawa nía iwaweyéica imanica bóweri iiri yai icuerica yacalé Asuero. ³ Yá naiwacali isutaca yemiawa nía: "¿Cainacue pidecue pimanica pieripinacue iri yai Mardoqueo iwalisena yai imanirica?" Nese niai asianai uculiyei yasu ibaideyei iri yai nawacali yasu weneicanái imaca iri: "Canácata wamaniri iri. ⁴ Ya naiwacali imaca: "Caina ibaluawa bacha waise ya iricubáwata iwaluacawa capiriculé. Quewa bachawata icha yai naiwacalica ya natanicatena iri iwali mawianita yai nadacuana pinaca Mardoqueo icanapi yai yai quei nachunia nayaca. ⁵ Nía ibadeyeica naimaca iri waiwacali: "Yata Amán yai ibaluacawa bachawaise." Ya naiwacali imaca: "Pimacacue iwaluacawa." ⁶ iwaluacanamiwa yai Amán, ya naiwacali imaca iri: "Cainasica yewa wamanica iri yai asialica yasica cayaberi waicali icáca?" Nese Amán imáca iwawalicuwa: "¿Cainasica cayaberi waiwacali iicaca nuichaniwáa? ⁷ Amán imaca naiwacali iri: " Yasica asieli cayaberi naiwacali icáca yanapina irini, ⁸ pitecue iri yai waiwacali iderica iwálica balesica, ibalesiwacata yai waiwacali iwalirica, abéri cawáyu idéri waiwacali yepunicawa inata idénierica naiwacali yeneiwana iwaliwa . ⁹ Neni nese yái balesica yanacai cawayuca yapinaca iri yawi iicanericáni ya uwinái iwacalicani. Pimacacué iya ibale yai asieli cayaberi waiwacali icáca nacatena iri cayaberi népunicawa yámi cawáyu ináta yacalericuba caica namadaida ipina ipichale ya: Yaca imaniri yai iwawerica naiwacáli iwawacuta imanica iri cayaberi. ¹⁰ Nese ima Amán iri yai icuerica yacále: Aquiele raunamanita pité sisara balésica ya aiba yái cawayuca, iyúca pimaná iri yai Mardoaqueo, yai judioca iyerica chai icapé inuma néni yai icuerica yacále. Picatánica pimeicha yai idérica pima iri iwali. ¹¹ Nése ya Amán yedaca yái balésica cawayu nacai. Yasi icaca Mardoqueo ibalé, ya yacawa yami cawayu inata yacalericuba ima ipichalé: ¡Yácasi imaniri yai cayaberica waiwacali icaca imanirica! ¹² Mardoqueo yepuacaawa icapé inuma néni yai icuerica yacale. Quewa Amán yawa raunamaita icapé nerewa, icuiseidaca isanawa, ibacaita iiwita iwalisewa. ¹³ Amán imaca Zeres iri, imaca iinu iriwa, nía macaita imanubacanái macáita iyúa ichabanawa. Nese nía asienai yalieyeica iwisteise, úai iinu, Zeres náima irí: "Baisitani Maroqueo, yáca idabacawa picalacawa ipichale yái, judioca, camita pidepinatawa ipunita, basisiwata si picalacawa ipichale." ¹⁴ Idecunitacawa itanica yapicha ya nanáca níai yacale icuerianá uwinai ya nateca ráunamaitani ya Amán alede nawacaidayacataleca nayáca umanirica nalí úai Ester.