¹ O'ca toi'önä Amorreos ttö̧ja̧ tturuhuotömä Jordán ajettömä kä̧hua̧ mo̧ä̧cha̧'a̧cu̧ päte'ö ka̧cuä̧tö̧'i̧nä̧ Cananeos ttö̧ja̧ tturuhuotö'inä Mediterraneo dubora jäyänä ka̧cuä̧tö̧mä̧ ä̧ju̧cui̧nä̧tö̧ TTU̧RU̧HUA̧ Dios Jordán aje joächi'önä Israel ttö̧ja̧ jo̧ä̧jä̧nä̧ pä̧tȩcuä̧nö̧ 'cuättopönä jȩä̧ji̧ huȩnȩ ttä̧ju̧cuo̧mȩnä̧ ttami iso'quinä ye'ecue'inätö̧ ja̧hua̧nö̧ ja̧'a̧ttö̧ ttörohuähua pä'ocotö pinätö̧ Israel ttö̧ja̧rö̧mä̧. ² TU̧RU̧HUA̧ Dios Josué ucuocu pä'inö "aditi ido'quittö nahuodä, o'catoi'önä israel ttö̧ja̧ u̧mä̧tö̧rö̧ tti̧jȩta̧ 'cui'opi. " ³ Ja̧'hua̧nö̧ ttö̧ja̧ Josuemä ido'quittö nahuodä aditinö o'catoi'önä Israel ttö̧ja̧ u̧mä̧tö̧rö̧ tti̧jȩtä̧ 'cui'opinö Aralot möä'cattö. ⁴ Josuémä pi̧yȩ ja̧ pä'ö ji̧na̧'a̧ tti̧jȩta̧ 'cuiopina'amä: o'catoi'änä Egipto rȩjȩttö̧ rä'opinätö̧mä̧, de'a jui̧yä̧jä̧ra̧'a̧ttö̧tä̧ hua'ö icuinätö̧. ⁵ O'ca toi'önä u̧mä̧tö̧ Egipto rȩjȩra̧'a̧ttö̧ rä'opinätömä tti̧jȩta̧ 'cui'ocuotötä ji̧na̧'a̧, ja̧hua̧nö̧ ja̧'a̧nä̧ ppo̧'ä̧tö̧ de'a jui̧yä̧jä̧ra̧'a̧ttö̧ uhuäpächinätömä tti̧jȩta̧ 'cui'ocuotö pi̧nä̧tö̧. ⁶ Israel ttö̧ja̧mä̧ de'a jui̧yä̧jä̧ra̧'a̧ cue'ächinätö̧ cuarentanö a̧'ȩ jo̧mȩnä̧, o'ca toi'önä curä rohuäcuähuä ttö̧ja̧ Egiptora̧'a̧ttö̧ rä'opinätömä hua'ö icuinätö, TÖ̧Ä̧NÄ̧HUA̧ Dios i̧huȩnȩ tteseto'cattö. TU̧RU̧HUA̧ Dios pä'ö ku̧ni̧nö̧ ttä̧do̧tö̧ mi̧nä̧rö̧ chiya pädinäjä̧ra̧'a̧mä̧ topö'inä tottiyäcuotö rȩjȩ cuähuä rö̧ä̧nä̧ kä̧jä̧ra̧'a̧mä̧. ⁷ TU̧RU̧HUA̧ Dios ttä̧'o̧tö̧ tti̧mö̧rö̧tä̧, Josué tti̧jȩta̧ 'cuiocuä jȩä̧ru̧tä̧, mänänä tti̧'cho̧mȩnä̧ jȩttö̧ juiyönä ji̧na̧'a̧ttö̧. ⁸ o'ca toi'önä tti̧jȩta̧ 'cui'ocuotö ppätti'omenä ji̧nä̧ yo̧mȩtȩ pä'i'inätö̧ ttä'ähuaränätä adiunä ppätti'ome jubö. ⁹ TU̧RU̧HUA̧ Dios pä'inö Josuérö: pi̧yȩ mo̧ro̧ emö icusä Egipto rȩjȩra̧'a̧ttö̧ ucutu surojocuächinatu̧cu̧mä̧" Ja̧hua̧nö̧ ja̧'a̧ttö̧ micuome Gilga pä'ö pi̧yȩ mo̧ro̧ jubö. ¹⁰ Israel ttö̧ja̧mä̧ Gilgalnätä̧ ka̧cui̧nä̧tö̧, ttu̧huä̧mȩnä̧ fechamä catorcenä, Jericó mȩji̧yi̧nä̧tä̧ ni̧'ȩcui̧nä̧tö̧. ¹¹ Koro mo̧ro̧ ttu̧huä̧mȩnä̧ 'cuäopinö pä'cäri 'cuäopäji o'ca'a ja̧u̧nu̧tä̧ mo̧ro̧ cui̧nä̧tö̧ ju̧huä̧jä̧ rȩjȩttö̧ cuäcuähuämä pan ppö̧ä̧mo̧cö̧'i̧nä̧, Saridö icuähuä ote'inä. ¹² Mana iremä ja̧u̧nu̧tä̧ mo̧ro̧ beichina'a ji̧jä̧ rȩjȩ cuähuä ttucuäji o'ca'a, mana iremä ja̧u̧ du'huottö kä̧mä̧dö̧ Canaan rȩjȩ cuähuä u̧huä̧ju̧ttu̧ cuinätö. ¹³ Josué Jericó ötahuiyä tö'cö ö̧jo̧mȩnä̧ u cä'epö topinö, ya̧tȩ uborö chutä ö̧jo̧mȩ päte'ö jueönä ö̧ja̧'a̧, ucurä'chu u̧mu̧nä̧ chuäränö, ja̧u̧ ö̧ja̧'a̧cu̧ 'chahui'ö Josuémä jauru pä'inö. ¿ujutucu köjä, tabo iyotucu köjäcö? ¹⁴ Ja̧u̧ adätinö: Yatecu'inä kocösä, ttömä TU̧RU̧HUA̧ umöhuäyotö su̧ro̧da̧u̧ ttu̧ru̧hua̧sä̧. Ja̧'hua̧nö̧ ja̧'a̧ttö̧ ichäjisä. Ja̧'hua̧nö̧ pä'a ä̧ju̧cuo̧mȩnä̧ Josuémä ucuotö jä̧rȩyu̧ pä'i'ö i'ä rȩjȩ becuächönä pä'ö jö̧ttö̧mä̧? ttö̧mä̧ cu̧mö̧huä̧ya̧sä̧. ¹⁵ TU̧RU̧HUA̧ umöhuäyötö su̧ro̧da̧u̧ TTU̧RU̧HUA̧MÄ̧ Josuérö pä'inö: cu̧jä̧pö̧ isäya ko̧'ä̧dä̧cua̧u̧ icui ju̧huȩnȩ ucu cu̧jä̧do̧mȩmä̧ ttö adihuä i̧sa̧ chö̧jo̧mȩ surojö juiyome ja̧'a̧, ja̧hua̧nö̧ ta̧'a̧nö̧ ö̧jä̧pö̧ isäya ko'ädäcuäu icuinö.