¹ Tishki ke akashkua Jesús ke yakii ñehí i yas nehí, ti'kakít eka arbaktaleró: ² "Pawai arihlera ke wãpé ân pokpes chuwa ke ã pascua, i'ka arwã aye'ma ke wishkerpiruwa ke ani pehña prakpishkera". ³ Akashkua toh asán âânta parehlerí i'ka wãwã lerwa ã pesh wriha atawehra toh kaô uya ñá ã parêh chuña, Caifásro arwani. ⁴ Ekalerma ameshka ishkri inke akií sukuklerpiro Jesúsro katira i'ka amaskerpiró. ⁵ I'ka ekalerma ñehleruri: "Tohkema hố akes aôhrriachẽ ripé ani taishtakera i eilertuña pesh karihró". ⁶ Inkatama, Jesús ââkiri aniña Bataniaña Simón el Leprosa akaôña, artesaña na arkatakí, ⁷ Korta as abriña na ââkí ani batén aõh asyó aôhwakeña asãna muhí tohyó. ⁸ Akashkua Eka a arbakta chelerma, akailera ñehleri: "¿Irish tohke akasnewasa? ⁹ Irish aôhwa kii ukche'tihisa platoyó akes kawishpiró ata ôhsileri". ¹⁰ I'ka Jesúsma ke arihike, akes ti'kakií: "Irish tohke kiañawisa i kortaí? Ekama enro ishkua Tasrish. ¹¹ I'ka chipe ôhsiwa pakerañawa, akes Tasma chẽ tachautipiwa. ¹² Akes akashkua ekaña tarawarkua tapeshña toh ungüento, Ekama kií taôshkerpiraras. ¹³ Tohkari ta'kakaawa, pia pia ñehlerma i evangelio i kuki karihroña, ke arihlerpe ā kortaí ñehpiro toh ishkiro". ¹⁴ Akashkua as toh ukua pok lerí, apima Judas Iskariote, neí parêh asã ââtaña. ¹⁵ i'ka ñehí: "¿ke kawishpirií?" Ekalerma artamihri ukua maí plataro ā Ekara. ¹⁶ Akes tohchẽ, ekama prohí inke akií kawishpiro. ¹⁷ Inkatama, i'ka achēpe toh pan sin levadura akes toh arbakta lerma te'kera Jesúsña ñehrí: "¿Pia kaapisá toh sira aôrríachẽ?" ¹⁸ Ekama ti'kakií: "Nauwa kahá uyañá arwã tis ta'ka kakauwãwĩ: "Ata kachawishta ñehwa: "Ta êhma ke bak tishkua. Aôhiriía celebrahka'pa pi kaôña tarbakta leryo". ¹⁹ Akes toh arbakta lerma akē ñehrí Jesús ti'kakiike, i'ka arkapehri ā sira aôhrriachẽ. ²⁰ Ke kakaña tishkuama, Ekama achihí e'í pesh arbakta ukua pok leryó. ²¹ I'ka êhler tisña ti'kakii: "Yarró ta'pikapawa as pakeñalerña tasukuhi tawishpé. ²² Ekalerma amesh tawarkrí akes âsá sas aekapé akapehrí: "Tas tanhí, ¿Señor? ²³ Ekama kakawarki: "Ata asawa akastakua akaña tasyó Tohña tawishpé. ²⁴ Eka arwã aye'ma nepé, toh kakoskaña ñehuaké ã Ekaro; "i'ka ¡toh arwãma kawishpé ã arwã aye'ra! Akes eña rishki toh arwãama chiti'rishkí". ²⁵ Judas, toh wishpirima ñehí: "¿Tasra tí, Rabí?" Ekama ti'kií: "Pa aekapé ti akíia". ²⁶ I'ka e'lertisri, Jesús pan sukuhí, arñehi kawishki. pesh arbakta kawishkí ñehí: "Tokuwa auwa i'ma ta pesh í". ²⁷ Ekama copa as sukuhí kaparen ishkí, kawishki nehí: "Tokuwãwĩ, pa karihro". ²⁸ I'ka ima ta uriî i pacto derrama ishpaí pa karihroña akes perdona ishparo toh en ishkertuí. ²⁹ Akes Tasma ta'pikapawa, i'ka wartapehí tohtapá i awa de la vid ani ae' tishkuatani wartapehí asken payowa ani ta tus a reinoña". ³⁰ Akashkua ani areshkrichẽ toh himno as, nerih ã waha olivoña. ³¹ Akashkua Jesús ti'kakií "Pa karihrrówa tisteshkupiwa tasrrish, i'ka Kakoskaiké: "ARPISHPÁ Ã PASTOR I AKES A OVEJA DE REBAÑO LERMA TROKERPÉ". ³² I'ka akes wartapehí wakatishkama, napa ki'tishka payowa Galileaña. ³³ Akashkua Pedro ti'kií: "I'ka kari'ro tistechelerikia Parish, tasma i tisteshtapá". ³⁴ Jesúsma ti'kií: "Varish ta'pikapá, inkata kakaña totoni wa'tutewa kasaupé kri' mai". ³⁵ Pedroma i'kií: "I'ka ôhnarawa, payó, pi kasatapá". Akes ā akua arbaktalerwa tohkepe ñehrí ³⁶ Akashkua Jesúsma neí arbakta leryo ã kuk apia Getsemaní ti'kakií toh arbaktalero: "Achahuwãwĩ iña inkatapemaâ tawa ataña naâ arñapana". ³⁷ Kawaki Pedrorí i'ka Zebedeo aye' pokleriyo Ékayo akes wãpe amesh tishki. ³⁸ Wãripé ti'kakií: "Ta kuasama karesh amesh ââkí, i'ka ôhnachá Ña ââkupiwa tasyo chaupiwa". ³⁹ Neí atesrí yuni awapak akakehkií arñehi ñehí: ñalikenaripe. ⁴⁰ Te'ki ã arbakta ââkriña te' kawaski ôkri'rró, i'ka ti'kií Pedro ró: "¿Irish ahirutuwawichere tasyo asken hora as chaní? ⁴¹ Chẽ' arñahuwa tokutipiwaró ã tentaciónña. i'ka Eka akuasama en ââki, akes ã yukuma a'tapuntuwá". ⁴² Ekama wartapehi kri' pok tisteshkí na arñehpiró; nehí: "Tus, tasña tukteshtuma i capo tohpai, tohkenama pi añahripe". ⁴³ Ekama wartapehí te'kachẽi ôka ishkriña, pesh wa atenarish. ⁴⁴ Akashkua nei kakasteshki wartapehí; arñehí kri' mai kií ti'kakií wartapehí tohkepé. ⁴⁵ Akash kua Jesús te'ki ã arbakta ââkriña ti' kakií: "¿Atewata ôka ishkiñawini krak piki'wahá? Chauwá ke ae' tishpiruwâ i'ka arwã aye'ma ke wishkerpiruwaké ani pecadores pesh sawaña. ⁴⁶ Ta ishtakuwa naparwãwĩ, Chauwa, ata" Ta wishpima ke bak te'kua". ⁴⁷ I'ka atewata kapaski ââkuari te' boni Judas as rií ã ukua pok lerií Pesh wrihá as toh parêh asã aâhta leró i'ka wãwã kahachata te'krí ekayó te'kti pehyó i0ka isparayorí. ⁴⁸ Akes ata arwãi Jesús kawishpirií ke ti'kakiwa ââki, ata' ônnâsh paí Eka tohyaí tikuwãwĩ". ⁴⁹ Wãripé te'ki Jesúsró ti'kií: "¡Aunñehí, Rabí! I'ka unnashkí. ⁵⁰ Jesúsma ti'kií: "kole, ishku toh ishkupií ña". Akashkua ekalerma te'kera, akes pesh sawayó sukuhlerá. ⁵¹ Akes, as apaskí Jesús arbaktaâ asawa tunhi a ispara paskí taskí asunro parêh arbakta asro. ⁵² Akashkua Jesús tiki: "Enkau toh isparaa, sika atas taró sucuhuama ispiraâ tehma inpe ã ispararish. ⁵³ ¿Tasma arihá wãwĩ ta tus arñahama, Ekama ta túnhirishkí akua pok legiones de ángeles leró? ⁵⁴ I'ka, ¿Inke akashkua yar tishpisa toh kakoskaí ima yar yishpiraí?" ⁵⁵ Akes tohchepe Jesús ti'kakií ā kanihró: "¿Apaskiñawi isparayowa i'ka péhyori ñas takaupiwara untróktaké? Achana kapan kapan kaô kachawishkaña, i tatiker tihí. ⁵⁶ I'ka i karihroma tishpe ā kakeskri toh Profetas aê' chepe". Akes, ã arbakta kariho lerma akasteshkera trokrí. ⁵⁷ Ata' tikrima Jesúska pakrí toh Caifás ã sumo parêh ria, ã escribas lerña toh wăwãlerna ke atawêhra ââkriña. ⁵⁸ Akes toh Pedroma karahrí haki neí ã parêh akaô briña toki achihi asken toh chanaleryó chemiro pía riekana el veredicto. ⁵⁹ Inkatama ata' asã aâhtalerí parehá karíhrró atawẽlerá prôlerá warkua ishkua ishkierkana Jesúska, tohke kira amaskerpiró. ⁶⁰ I'ka i paskertihi, karêhma weh apaskri kaselera. Akes pok te'kri. ⁶¹ I'ka ñehrí: "I Arwãma ñehí: "Toh Patatishta akaôma bokcheharawa akes ãn maí kií ishpakarawa". ⁶² Ã sumo parêhma taishtaki ti'kii: "¿Ima i akachituwa? ¿Irô ñehlersa Paro ti'pikira?" ⁶³ Akes Jesúsma i ñehtihí. I'ka ã simo parêhma ti'kií: Ta'pikaâwa ã Patatishta chuwa, ta'pataku pariekana toh Cristo, Patatishta a Ayeâ". ⁶⁴ Jesúsma akawarkí: "Poña ñehpia ke, inkatama yarhí chaupe toh arwã ayei achi'piña a tus a eñake, te'kuache wana'keraña piriña a chií". ⁶⁵ Akashkua toh sumo parêhma a iña ayasti ñehí: Ekama ñehua warkuaró. ¿I'ka atewata arihró chuwa? Chauwa, inkatama weshkiñawĩ toh warkua ñehua. ⁶⁶ ¿Inke ameshkiñawisá?" Eka lerma akawarkri ñehlerá: "Ekama tohkema ônpé". ⁶⁷ Akashkua archunera awatapákñá toke ki'lera arpishkri, bofeteâ ki'ri. ⁶⁸ Ti'kira: "Profetizanos, Paí Cristo ¿Taña pi pishkuasa?" ⁶⁹ Pedroma karãhrí ach'irí, kawarta as te'ki ekaña ti'kií: "Pawa aâkuri asken Jesús de Galileayó". ⁷⁰ Akes ekama karkasei i karihró aâkriña, ñehí: "Arihtawã irô ti'taki iñawi ekana". ⁷¹ Akashkua eka apaskuari kusapa takiké, kawarta as cheí lehí ã aâkrihró aña: "I arwãma asken aâkrichi Jesús Nazarenoyó". ⁷² Akes wartapehí ekama karkaseí: "Toh arwãma arítawã". ⁷³ Bak tishkua kií toh aâkri abriña te'kera te ti'kiri Pedroró: "Arihparwa askena ria ekayó, i'ka askena riawĩ". ⁷⁴ Akashkua, ekama ña' warkuaro ñehí, "Tasma arihtawã toh arwãma", akes wãripé totoni areshkí. ⁷⁵ Pedroma a'taâki toh Jesús ti'kiwa aâki añahyó: "Atewata totoni areshtutewa kri'mai kasaupé". Akashkua apaskí neí aka'ni wô kií.