¹ Akiwari Jesús u'teshki neí wa tishkaña ân sábadoché. Akes karbaktama uwaró kakachií i'ka na washkera espiga a waró e'rí. ² I'ka Fariseo kachera, Jesús na tihkirí: "Cheiâ, Ti karbakta ley ñehwãkema ishkẽrtuwã ân Sábadoché". ³ Akes Jesús tihkakií: "¿Aweshkutuwãwĩ toh David ishkí, uwa kiiché i'ka arwã eka ya ââkriri? ⁴ ¿Akashkua eka Patatishta a kaôña tokiché êí pan consagrado, i'ka ekarí toh akua ââkrirí ekayo warkuarii âí, akes pareh pero eña rii âí tonchema â? ⁵ ¿I'ka aweshkutuwãwĩ toh ley ye'waña, toh ân Sábadoché paréh profana ishkeráh temploña akes sábadoché i'ka ekama culpa kakachituwã? ⁶ Tasma táh ka kaowá karêsh a'ka as chuwa ñá toh templo kena tanhí. ⁷ Âkes arihlerma í ñahaí: OHSIRÓ KAPAAWã ANIMA HÓ SACRIFICIO, I'ka warkua kakachituma en ââkri. ⁸ Âkes toh arwã ayema Patatishtaí sábado chéwá". ⁹ I'ka Jesúsma neí toki eka poshi sinagogaña. ¹⁰ Iñá, arwã chii sawá ates chahwarkirii. Akes Fariseos ña arka pehri Jesúsró, ñehrá: "¿I’ka eña insi ishká ân Sábadoché?" Tohke tikira a kasaâ arpaskerpiró. ¹¹ Jesúsma ti'ka kii: "¿I arwãró chusa pakewa, oveja aspesh akachuma, i'ka toh oveja êhwama kuk tapáh kuaña ân sábado chẽ, akes nau pasku piwati? ¹² ¡I’ka arwãró karesh aôh akachuwá, toh oveja kena tanhí! Akes eñaí en ishka ân sábadoché”. ¹³ Âkashkua Jesús ti'kii toh arwã; "Pi sawa pishkú". Ekama a sawa pishki en tishkí, akes en tishki a sawa ás ké. ¹⁴ I’ka Fariseosma apaskera en ââkertihí Ekayo. Toh eka karíhro proileri inke akii amaskerpiró. ¹⁵ Akes Jusúsma arihí, tishteshkí tohya karáh neí. Pesh brihá bakera Ekña pesh chana en kakiwarurí karihkró. ¹⁶ Ekaña kaarkauski nera kaishkertipiró akuaró, ¹⁷ akes yar ripiró toh profeta Isaías, ñehiké: ¹⁸ "CHAUWÃWĨ, TA SIERVO TOH TASYA PROHARIÍ; TA'RARIÍ, EN TA'RARIÍ AAKÍ TA KUASA TA KUASA TUKA EKAÑA. I EKAÑA ÑEHPÉ JUICIO TI'KAKIPÉ TOH GENTILESRO. ¹⁹ EKAMA I ISHTIPÉ ARÑA'CHANÍ; AÑA'CHANI WESHKERTIPÉ TA' UYA ÑÃ. ²⁰ EKAMA Í WESTIPÉ TOH PEH A ÔH OSHKAÍ; EKAMA AÔHTIPÉ TOH AWAS ANU'TUKI ÂÂKUA, I'KA AKES PAKUACHÉ LA VICTORIA, LA JUSTICIA. ²¹ AKES A PIÑA TUKERPÉ TOH KAHA UYAMA A ESPERANZA". ²² Akaskua kapashtu asrí awa arpestari, akuasa warkuaro kakachií. Akes Jesúsya péhkri Ekaña en kakií toh arwã kapashtuma kapashkí i'ka toh awa arpesh ta'ma cheí. ²³ Akes toh karihró ââkrií cherá wâ tabarkera ñe'rií; "¿I arwãma David â ye'tí?". ²⁴ I’ka Fariseos weshkerma tú milagro ishkií, ñe'rií: "i arwãma walash pastuwa â Beelzebú, toh walash asa a'tá". ²⁵ Akes Jusúsma karihí iró ameshkerasrí i’ka ti’kakií: "Karihró toh reino krahama askena tahma í tawartuwã toh kahaké â kaôkerí krahalema í tawartuwã. ²⁶ Akashkua amaisara akashpashkua â Amaisararó, ekama a kes krâ pok a kií: ¿Inkash ââhpisá â reinoâ? ²⁷ Akes tasña akaspaskama toh walashka Belcebú: ¿Taña kakas paskuasa toh karbaktaâ? Akashkua eka lerá a Jueces. ²⁸ Akes tasña kakaspaskama walashka i'ka Patatishta Akusã Eña yoi, akashkua Patatishta a reino te'boni â aki payowá. ²⁹ ¿Inkash naú tokupisa arwã atapúh â kaôña na akauntro kupiró toh yás akachui istikertu tewa â arwã apûh petai? Akashkua akauntro kupiwa toh yas akachui âkaôñá. ³⁰ Akes ata tasyó wetumá tasyo tanhí, i'ka ata tasyo awéhtuma, desparramaí. ³¹ Akashkua, Tasña ta'pika awãwĩ, âs âs pecado inka blafemiari perdona kakiwa toh arwãleri, akes toh blafemia â Akusã Eña ña perdona kaki'tuwá. ³² I'ka âs ñéhúma añahyo akawartuki eka arwã a yei, akes perdonado ripé i'ka âs ñehuma ñáhwarki Akusã Eña ti'kií, tohma perdo akachitipé, i kuk chapaña chani, i'ka ates te'kuaña chani. ³³ Akes peh eña tishkupiwawĩ awa eña boni, i'ka peh warkua tishkiñawima awa warkuaro bonupiwa akes toh pehma ke arihbarwa awa eña baná. ³⁴ Pawai, pata tahwa Ebis riawĩ, i'ka war kua riawĩ, ¿Inkas eña yas ñahúpiwasá, warkua riawĩ? i'ka toh aturusã añá chui tohro ñehua a sapaké. ³⁵ Eka arwã eñama, aturusã eña akachurâs, paskua eña akachui; akes arwã warkuama, aturusã warkuarâs, paskua toh eñatán akachui. ³⁶ Tasya ta'pika awãwĩ toh ãn a e'ché peshma na aôh ñehpé âs âs toh ñehuai. ³⁷ "I'ka toh ñehleryowa condenado raupiwá”. ³⁸ Akes escribari fariseos tís arkawarkri Jesúsró ti, kirá; "Kachawishtá, chaish patakiwá señal âs pa ishkií”. ³⁹ I'ka Jesúsma ti'kakií inké: "Pata ta'wa warkuariawĩ eñatán ishkutuwawĩ i'ka señal prohúwaâ. Akes señalma pahá taháwãwĩ tani Profeta Jonás a señalma yarri. ⁴⁰ Akashkua toh Jônas a akiké ân mai kakaña mai wĩchãn ânká ayá ñâh, akes tohke aahpé â arwã ã ye'wayo i'ka condena kakilerpé. Akes ekama arrepenti akileri Jonás añah i chauwãwĩ, karésh a'ka âs chuwa ñá Jonás kena tanhí. ⁴¹ Arwã Ninive chatama taishtakerpé Juicio chẽ í pesli pata'waya i'ka condena kakilerpé. Akes ekama arrepenti a kilerí Jonas añah, i chauwãwî, Karésh a'ka ãs chawa ñá Jonas kena tanhí. ⁴² I'ka Reina sur chatama taishtahpé juicio ka'kií arwã kari'ró chileri i patahwá akes condenâ kaki'pé. Ekama te'kí kuk pitenta te' weshpiró Salomón añah ñehuayó, i chauwãwĩ, Karésh a'ka âs chuwa ñá Salomón kena tahní. ⁴³ Âkashhkua kuasa warkua âs apaskuama arwã asña, akes kuk sennaña wetá prohí teshkí achihpiró, i'ka î pastuwã. ⁴⁴ Akes ñehuá: "Ta kaôke chií apaskaria warta pehí napá”. i'ka te'ki, te'paskua kaô en kauskaró eña râs. ⁴⁵ Akashki apaski neí próhi pakua tawak kuasa karésh warkualerí eka ké, karihró tawẽhrá chilerá. âkushkua toh arwã karésh warkua tishki ke atâhtuk. Akes inkena ripé i ta'wa warkua cheryó”. ⁴⁶ I'ka Jesús atewa ñehuari toh briha â âkri, iña, a kaki i'ka a arkirí arahnayá â âkri, prôhlera kapashkerpiró Ekayo. ⁴⁷ Âsña ti'kií: "Cheia, pikaki pi arkileri arahnañá â âkrí, pi próhlera kapaskerpiró payó”. ⁴⁸ I'ka Jusúsma ti'ka kií, inké toh ti'kiñaâ: "¿Tasa ta kakí? ¿Inka talersá ta arkí?" ⁴⁹ Akashkua a sawa ish paki â arbakta â âkrike nehí: "¡chauwãwĩ, ña â âkri ta kakiri i'ka ta arkilerwá! ⁵⁰ Akes ata âs en ishkuama ta tus ké toh piriña chui, tohma yar ta arkií ta pakchai i'ka ta kakií”.