¹ Akashkua toh reino piriña anikena ata kuk aiwake apaskí tiskrirí kapa'ni prôh piró Katún ishta eka aniña a katún. ² Tikirí artaâki eka akatuishtayó katamihpiro denario as ã asri, katuhi eka akatúnña. ³ Wartapehí apaski bak tishkua inkatape taweh mairi chẽi akua katún ishtaleró bakapúh aâkri mercadoña. ⁴ Aró ti'kakií: Pawa naupiwa tas takatúnña pi tamihpawa eñarí. Akes nerí katún ishkerpiró ⁵ I'ka wartapehí apaski bak tishkua inkatape a taweh serarí, akes wartapehi taweh tash, tohkepe ishki. ⁶ Wartapehí apaski bak tishkua inkatape taweh ukua Kartapuki akua tis bakapúh aâkri: Ti'kakií: ¿Irish aâkiñawĩsa ñá, i ãhar bakapúhrí?" ⁷ Ekalerma ti'kakií: pawa naupiwa toh katúnña. ⁸ ke kakaña tishkí, toh katún aiwama ti'kakií eka arwartaleró: Karwanu wãwĩ toh katún ishta leri katamihuwãwĩ pesh platôâ, ke ishkuwãwĩ toh tiki ta wãpe akes toh ki'lerma súk kawishkupiwa. ⁹ Akes chelerma toh katún istaí toh kaprôhwaâkri a taweh ukua, âsá sâs sukúhrí denario as. ¹⁰ Nabolerma a Katún ishta ki'lerí, ameshkri weh kalwishkerpike cherí, akes ekawa kawishkri denario asã sâs. ¹¹ Ke kawishkerma pesh platohá, tawarkri toh katún aiwaña. ¹² Ñehrí: Toh Katún ishta súk na bolechi tohma taweh aspes katún ishkerchi, i'ka asken patakilechi pañaâ, akes karesh ishbarchi atena ā âhar pataôkuai tasehiskua. ¹³ Toh aiwãma kakawarkí: ti'kií toh eka asró: kolêh, tasma i warkua pi ka'tawã. ¿i'ka pih taaktuwa denario as ñahbarchí? 14 ¹⁴ Sukuhü papehpero nau pi tarke; tas nahake kawishpa teh katün sshta sük kapröhachiwa pakenai. ¹⁵ ¿Tohkena tanhi i ishkama tas takachuyó? ¿Envidiaro pikachuni tas eña rás? ¹⁶ Akaro toh súk lerma tohta ki'lerpé, toh ki'lerma súk tish kerpe". ¹⁷ Tohña aâkiri Jesús na tawehí Jerusalénña, akua kawaki ā ukua pok leri, ta'ña nei ti'kakií. ¹⁸ "chauwãwĩ, tawehapé Jerusalenke, ake arwã aye'ma kawishka ripe a asã a'ta parehlerí i'ka escribasleri. Ekaña amaskerpé. ¹⁹ I'ka Kawishkerpe a Gentiles lero anî ki'lerpiro redículo, arpishkera peh akapak prishkaña pehí tukerpiro. Ake ân maiña wakatishpe". ²⁰ Akashkua pesh kakí Zebedeo pesh yeâ Jesúsña te'ki eka aye'leyó. Ekama te achahñope te'ki Ekaña té akapei ani wishpiro. ²¹ Jesúsma ti'kií: "¿Irô pirasâ? "Ekama ti'kií: "Ta yerwã pokta katúhkupiro achih lerpira âs a eñaké paya inka asma ayarwiké, pi reinoña". ²² Akes Jesúsma akawarki ti'kií : "Pawai i arihlertuwã iró kapehleasrí. ¿Pawas en tokupiwati i copai ke tishpi ishkua â tohpai?" Ekalerma ti'kiri: "Tahpara parwa". ²³ Ekama ti'kakií: "Yarti, tokupiwati ta copaâ. Akes toh achi'lerpima ta sawa a eñaké i'ka ta sawa ayarwikema taste tanhi inke Kawishparo, i'ka tohma tani pechei ata ta tus en chelerí". ²⁴ Akashkua weshkerma ata arbaktaleri ukua, akairi toh aârki pok yó. ²⁵ Akes Jesús karwani Ekaña ti'kakií "Pawai arihlera toh asã a'ta Gentil lerí Karesh pesh ña âhkai, i'ka toh arwãleri karesh añah Kaweshkera. ²⁶ Tohkena tanripé payowarí, Akes, taro âhka tishpirishkuama iña payowarí tas ripé, ²⁷ Taro Ki'tishpirishkuama iña payowari tas ripé. ²⁸ ) Akes toh arwa ayea te'ki akatún ki'lertipiro, te'ki ekaña ki'piró, i'ka kawishpiró en cherpiro a karihró". ²⁹ Tohña aaki apaski Jerico'ke, baki neri wehrí. ³⁰ Te'kera awa achelernu pok achi'ra ta' briña. akashkua weshkera toh Jesús tu'keska ishkí tohña, wahrí, ñehrá: "¡Señor, David ayeâ, Patas iña ôhsi chaparwa!" ³¹ Akes toh pesh wrihama kakawarkri, ti'kakirá i ñehlertipiro. Akashkua, ekalerma karesh, tapura wahlerí, ñehlerá: "¡Señor, David ayeh, untasma ña ôhsi chaparwa!" ³² Akashkua Jesúsma tesh'ki aâki karwani ti'kakií: "¿Iro ishka payowai?" ³³ Eka lerma ti'kirí: "Señor, untawa ataprinhí. ³⁴ Akashkua Jesús, ôhsi kachẽi, Kapenhí pesh wa, waripe ekalerma peshwa taprinteri i'ka baki nerí.