Juan_HRomeroC-pay_luk_text

Capítulo 23

¹ Toh atawehrí aâkrima karihro taishtakera, pakera Jesusro Pilato awakihke. ² Ekalerma ki'lera kaselerá, ñehlera: "Pasbachí i arwāí ti'patakií untas kaha chaparíh, i'ka tributo wishkatipiro ā Cesar ró, akes ñehí ke Ekaro Cristoí, i'ka asā aâhtarí." ³ Pilatoma arkapeí, ñehí: "¿Pariâ toh asā aâhtai i Judios pecheâ?" Akes Jesúsma akawarki ñehí: "Paña ñehiâ." ⁴ Pilatoma ñehí: toh asâ aâhtalerí pareh ā karihro aâkriwahá: "Tasma i kasa pastawā i arwāñamaâ." ⁵ I'ka ekalerma aâkri karesh ñehlera, inke: Ekama peshro yas ti'kakiwa, kachawishki i Judea karihro ña, ishkí Galilea kerí i'ka iñarí." ⁶ Akashkua toh Pilato weshkí toh ñehlerí, kapeí toh arwāi Galileo ri ekana. ⁷ Akashkua arihuama toh Ekara ke tani a autoridadyo ehií toh Herodes, Jesúsro túnhi Herodeske, i'ka tohwa chiiraí Jerusalenña tohchēpé. ⁸ Akashkua Herodesma chēí Jesúsro, en chēí, i'ka ekama chemmirishkua aâkí. Ekama weshkua aâkrí Ekaro awakí chemiro toh milagro ishkuarish. ⁹ Herodesma arkapeí Jesúsro yas, akes Jesúsma í akawartihí. ¹⁰ Toh asā aâhta parehri i'ka escribasri aâkrí, tapuri yas ti'kira. ¹¹ Herodesma eka ā soldadosyo ñahwarkí yi'kira, arkakôhra Ekaro, i'ka artukera iña eñarí, wāripé wartapehi túhlerí Palatoke. ¹² Herodesri i'ka Palatorí kale tishkrí tohchēpe (Ki'rima eka pâkro akaspakertururí). ¹³ Wāripe Pilatoma karwani toh asā aâhta lero ā parehlerií i'ka ā pesh wriharí, ¹⁴ akes ti'kakií: "Pawaí tasña pehkiñawī i arwāí tasña katúnchēhake i pesh wrihaí akes warkua ishkerpiro, i'ka chelermiro, tarma, kaâ pa aâkuriwāña, i warkua pastawā i arwāñamaâ toh yas ti'kiñawīi pawaí. ¹⁵ I'ka Herodes chaní, i'ka tasña wartapehí túnhuâ, akes chaiñawī, Ekama í akachituwā toh amaskemaâ. ¹⁶ "Tasma, toh kari, arpishpe kahpa akes artáhpá." ¹⁷ Pilatona karēhma achēma akatishki sakakeñara as aniôrri chēhpé. ¹⁸ I'ka karihroma wahoherí, ñehlera: "¡Arahnaña i arwāyó, akes arriôkuwāwī Barrabasrol!" ¹⁹ Barrabasma akatishki sakerwa aâkri yas warkua ishkí kaha keraña i'ka pesh amasta. ²⁰ Pilatoma karkapeí waerapehí ekalero, i'ka ekama Jesúsro arriôh pirishkií. ²¹ I'ka ekalerma wahlerií ñehlerá: "Pehña pa'pehuwāwī pehña pa'pehuwāwī." ²² Ekama ti'kakií wartepehí un mairí: ¿Irish? ¿I warkuaro ishkisa i awrā i? i Ekama i ishtihi tohkari ima ôn archituwa, tohkeri arpishpe ka'pa, i'ka arriôhpá." ²³ Akes ekalerma tapura ti'kirih pesh ñahyó, ti'kira ā Ekera pehña pahpehlerpiro. ²⁴ I'ka peshña weshki Pilatoâ. Akes Pilatoma kaweshkí peshñahá. ²⁵ Eka arriôkí toh kapehlerií, ā akatishkí sakaro chií toh warkirish. I'ka Jesúsro kawishkí inkea kilerpi asri. ²⁶ Akes ke arâhnake pakera, sukuhrí ā Simón de Cirenero, te'ki katúnña chiiâ, aâña arkukri toh peh prákishkaro, Jesús arbakpiro. ²⁷ Pesh wriha bakera arwāri kortari aka'lera bakrí Ekaro. ²⁸ I'ka Jesúsma wartapehí te'ki ti'kakií: "Ye'wa de Jerusalén, aka'nutihiwa tasrish. Pa aêkape aka'nuwa i'ka piye' chei rishwa. ²⁹ I'ka chauwa, ekalerma ñehlerpe ã te'kua che'pe ñehlerá: "Benditas atah í akachitui ã aishki'ña i pe'kertihií i'ka pesh tutu i súklertihií." ³⁰ Waripe ekalerma ñehlerpe ã wahara ti'kira: "un tasña chara ánhú" akes ã colladosrí: "Patarmuku." ³¹ Akes tohke ishkerma ã peh sã'ka chẽ. ¿Inkena ripisa toh archẽ?" ³² Arwã akua pokchẽ pesh warkí kawarkrí asken Ekayo tohwa karmaskerpiro. ³³ Akashkua na balerma toh kuk apiña " Ã calaveraña" tohña peh katukri aske toh pesh warkileriyó, as asawa eñake i'ka asma asawa warki'ke. ³⁴ Jesúsma ñehí: " Ta tus, perdonakakau, i'ka ekalerma í e'lertuwa ã ishkerí." Ã ekalerma unushtrí, tre'ra toh iñaro. ³⁵ Toh pesh wrihawa chame ehẽra aâkri i'ka toh asâ aâhtama yas ti'kira Ekara, ñehlera: "Ekama en kakií akuaró. Tohke Ekape salvaakií, Ekaro Cristo Patatishta ekana, toh aekana." ³⁶ Akes toh asãlerma yas ti'kira abriña Ekaña wishkera te'wa asoro. ³⁷ I'ka ñehí: " Pariâ Judios pesh Reyka, Papêh salva akaú." ³⁸ Akes awĩkawã kakoskawa pêhara chií Eka ã aña: "Ima Judios pesh Rey i." ³⁹ Arwã warki as asken peh kawehlerwa aâkri ñah warki yas ti'kií, ñehí "¿Pa ranriere Cristoâ? salvah patakau i'ka pari." ⁴⁰ I'ka asma akawarkí: ¿I'ka pama akatiutuwã patatishtaã, i'ka asken aâhbarií ôbarpiró? ⁴¹ Akes untaswa aâbarií asken, i'ka untasma yar parwa toh en ishpertihirish. I arwãma i ishtihi warkua. ⁴² I'ka ekama ti'kií: "Jesús: pirtaâki tasro te'kichē pi reinayo." ⁴³ Jesúsma ti'kií: Yarró tasma ta'pikapá, inkatah tasyo aâkupe toh paraísoña." ⁴⁴ I'ka achēma ke ânina ke ânhar tishkí ake súk tishchehí kúk pitentá i'ka ke ânma ani tishki. ⁴⁵ Akes ke ân kamastuwa suk tishkí. Akashkua toh kaô cortinama tapinhpi. ⁴⁶ Wâhni tapura añahyó, Jesúsma ñehí: "Ta tus pi sawaña tukawa ta kuasã." Ñehí tohke, Ekama ôhni. ⁴⁷ Akashkua toh centurión chẽí toí, akes glorificah ishki Patatishtaro, ñehí: "Ima yar arwã eña rií." ⁴⁸ Akashkua toh karihro atawẽh chelerií ã aôrriâ chẽhpé chelerií toh yas ishkri, ekalerma te'kera amakmak apehlera. ⁴⁹ I'ka toh karihro arihlerima akes korta lerwa atah baki nerií Galilea chilera i'ka tohlerma karâhripe aâkrií chẽlera ã yas. ⁵⁰ Akes iña, arwã as chií apima José, concilio aâhrarií arwã eña asrií. ⁵¹ (Ekama aratonrií toh yas ishkuarish), i'ka ani chatarií Arimateo de Judea, Ekama awaka ishki Patatishta a reinoró. ⁵² I arwãma, Pilato abriña tishki, Jesús apeshro kapeí. ⁵³ Ekaña monoki tunuyo muki akes patukí sâ tapakua taskaña, asnani pa tukatahriña. ⁵⁴ Ânchẽma ishkera ke tishpi ishki ã reposo. ⁵⁵ Atah korta tish Ekayo apaskri asken Galileaña, akes haki te'kera ã sâ tapakuaña inke tukri asri apeshka. ⁵⁶ Ekalerma wartapehra nerií pesh kaôke na ishkrí ungüento as. Waripe, ânchẽpe ã reposorií ekalerma yâ ki'ra teshki aâkrii toh mandamiento ñehuaké