¹ O'ca toi'önä Jordán aje 'cuättopäji o'ca'a TU̧RU̧HUA̧ Dios ucuocu pä'inö Josuérö: ² "Ȩmi̧ docenö huotöttö, ya̧tȩ pö̧nä̧. ³ Hue'i Jordán aje kä'co päte'ittö Diosttö'inä ttö̧ja̧ttö̧'i̧nä̧ kä'co päte'ö adicuä ttö̧ja̧, ttu̧jä̧pö̧ ttu̧jä̧da̧ro̧mȩttö̧ docenö i̧nä̧ o'qui ttȩma̧ja̧, cutäjätucua mä̧cuä̧ yodo cuä'ätucuäcuome. ⁴ Ja̧'hua̧nö̧ ja̧'a̧ttö̧ Josuémä huopinö Israel ahuaruhuä docenö huotöttö pojopö ȩmi̧nä̧u̧ttö̧, ya̧cu̧ pö̧nä̧rö̧. ⁵ Josué pä'inö: CU̧RU̧HUA̧TU̧CU̧ Dios öäre hueähuä huȩnȩ ȩco̧ca̧ ä'canä 'cuäopätucui Jordán aje kä'co päte'önä. I̧nä̧ o'qui cu'upi'canä huänähui'ö, Israel ahuaruhuä 'cotöttö ya̧tȩcu̧ pö̧nä̧. ⁶ Pi̧yȩmä̧ i̧jȩcuä̧ päiönä ja̧cua̧'a̧ ucututä cu̧huo̧juä̧cuä̧huä̧tu̧cuä̧cua̧'a̧ pä'ö, yodoji mo̧ro̧ päi'omenä cui̧tti̧mö̧tö̧cu̧ jättepomenä: ¿Däje pä'ittö po'qui ido'quimä? ⁷ Cuädätäcuotöjä jahuätörömä: Jordán ajemä 'toi'ina'a TU̧RU̧HUA̧ Dios öäre hueähuä huȩnȩ ȩco̧ca̧ ȩpö̧ 'cuättoi'omenä. Ja̧u̧ i̧nä̧ o'quimä Israel ttö̧ja̧mä̧ 'cuäopönätä̧ ttamöcuäda pä'ö jä̧cua̧'a̧. ⁸ Israel ttö̧ja̧mä̧ Josué hueäjita'anö jȩpi̧nä̧tö̧, I̧nä̧ o'qui docenö o'qui ȩmi̧nä̧tö̧ Jordán aje käcotottö, TÖ̧Ä̧NÄ̧HUA̧ Dios Josuérö hueäjita'anö. Israel ahuaruhuä 'cotöttö ya̧tȩcu̧ pö̧nä̧, ja̧u̧ o'quicu ȩpö̧ 'chi̧nä̧tö̧ ttä'ähuaränä ttötä pä'ö. ⁹ Ja̧'hua̧ta̧'a̧nö̧ Josué'inä rötinö docenö i̧nä̧ o'qui Jordán aje kä'coto, TU̧RU̧HUA̧ Dios öäre hueähuä huȩnȩ, ȩco̧ca̧ ȩpä̧tö̧ Diosttö'inä ttö̧ja̧ttö̧'i̧nä̧ kä'copäte'ö adicuä ttö̧ja̧ ttö̧jä̧pö̧ ttö̧jä̧dä̧ri̧no̧mȩ. Ja̧u̧ i̧nä̧ o'qui jitä pi̧yȩ mo̧ro̧ jubö päi'önä pa̧'a̧. ¹⁰ Diosttö'inä ttö̧ja̧ttö̧'i̧nä̧ kä'co päte'ö adicuä ttö̧ja̧mä̧, Dios öäre hueähuä huȩnȩ ȩco̧ca̧ ȩpä̧tö̧mä̧, Jordán aje kä'coto ka̧cuä̧mi̧nä̧tö̧, TU̧RU̧HUA̧ Dios Josuérö hueinöta̧'a̧nö̧ o'ca juiyönä jȩpö̧ cättädome jubö, Moises'inä Josuerö ja̧u̧ huȩnȩtä̧ hue'inö. Ttö̧ja̧mä̧ jurunänö 'cuä'opinätö̧. ¹¹ O'ca toi'önä ttö̧ja̧ 'cuättopäji o'ca'a, TU̧RU̧HUA̧ Dios öäre hueähuä huȩnȩ ȩco̧ca̧'i̧nä̧ cuä'opa'anä, Diosttö'inä ttö̧ja̧ttö̧'i̧nä̧ kä'copäte'ö adicuä ttö̧ja̧'i̧nä̧ 'cuä'opinätö̧, ttö̧ja̧ to̧tta̧ra̧'a̧nä̧. ¹² Ja̧'hua̧nö̧ ja̧'a̧ Ruben ahuaruhuättö'inä, Gad ahuaruhuättö'inä, Manase ahuaruhuättömä jö'totötä 'cuä'opinätö̧ curä rohuäcuähuä 'chu̧huä̧rä̧nö̧ Israel ttö̧ja̧ tta'ca jo̧mȩnä̧, Moises päinöta'anö. ¹³ Curä ttörohuähuäcuotömä 'cuä'opinätö̧ cuarenta mil ttö̧ja̧ jo̧mȩnä̧ Jericó meje'cacu TU̧RU̧HUA̧ Dios ä'ca jo̧mȩttö̧ ttörohuähua pä'ö. ¹⁴ TU̧RU̧HUA̧ Dios Josuérö uruhuo iyinö o'ca toi'önä Israel ttö̧ja̧ tta'ca jo̧mȩttö̧. Juhuorö kä̧mä̧dö̧ ucuotinätö̧ Moisésrö ttucuotinöta'anö Josuérömä a̧'cua̧ro̧mȩ jubö. ¹⁵ Ja̧u̧nu̧ o'ca'a TU̧RU̧HUA̧ Dios Josuérö ucuocuinö: ¹⁶ "Diosttö'inä, ttö̧ja̧ttö̧'i̧nä̧ kä'copäte'ö adicuä ttö̧ja̧rö̧ ttȩmi̧pa̧ pä'ö hue'i, hueähuä huȩnȩ ȩco̧ca̧ Jordán ajettö ttö̧huä̧mi̧'ä̧cha̧." ¹⁷ Ja̧hua̧nö̧ ja̧'a̧ttö̧ Josuémä hue'inö Diosttö'inä, ttö̧ja̧ttö̧'nä̧ kä'copäte'ö adicuä ttö̧ja̧rö̧: "Jordán ajettö huä̧mi̧pä̧chä̧tu̧cui̧." ¹⁸ Ja̧'hua̧nö̧ hueäu Diosttö'inä, ttö̧ja̧ttö̧'i̧nä̧ kä'co päte'ö adicuä ttö̧ja̧mä̧, hueähuä huȩnȩ ȩco̧ca̧ ȩmi̧pö̧ rä'opächö 'chi̧nä̧tö̧ Jordán ajettömä, ttö̧jä̧pö̧ aje jäyoto jo̧mȩ ttö̧jä̧do̧mȩnä̧ ajemä pä'äji ta'anö huerächi'ö mo̧ȩcuä̧chi̧na̧'a̧, pä'äji pa̧ja̧cuä̧nö̧ mo̧ro̧ a'canä jä̧ji̧ta̧'a̧nö̧. ¹⁹ Israel ttö̧ja̧mä̧ Jordán aje 'cuä'opinätö̧ ä̧cuo̧mȩnä̧ kä̧hua̧ fechamä dieznä. Ja̧hua̧nö̧ 'cuä'opäjä'cotömä Gigalnä rȩbȩhui̧'ö̧ pä̧jä̧mi̧nä̧tö̧ Jericóttömä kä̧hua̧ räopa'acu päte'ö. ²⁰ Docenö i̧nä̧ o'qui Jordán ajettö ttȩmä̧ji̧mä̧ Josuémä rötinö Gilganä. ²¹ Josuémä ttö̧ja̧rö̧ pä'inö: Yodoji mo̧ro̧ cui̧tti̧mö̧'cotö ttä̧'o̧tö̧rö̧ jattepomenä ¿Dä̧bö̧ pä'ö pa̧'a̧ttö̧ pi̧yȩ i̧nä̧ o'quimä? ²² Cui̧tti̧mö̧rö̧ jicuähuäcuotöjä pa̧'a̧nö̧: pi̧nȩnä̧ 'cuä'opinätö̧ Israel ttö̧ja̧mä̧ Jordán aje joächi'omenä. ²³ CU̧RU̧HUA̧TU̧CU̧ Dios Jordán aje jo'ädö icuinö 'cuäcuopätucua pä'ö, ja̧'hua̧ta̧'a̧nö̧ CU̧RU̧HUA̧TU̧CU̧ Diosmä dubora tuhuora'inä joächi'önä jȩpi̧nö̧ ujutu 'cuätopa pä'ö. ²⁴ Pi̧jä̧ ttö̧ja̧ o'catoi'önätä ttu̧huo̧juä̧cuo̧tö̧ Diosmä Ju̧ru̧hua̧ pä'ö, ja̧'hua̧nö̧ ja̧'a̧ttö̧ ucutumä 'cuäopönätä cucuotäcuotöjä cu̧ru̧hua̧tu̧cu̧ Diosrömä.