¹ Toh chema Jesús kaôña apaski neí achibi teke briñá. ² Pesh wrihá wéh atawehlerá arwachinrí, akashkua take puroñá toki achihí. Akes karihró ââkrí playañá. ³ I'ka Jesúsma keresh ti'kakií parábolayo. Eka ñehí: "Iña, katishta âs apaski tishkí". ⁴ Akes eka tishkuama, awa tish taehrí ta'briña, i'ka kuâs te'kera tohkrí. ⁵ Awa akuama taehlerí kuk sâ acha achahñá, kuk chẽ akachituñá wãpéh tawehlera kuk chẽ akachitihirás. ⁶ I'ka an apaski, tasâhcherí apis kakachitihirás, arsh ticherí. ⁷ Awa akuama taehlerí peh siki kerañá. Peh sikiama tawehlera ôhsi kakihrí. ⁸ Awa akuama taehlerí kuk eñañá wanerá awa, asma awa âs archá, asma ukua tawak, i'ka asma ukua mai. ⁹ Atah suntapak akasuma, weshkí. ¹⁰ Karbaktama te'kera te ti'kiri Jesúsró: "¿Irish tohke ti'kakiisa â pesh wriha en parábolas?" ¹¹ Jesúsma kakawarki: " Panawá kakawishkai â privilegio arihúpiwaró de ministerio toh reino piriña, i'ka ekama kakawishka tanhí. ¹² I'ka taró akachuma, karesh wishkerpe, arwaní akachipe. I'ka taro akachituma, karesh artesukerpe toh akachuí. ¹³ Tohkari eka lerhí kakapaskawa parábayó: i'ka chelerike achelernuwa, i'ka weshkerike weshkertuwa i arihlertuwa. ¹⁴ Akes ekama â profecía de Isaías aê tishkí, toh ñehuaí: "AKES WESHKIMA, WESHKUPE, I'KA TOHKENA TANRAS ARIHÚTIPE; AKES CHEIMA, CHAUPE, TOHKENA TANRAS CHAUTIPE. ¹⁵ I'KA Î KAHÁ CHATA PESH TURUSÂMA WARTAPEHRA INSENSIBLE TISHKRÍ, AKES PESH SUNTAPAKMA ATENA TISHKRÍ Î WESHKERTIPIRO, Î AKES PESH WAMA AKATISHKAI, TOHKARI ACHELERNUWÃ A WAYÓ, AKES WESHKERMA PESH SUNTAPAKYÓ, Î ARIHLERTUWÃ PESH TURUSAYÓ, AKARO EKALERMA CONVERTI AKILERÁ, TASÑA EN KAKAHPÁ" ¹⁶ Akes benditai pi wá, en chewa; pi suntapak, en weshkua. ¹⁷ Yar í Tasma tapikaawa wéh profetas î arwã eñarí chaishkakií toh pa yâs chaiñawĩí, i'ka chelertihí. êkalerma wechishkakií toh yas pa weshkiñawĩí, ika weshkertihí. ¹⁸ Weshkiñawĩ ã significado î parábolai toh tishtá. ¹⁹ Akashkua taro weshkuama añáh del reino i'ka aríhtuwa, akes te'kí toh iña warkua te untrokua ã tishkai pi turusâñá. Ñai toh awa tishkaí ta'bri keraña. ²⁰ I'ka ata tishkai kuk sâ peña akes weshki añahá sukuhuá araríh wãripé. ²¹ Akes apís akachitihirás âhí i'ka chẽh â âhtuwã. âkashkua tribulación ã persecución tishkuama toh añahrish, ekama tishteshkua wãpé. ²² Atah tishkaríí peh siki keraña. Ima atah weshkua ñahá, i'ka preocupación artokua i mundo arkasatañá a tónna añah artahchewá. i'ka te awa ache'tuwa. ²³ Atáh tishkama kuk eña ñá, i'ka weshki en arihwa añahá. I'ma atah awa en yar apaski waná; awa as taweh, ukua tawah inka ukua mai. ²⁴ I'ka jusús te'kachawishki parábola akuaro a eka lerí. Ti'kakií: "I'ka Eka a reino pîriña chui arwã as kena neí tishki kukña tiwirá awa eña. ²⁵ Akashkua pesh ââkera akrihri, pî arkasa te'ki tishki cizañaâ tiwira keraña, akashki neí. ²⁶ Akes tiwira awa tawehwaché en unwani arpaskera, i'ka cizañawa apaski. ²⁷ A Katun ishta te'kera ti'kirí a iwaró: "Pái ¿awa eñaró tishkutirieré Kukña? ¿intakama cizañaró chui? ²⁸ Eka ti'kakií: "arkasata âsña ishki". I'ka akatun ishta ti'Kirih: ¿Iris napra ukbartusa?" ²⁹ EKa Kuk iwa ti'kakií: "Na, ukutihiwãwĩ i'ka akes tiwirawa uker prá asken ekayo. ³⁰ Akashteshkuwãwĩ ti asken tawehlerá ke paskerchẽpẽ. Aê tishkuaché arpaskerpé tasña ta'kakapa tu katuishta: cizaña ta awahuwa tikuwa atewãsakerpé, Akes tiwira eñama achahú tukuwa en kaôpiwa. ³¹ Akashkua Jesúsma Parábola akuaró kachawishki ã ekaleró. Eka ñehí: "Eka â reinoma piriñá chuí anikená mostaza awake arwã âs paki tishki ā kukña ³² I awama Karésh ayei toh awa karihró kachamari, akes tawéhwama karesh ãhkaí a peh karihrá kachãmbaríh toh hurtaña. Peh ãhka tishki, aní ââzá achehí; ka kuâs te'kerá a kaô kilerá ââzáña" ³³ Akashkí Jesús ti'kakií parábola akuaró. "I reino pirihri chuma levadurakenai korta âsña paki unchuwakti arinayó akes karesh weh tishkí â kasehma". ³⁴ I'ka Jesúsma yas ti'kakií toh karihro ââkrií parábolayope; i'ka parábolayo ñehtuma Eka i ti'kakituri. ³⁵ Ima inkenai atah ñehi profeta â te' yar tishpiró, eka nehichẽ: "TA SAPA APRIHIPÁ EN PARÁBOLA. ÑAHPA YAS ATAH UHARO CHUI ATAHTÚK TUKÍ I MUNDOÑA". ³⁶ Akes Jesús ti'kakií â karihro nei tokí kaôñá, ã arbaktama te'kera Ekaña te ti'kirih: "Patachawishku toh parábola de cizaña ã kukña". ³⁷ Jesúsma Kakawarkí ti'kakií: "Atah awa eña tishkuai arwã ayeí. ³⁸ Ã kukma í mundoi; â awa eñama ayéh reino chatalerwá. I´ka cizañama yéh warkualerwa, ³⁹ toh warkua tishkama amaisaraí. Toh awahá chẽhpé âêh apistií i mundoña, i'ka toh awahtama Ángeles leripé. ⁴⁰ I'ka înkena ripé, toh cizañama awehlera atukerpé tenwãyá, âêh apistichẽ i mundoñá. ⁴¹ Toh arwã a yehña katumpé Eka a Ángel lerí, akes ekaña awehlerpé eka pesh a reinoâ i'ka atah kvihró pecado ishkrima, i atah eñatán ishkriwá. ⁴² Akashkua ekalerma katumpe â tenwãña, ani chuñá akáh i'ka kíh arñehwañá. ⁴³ Akes toh pesh eña lerma kamaskerpe ânké a tus â reinoñá. i'ka atah suntapak akachuma weshki. ⁴⁴ I'ka Piri a reinoma anikena ieña auhitukake katún ishkañá. Arwã âsñâ paskí auhí. Arihnei, úhchehí karihro, na kuhí toh ieñaró i katúnña. ⁴⁵ Toh wehkai, â piri reinoma anikena arwã ãske úhchâhta i'ka prôhtá perlaâ aôwakeñá. ⁴⁶ Akashkua paskuama toh perla aôwai, nei úhchehí toh karihró a kachuí na kuhpiro. ⁴⁷ Toh wehkai, akes tu pirí â reinoma anikena arâ i'ka túhbarma asô take ââña, wichãn yaskeña awãhwã. ⁴⁸ Akashkua unmusterma, wichãn awãhtaña pichrilerwá asô briña. Achihlera awehlerwa â eñama canastaña, i'ka toh warkuama kakasnelera arahnañá. ⁴⁹ Inkena ripé toh aehché i mundoña. Ángeles te'kera karpeshkerpe toh warkualeri i'ka â eñama akuahá, ⁵⁰ AKes ekaña kamisbarkerpe ténwa ââkaña, toh akahchuña i kih wahnañari. ⁵¹ ¿En weshkiñawĩ i ñahaí yas? I'ka arbaktaña ti'kirih "yarhí" ⁵² Akes Jesús ti'kakií â ekaró: toh karihró escriba en tishki i arbakta â pirih reinoâ, i'ka arwã âs kena â airwawai kaô, paski yas wehka tahkeña akes tuki wehka keña tesoroña. ⁵³ Akashkua te'ki akes Jesús ñehí parábola yakií, Eka neí tohña ââki. ⁵⁴ I'ka Jesúsma toki eka â región ñá kachawishki toh peshró â sinagogaña. Weshkerma toh ñehuaí wâ tawarkri akes ñehrí: "¿I arwãsá toi paski añahyó i milagro ishkua? ⁵⁵ ¿I arwãma carpiltero ayéh tanhere? ¿A kakima María tanhere? ¿A pesh arkima Santiago, José, Simón i Judasri lertuwẽre? ⁵⁶ ¿I'ka pesh pahchawa, ña ââkertihere untasyó asken? Akes, ¿pia chií paskuasa toh yas karihró?" ⁵⁷ Ekama chẽh karatanrrií, Jesúsma ti'kakií: "Profeta âs chani en chelehnuwã, â kuk chuña aí chani". ⁵⁸ Akes chẽh milagro ishtihí tuña kasata ke cheleruri.