Juan_HRomeroC-pay_rom_text

Capítulo 10

¹ Arkiwas, ta turusan eñama Patatishta akapa arí toh ekaleró, to onlertipiró. ² Akẽsh tasma ñahawá to erña tõrishkiã ima akatiwa ishkera to Patatishtaró, akãró inkertarií i amẽshkerma. ³ Inkén ekalerma Patatishta justiciaro ari'lertuwã, i ekalerma tõ'ñarp prohaishkerwá to justiciaró, Ekalerma chẽ artokertirii Patatishta justiciaró. ⁴ Inkén to Cristoma tõ'chẽkii to leyró justiciariró kri talerma yarñelerpiró. ⁵ Akẽsh Moisésma tõ'rõ ñehí kakurski to justiciaró ima ley ña chi'te'kuá: "TO ARWÃMA JUSTICIA LEY ÑA ISHKUAMÁ, JUSTICIARISHKI CHIPE". ⁶ Akãró to justiciama fe ña chi'te'kuama ima iró ñe'wã: "PITURUSAÑA'MA ÑAHURU: ¿TARÕ PIRIÑA TAWE'PISA?" (Imaii Cristo ki'lera mono'kerpiró) ⁷ In ñe'tuwã: ¿TARO SHO' CHREWÃÑA CHRE'PISÁ?" (Ima iĩ kaa Cristo tawe'haí to aro onniapishkerña). ⁸ Akãró, ¿inkén ñe'wá?: "TO KAPASHKAMA KE ERÑÁ PAÑÁ AAKI, PISÁPAÑARO PI TURUSÃ'ÑÁ". Ima tõ'ñaí to fe kapashkará, akãshkuá untasma wa'parwá. ⁹ Akẽsh kẽ pama pisapayó ñehiyó a Jesúsro Señor ke narií. Piturusãña yar ñehima, ke Patatishtama onni apishkerña kaishpaki, pama pi en ka'pá. ¹⁰ Akẽsh pi turusãyoma yo arwãma justicia yar ñehí, asapayoma ari'hupé to chipiró. ¹¹ Akẽsh to kakorskama ñe'wa: "TÃRÓ KRI TÕ'MA EKAÑA YAR ÑEHUMA IMA AKATIPAR TUKERTIPÉ". ¹² Inkén akuana chituwã to kra judío i griegorí. Akẽsh Señormá ekaí, Señor kri'ro e'i ima nonhí tãró krí tõ'ma akapẽumá. ¹³ Akẽsh "KRI TÃRO TÕ'MA AKAPẼUMA TO SEÑOR APINYÓ IMA CHIPE". ¹⁴ ¿Akãshkuá inkenkií akape'pisá Ékaro, to ekañama yar ñe'lertirií? ¿Akenma ekalerma Ekaña yarñehí, tãró ekalerma wẽshkertirií? ¿Akén ekalerma pitatish ñaha kapash kerturikí ima wẽshkerwá? ¹⁵ ¿Akashkuá inkenka ekalerma pitash ñaha kapash kerpisá, akinama katunlermá? Tõ'kenma kakorskaí: "¡IMA EÑALERWA PESHTA TO EKAE'LERWA TAÑA ARARI WÁ'LERWA WESHKÁ YAS EÑAMA!". ¹⁶ Akãro kri eká talermá evangeliaro wẽshkrí. Akẽsh Isaías ñehí: "SEÑOR, ¿TÃRÓ YAT ÑEWA'SA AÑAHÁ UNTASTE E'RO?" ¹⁷ Akén to fe'ma wẽshkaña te'kuá, Cristo wẽshka kapashkaró. ¹⁸ Akãro tas ñahawá: "¿Ekalerma wẽshkertirí?" oô tõ'ñama. "TO WẼSHKAMA KUK KRI'ÑARÓ CHIRA APASKRI PESH KAPASHKAMA KUK PITENTA ÑARI". ¹⁹ Akén tas ñahawá: "¿Israelma ari'tií?" Kí Moisés ñehí: "TASÑA TA'KAKAPA TO AKATIWARO I PESH WRIHA I KÃÃ TÕ'ÑAMA CHILERTURÓ, KÃA UYA ARA CHILERO AMẼSHMA ARI'LERTUWÃ, TASÑA AKAIPA TA'KAKAPÁ". ²⁰ Akashkuá to Isaíasma aña'kapok ñehí: "TASMA TO EKALERWA TA ARTAPUKRI TAPROLERTIRIÍ. TASMA KARAPASKARIÍ TÃRÓ TARKAPẼ'LERTIRIMAA TASRÓ". ²¹ Akãro to Israelma, Eka ñe'wã: ÃN AS KRI TASMA TASAWÁ ISHPAKARI TO PESH WRIHÁLERÑA TAÑA' WẼSHKERTURO I ARPESHKERWÁ".