¹ Ja̧u̧nu̧ o'ca'a Nun i̧tti̧ Josué hue'inö Sitinttö̧ u̧mä̧tö̧ ta̧ju̧rö̧ yä̧huäinä usäcuähuä ttö̧ja̧rö̧. Päinäu̧: "tätucuijo, topäjätucui rȩjȩ'i̧nä̧, ji̧nä̧ isocu päinämä Jerico ötahuiyära̧'a̧." Jahuätömä johuoröttö rä'opächö 'chä̧nö̧ rȩbȩhui̧nä̧tö̧ Rahab pä'ö micuaju kidepä micuänä iyä'chäcuähuä'ijäju koju isodenä, ju̧huä̧nȩtä̧ rȩbȩu̧ ki̧nä̧tö̧. ² Jerico ru̧hua̧rö̧ pä'inätö̧: Topi, Israel ttö̧ja̧mä̧ ichäjätö rȩjȩ usäu. ³ Jericó ötahuiyä ru̧hua̧mä̧ hueinö Rahabrö jittahuaja pä'ö: rä'epö icui, ucu cuoju isodenä rȩbȩhuä̧jä̧tö̧rö̧, jahuätömä ti̧rȩjä̧ usäu ichäjätö ja̧'a̧. ⁴ Ja̧'hua̧nö̧ ja̧'a̧nä̧ isajumä, jahuätö u̧mä̧tö̧ ta̧ju̧ru̧ dajö icuinäju̧. Isajumä pä'inäju̧: A̧'a̧ ttörö topö ichäjätö. Ja̧'hua̧nö̧ ja̧'a̧nä̧ ttömä jerupajusä tottöqui ichäjätö. ⁵ Jahuätömä täcö rä'opächätö yo̧ä̧sa̧ päia'a, ötahuiyä äpatiyä mö̧ttȩpö̧ ji̧yȩnä̧tä̧. jerupajusä tocuqui 'chä̧jä̧tö̧. Ucumä o'ca päi'önä jurunänö cui̧'chö̧ttö̧mä̧ jahuätörö cui̧rȩbȩhuä̧cua̧jä̧. ⁶ Ja̧hua̧nö̧ ja̧'a̧nä̧ jahuäjumä isode ju'tä o'ipächö dajö icuäjäju pi̧nä̧ju̧ yajutä jojepinä'cua Lino isä'cua dea'a. ⁷ Ja̧'hua̧nö̧ ja̧'a̧ ru̧hua̧ umöhuäyotömä ru'i'inätö̧ Jordán aje re'tächiome päte'ö mänänä. Äpatiyämä mö̧'ȩpö̧ icuinätö̧ ru̧huä̧rä̧cuä̧huä̧ ttö̧ja̧ rättopächö ji̧yȩnä̧tä̧. ⁸ Jahuäju 'cha'ächö topö ki̧'cho̧mȩnä̧ u̧mä̧tö̧ ta̧ju̧mä̧ ji̧nä̧ ä'ocotö pinätö̧. ⁹ Pä̧ji̧nä̧u̧: ttömä huo̧ja̧ju̧sä̧ CU̧RU̧HUA̧TU̧CU̧ Dios i̧yi̧nä̧u̧jä̧ pi̧jä̧ rȩjȩmä̧. Ujutumä yetecunä jä̧u̧jä̧ ucuturumä. O'ca toinä pi̧jä̧ rȩjȩnä̧ ka̧cuä̧tö̧rö̧mä̧ ucututä huecuäcuotöjä. ¹⁰ Ujutumä ä̧ju̧cui̧nä̧tö̧jä̧ CU̧RU̧HUA̧TÖ̧CU̧ Dios aje röoto tuhuoto 'cä̧'ȩcuä̧chö̧ joächi'önä jȩi̧na̧'a̧mä̧ 'cuäcuopätucua pä'ö Egipto rȩjȩttö̧ räcuopi̧nä̧tu̧cu̧ o'ca'a. Ja̧'hua̧ta̧'a̧nö̧ ä̧ju̧cui̧nä̧tö̧jä̧ ucutu jȩ'cui̧nä̧tö̧cua̧'a̧mä̧ Amorreo tturuhuotö ta̧ju̧rö̧ Jordán aje ya̧nä̧ ji̧jä̧ttö̧ , Sehonrö'inä, Ogrö'inä cuä'ö cuicuinätö̧cua̧'a̧mä̧. ¹¹ Pi̧yȩ tä̧ju̧cu̧ ji̧yȩnä̧tä̧ tami'iso'qui jacuättömä yetecue'önä päi'inäu̧jä̧ tujuru'inä juiyächi'önätä̧, CU̧RU̧HUA̧TÖ̧CU̧ Diosmä mo̧ro̧ji̧yä̧nä̧'i̧nä̧, pi̧jä̧nä̧'i̧nä̧ hueö kö̧ pä'ö. ¹² Ja̧hua̧nö̧ ja̧'a̧ttö̧ jitämä ucuturö jä'epäjusä, CU̧RU̧HUA̧TU̧CU̧ Dios ä'ca jo̧mȩttö̧ ppäcuädätöcuattö pä'ö, ttö'inä ucuturu adiunä jȩchä̧ji̧ta̧'a̧nö̧. Ja̧hua̧ta̧nö̧ ucutu'inä chä'o ojusodenä ka̧cuä̧tö̧rö̧ adiunä jȩ'cuä̧tö̧cua̧ja̧. ¹³ ji̧yȩtȩ i̧jȩcuä̧ iyätucuittö, ucutumä tta̧cuä̧rä̧cuo̧tö̧jä̧ ujutu ta̧'cua̧rö̧. Chä'orö'inä, cha̧ju̧rö̧'i̧nä̧, chö̧ja̧hua̧tö̧ u̧mä̧tö̧rö̧'i̧nä̧, chö̧ja̧hua̧tö̧ nä̧tö̧rö̧'i̧nä̧, o'ca toi'önä chahuaruhuärö'inä hua'arettö ttö̧ji̧pö̧nä̧ ppäcuädäcuotöjä. ¹⁴ U̧mä̧tö̧mä̧ ttädätinäcua̧: ¡ujutumä a̧ pä'ätöjä ujutu tö̧ji̧pö̧nä̧ ppäcuäda'attö! Ujutu jȩta̧ pätö jitörö jicuähuoca'a jö̧ttö̧mä̧ ujutumä adiunä jȩtä̧cuo̧tö̧jä̧ jäyä jȩä̧cuä̧huä̧ juiyönä ucuturumä TU̧RU̧HUA̧ Dios rȩjȩ ujuturu iyomenämä. ¹⁵ Ja̧'hua̧nö̧ ja̧'a̧ jahuäju isode kä'co bahuecuatenä isappä jui'ädinäju. Jahuäju koju isodemä ötahuiyä ttoecuä'ca todeunä ki̧na̧'a̧. ¹⁶ Pä̧ji̧nä̧u̧: "tätucui möä'cara'a cudajuächätucua ru̧hua̧ hue'ähuotö ttö̧'o̧cui̧'a̧'a̧cu̧. Juhua'atä cu̧jä̧tu̧cua̧ huäbodäcuä mo̧ro̧, jahuätö ppa̧ttä̧cho̧mȩ jubö. Ja̧u̧nu̧ o'comenätä̧ cui̧'chä̧tu̧cua̧ja̧ cui̧'cha̧ päcuätucua'acumä." ¹⁷ U̧mä̧tö̧mä̧ pä'inätö̧ jahuäjuru: a̧ pätönä jäcuepäjimä jȩti̧yä̧cuo̧tö̧jä̧, pi̧yȩ jȩ'cuo̧ca̧'a̧ jö̧ttö̧mä̧. ¹⁸ Pi̧jä̧ rȩjȩra̧'a̧ ti̧rȩbȩhuo̧mȩnä̧. ucumä ti̧'ä̧dö̧ cu̧nu̧'a̧nö̧ ja̧'a̧ pö̧jä̧ta̧ tu̧huä̧ta̧, isode yaecuatenä ujuturu juicuädinomenä. O'ca toi'önä ji̧nä̧ yo̧mȩtȩ cu̧jä̧tu̧cua̧ja̧, cuä'o'inä, cua̧ju̧'i̧nä̧, cui̧ja̧hua̧tö̧'i̧nä̧ cuä'o ojuisode jacuätä. ¹⁹ Ucututtö ya̧tȩ apate u̧mi̧cu̧ mä̧nä̧ra̧'a̧ räopächöttömä ja̧u̧mä̧ 'corupäi'ä̧cua̧ ujutumä huȩnȩ juitäcuotöjä. ja̧hua̧nö̧ ja̧'a̧nä̧ ya̧tȩ cuoju isode jacuä kö̧ 'corupäi'öttömä ujututä jä̧cua̧'a̧ tote'äcuotömä pätinö ji̧nö̧ jȩto̧ca̧'a̧ttö̧. ²⁰ Ja̧'hua̧nö̧ ja̧'a̧nä̧ ujutu jȩtä̧cuä̧ jicuähuätöcuttömä a̧ pätönä jäcuepinö ji̧nö̧mä̧ huȩnȩ jui'ätötä tö̧ji̧pä̧cuo̧tö̧jä̧." ²¹ Rahab ädätinäju: a̧ päcuinätucumä jȩ'cuä̧tu̧cua̧ja̧." Tätöcui päjäji o'ca'a rä'opächö 'chi̧nä̧tö̧. Ja̧'hua̧nö̧ jä̧ji̧ o'ca'a pö̧ja̧ta̧ tu̧hua̧ta̧ ti̧'ä̧nö̧ rö̧ni̧nä̧ju̧ isode yäecuatenä. ²² Jahuätömä de'ara'acu 'chinätö̧, ju̧huȩnȩtä̧ ki̧nä̧tö̧ huäbodäcuä mo̧ro̧ jo̧mȩnä̧ jahuätörö usätö ppa̧ttä̧cho̧mȩ jubö. Jahuätörö usätömä mä̧ni̧yä̧ o'ca juiyönätä̧ usinätö̧, ja̧hua̧nö̧ ja̧'a̧nä̧ po̧cui̧po̧co̧tö̧ pi̧nä̧tö̧. ²³ U̧mä̧tö̧ ta̧ju̧mä̧ de'ara'attö ppa̧'a̧chi̧nä̧tö̧ Nun i̧tti̧ Josué ö̧ja̧'a̧cu̧ o'cajuiyönä 'cuäopäji huȩnȩ jittäcuinäcu̧. ²⁴ Josuerö jiähuinätö̧: iso päi'önä TU̧RU̧HUA̧ Dios ujuturu iyinö pi̧jä̧ rȩjȩmä̧. O'ca toi'önä pi̧jä̧ rȩjȩnä̧ ka̧cuä̧tö̧mä̧ ye'ecuätö ujuturumä.