¹ Mo̧ro̧ päia'a yo̧ö̧nä̧ jä̧i̧ Josué ä̧rä̧mi̧'i̧nö̧, ja̧hua̧nö̧ ja̧'a̧ Sitinttö̧ rä'opinätö̧ . 'Chi̧nä̧tö̧ Jordán ajera'acu, ja̧u̧'i̧nä̧ o'ca toi'önä Israel ttö̧ja̧cu̧, pä̧jä̧mi̧nä̧tö̧ aje ttijähuäcua'a ä'canä. ² Huäbodäcuä mo̧ro̧ 'cuäopäji o'ca'a tturuhuotömä ji'ähue'ö cue'ächinätö̧ ttä'ahuäriyä pö̧nä̧; ³ Ttö̧ja̧rö̧ hue'inätö̧: TU̧RU̧HUA̧ Dios öäre huehuä huȩnȩ ȩco̧ca̧ Diosttö'inä, ttö̧ja̧ttö̧'i̧nä̧ kä'copäte'ö adicuä ttö̧ja̧ Levi ahuaruhuä ttȩpa̧'a̧ to'cuätucuomenä, porö cu̧jä̧tö̧cuo̧mȩttö̧mä̧ cui̧'chä̧tu̧cua̧ja̧ jahuätö tto'ca'anä. ⁴ ucututtömä otomenä ya'ute kilometro jo̧mȩ tö'cöhuächi'önä pö̧nä̧ cui̧'chä̧tu̧cua̧. Tö'cönänömä päcui'ätucuo juo̧ca̧ ȩpä̧tö̧rö̧mä̧, to'cuätucuäcua'a ja̧'a̧ttö̧ tti̧'cho̧mȩ mänä cuieruhuätucua'attö. ⁵ Ja̧u̧nu̧ o'ca'a Josué pä'inö ttö̧ja̧rö̧: yo̧ȩi̧ mo̧ro̧ kä̧mä̧dö̧ surojö juiyönä cujä̧tu̧cua̧ja̧,CU̧RU̧HUA̧TU̧CU̧ DIOSMÄ cuieruhuätucu juäi i̧jȩpä̧cua̧ ucuturumä. ⁶ Ja̧u̧nö o'ca'a Diosttö'inä, ttöja̧ttö̧'i̧nä̧, kä̧'copäte'ö ,adicuä ttö̧ja̧rö̧ pä'inö: 'quiyönä 'chu'ärätucui hueähuä huȩnȩ ȩco̧ca̧, tto̧ja̧ ttä̧'canä ȩpö̧ 'cuä̧cuopätucuaja. Ja̧hua̧nö̧ ja̧'a̧ttö̧ hueähuä huȩnȩ ȩco̧ca̧ 'chuä̧rä̧nö̧ 'cuä'opinätö̧ ttö̧ja̧ ttä'canä. ⁷ TU̧RU̧HUA̧ Dios Josuérö pä'inö: pi̧yȩ mo̧ro̧mä̧ jȩchä̧cua̧sä̧ ucuo i̧sa̧ päcuia'a Israel ttö̧ja̧ tottönä. Moiséscu 'chö̧ji̧nö̧ ta̧'a̧nö̧ ucucu chö̧ja̧'a̧'i̧nä̧ ttu̧huo̧juä̧cuo̧tö̧. ⁸ Ucutä huecuäcua̧jä̧ Diosttö'inä, ttö̧ja̧ttö̧'i̧nä̧, kä'co pate'ö adicuä ttö̧ja̧rö̧ hueähuä huȩnȩ ȩco̧ca̧ ȩpä̧tö̧rö, Jordán aje jäyoto cui̧rȩbȩhui̧'ä̧tu̧cuo̧mȩnä̧ 'quiyönä cu̧jä̧tu̧cua̧. ⁹ Ja̧hua̧nö̧ ja̧'a̧ Josué Israel ttö̧ja̧rö̧ pä'inö: pocu ichi'ö ä̧ju̧cuä̧tu̧cui̧, CU̧RU̧HUA̧TU̧CU̧ Dios i̧huȩnȩ. ¹⁰ Pi̧yȩ 'cuäopa'a topö cu̧huo̧juä̧cuo̧tö̧ja̧ CUÄ̧NÄ̧HUA̧TU̧CU̧ Dios 'cuäopönätä kö̧ jȩö̧mä̧ Cananeo ttö̧ja̧rö̧'i̧nä̧, Hititas ttö̧ja̧rö̧'i̧nä̧, Heveos ttö̧ja̧rö̧'i̧nä̧, Ferezeos ttö̧ja̧rö̧'i̧nä̧, Gergeseos ttö̧ja̧rö̧'i̧nä̧, Amorreos ttö̧ja̧rö̧'i̧nä̧, ja̧hua̧ta̧nö̧ Jebuseos ttö̧ja̧rö̧'i̧nä̧, Cuä'catucu jo̧mȩttö̧ rä'epö icua'a to'cuäcuotöjä. ¹¹ ¡topätucui! pi̧jä̧ o'ca juiyönä kö̧ TU̧RU̧HUA̧ Dios öäre hueähuä huȩnȩ ȩco̧ca̧ ȩpä̧tö̧ Jordán aje ya̧nȩji̧jä̧nä̧ cuättopa'a tocu'äcuotöjä. ¹² jitämä pojopö ȩmä̧tu̧cui̧ Israel ahuaruhuä 'cotöttö docenö huotöttö ya̧tȩ pö̧nä̧. ¹³ Pi̧jä̧ o'ca juiyönä kö̧ TU̧RU̧HUA̧ Dios öäre hueähuä huȩnȩ ȩco̧ca̧ ȩpä̧tö̧, Diosttö'inä ttö̧ja̧ttö̧'i̧nä̧, kä'co päteö adicuä ttö̧ja̧ Jordán ajenä tti̧ja̧do̧mȩnä̧ Jordán ajemä kä̧mä̧dä̧cua̧'a̧, ju'tänättö̧ ijihuoya'inä, dȩa̧nä̧ttö̧ ijihuoya'inä kä̧mä̧dö̧ joächi'äcua'a. ¹⁴ Ja̧hua̧nö̧ ja̧'a̧ Jordán aje 'cuättopomenä TU̧RU̧HUA̧ Dios öäre hueähuä huȩnȩ ȩco̧ca̧ ȩpä̧tö̧, Diosttö'inä ttö̧ja̧ttö̧'i̧nä̧ kä'copäte'ö adicuä ttö̧ja̧mä, ttö̧ja̧ ttä'canä 'chi̧nä̧tö̧. ¹⁵ Ja̧hua̧nö̧ jä̧ji̧ o'ca'a TU̧RU̧HUA̧ Dios öäre hueähuä huȩnȩ ȩco̧ca̧ ȩpä̧tö̧ jäyoto tti̧jä̧da̧'a̧tä̧ ttö̧jä̧pö̧ ä̧cuä̧mi̧'i̧nä̧u̧(Ja̧u̧nu̧ pä̧nä̧mä̧ a̧'ȩnä̧ ja̧'a̧ttö̧ cuähuä'inä rö̧ä̧nä̧ ppöröhuina'a̧). ¹⁶ Ajiya ju'tänättö ijihuoyamä kämädö 'ca̧ȩcuä̧chi̧na̧'a̧ räbä jö̧nä̧ päi'önä. Oto päi'önä Adán rȩjȩttö̧ kä̧mä̧dö̧ Saretán tö'cö jubö, dȩa̧cu̧ttö̧mä̧ Neguev'inä, aje röoto 'cäruhuäbö aje jubö. Ja̧hua̧nö̧ ja̧'a̧ ttö̧ja̧mä̧ 'cuä'opinätö̧ ya̧nä̧ji̧jä̧ Jerico ötahuiyä tö'cönänö jo̧mȩnä̧. ¹⁷ TU̧RU̧HUA̧ Dios öäre huehuä huȩnȩ ȩco̧ca̧ ȩpä̧tö̧ Diosttö'inä, ttö̧ja̧ttö̧'i̧nä̧, kä'co päte'ö adicuä ttö̧ja̧mä̧ Jordán aje kä'co päte'ö kämädinätö̧ rȩjȩ jo̧ä̧jä̧nä̧, Israel ttö̧ja̧ 'cuättopa'anä ji̧jä̧ra̧'a̧cu̧.