Juan_HRomeroC-pay_luk_text

Capítulo 24

¹ Ãnchẽma ân asriĩ kapahnipé, ekalerma nerí toh sâ tapakuaña, ani pehkera ã ôn ôn ki'rii. ² Ekalerma paskrí toh sâma minihrima aãkrí toh tapakua asapaña. ³ Paskerma, ke Jesús pesh kaema chitihí. ⁴ Ke tishkí, i'ka ekalerí aâkerí iro ishkerkua tohña, wãripe, anuã pok pesh iña kabisayo, karaoaskrí aâkera pesh briña. ⁵ Ã kartalerma akatiaishkri akes pesh watapak yuhrii kúke ekama ti'kaki0rii ã kortalero: "¿Irish prohiñawĩsá atah wakatishki õnri peshkeraña?". ⁶ ¡Ekama ñama chituwa, Ekama wakatishkí! Pi'taâki eka ti'kakiike parohwa aniña Eka aâkiri Galileaña, ⁷ ñehí toh Arwã ayei sukúhlerpe pe sawayó arwã warkualerñaâ i'ka pakera pehña prakpishki pehlerpiro akes ân mai ki'waha wakatishpé. ⁸ Ã kortalerma pesh taâkí aña ñehrií ⁹ Wartapehí nelerí ã sâ tapakuaña aâkera na kaishkri karihro toh yas ã ukua as lerií i'ka akualerwa. ¹⁰ Akes María Magdalena, Juana, María Santiago akarirí i'ka korta akualerií ekayo, na kaishkrí yas toh apóstoles lerá. ¹¹ I'ka i ñahma i tohke chẽlerií toh apóstoles weshkerma, ekalerma weshtuke ishkri toh karta ñehlerma. ¹² Akes Pedro taishtaki ôhí neí toh sâ tapakuake, teshkí aâki chẽí asaâke, chẽwãma tunupero chií. Akashkua Pedroma neí a kaôke ameshki ira chirâsrí. ¹³ I'ka, arwã pokchẽ nerí tohẽpe toh kaha Emaús ti'kilerña, añama karahrí chii ukua âs kilometro de Jerusalén. ¹⁴ Ekalerma akapashkera aekape toh yas chẽrirish. ¹⁵ Akes, kapashkeri aekape, Jesúsma te'kí pesh briña ti'shkí i'ka neí ekaleryó. ¹⁶ I'ka eka awama en tishtuwa aâkri akenarií. ¹⁷ Jesúsma ti'kakií: "¿Pawai iro ñahiñawĩsâ pak tâhteshkera nerâ?" Ekalerma amesh tawarkri tohña. ¹⁸ Ekalerií âs, apima Cleofás, akawarkí: "¿I'ka pape asperiâ peshka Jerusalenña toh yas chuwa iña kapân kapân?". ¹⁹ Jesúsma ti'kakií ekalero: "¿Iro chusâ?" Ekalerma akawarkrí: "Toh yas Jesús Nazareno rish, i'ka Profeta rií, poderoso ã yas ishkií i'ka añahyo wa Patatishta a ekarií toh pesh karihroña. ²⁰ I'ka toh asã aâhtalerí parehlerke akes unta asã aâhta akualerí sukuhrí amaskera i'ka peh prakpishkaña pehlerí. ²¹ Akes untasma wahpara Eka rií en kaki'piro i Israelña, Ôô, i'ka i karihroma, inkatama ân maihí akes i chuias yas iña. ²² I'ka akes, korta tish untasyo chilera te' untaishkersi, ã sâ tapakuaña nera kapahnipé. ²³ Akashkua ekalerma i chẽlerma i chẽlertihi apesh kaô, te'kera, nehrí ke angel chelerwãaâkrií i'ka ti'kakií ke Ekama wakuarií. ²⁴ Akes arwã tish nera ã sâ tapakua toh korta ti'kakirike chẽri ekalerwa. I'ka i chẽlernihi". ²⁵ Jesúsma ti'kakií: "¡Arwã pih sâh maña arihutu kena riawĩ pi turusã kuihnirí ã profeta karihro ñehrií! ²⁶ "¿I'ka ãkena ta'rishkí toh Cristo ôhsi ki'rike yas ake na tokí a gloriaña?" ²⁷ Waripe, ishkera ã Moiseske toh profeta lerke, Jesúsma enkarihí ekalero toh yas karihro ã kakoska karihrorí. ²⁸ Akes ke ki' bak tishkera ã kahaña, toh ekalerí ñekerña, Jesúsma tohke ishkí ki' neí. ²⁹ I'ka ekalerma ti'kirá: Untasyo tawarku, i'ka ke kakaña bak tishkua akes ke ânma súk tishkua". Akes Jesúsma toki tawarkí ekaleryó. ³⁰ I'ka akes, akashkua Eka achihuari ekaleryo ẽ'lerá, Ekama sukuhí panka, kaparenkí pincheí, akes kawishki ekaleró. ³¹ Waripe awama taprihri i ekalerma arihrií akes Ekama itan tishki pesh wañaí. ³² Tiaki'rí aekapéh: "¿Untas turui asaâñama ôhô patakiwa, i'ka Eka aprihwãrí toh kakoskaí?" ³³ Ekalerma taishtakri achẽhpe wartapehra te'kera Jerusalénke. Ekalerma kartapukri ã ukua as lerií atawehliera i'ka ekaya aâkrihwa, ³⁴ ñehlera: "Jesúsma ke wakatishki i'ka ke Simónro arapaskí". ³⁵ Akes ekalerma kaishkri toh yas chẽrií ã ta'ña i'ka Jesús karapaski akes chẽlera toh pan pinhí kawishkí ekaâ. ³⁶ I'ka ñehlera toh yas, Jesúsma karapaski peshkeraña ã eka krihro aâkriña ti'kakií: "Paz chuwãwĩ pañohuaí". ³⁷ I'ka ekalerma atatia ishkrií wehrí ameshkera ke chelerwa aâkrií kuasa as. ³⁸ Jesúsma ti'kakií: "¿Irish preocupado aâkiñawisa? ¿i'ka akua ameshkiñawĩ pi turusãñamawa? ³⁹ Tachauwãwĩ ta sawa ta ta'rí, tas pawa. Tapanhuwa tachauwa. Akes kausa asma apesh akachituwã apaña chani, i'ka chaiñawĩ ta kachuí". ⁴⁰ Akashkua eka ñehí, kachawishki asawari i'ka ata'rí. ⁴¹ Atewata ekaleri tohña aâkerí, incrédulos ararihrí, i'ka wâ aâkera, Jesúsma ti'kakií: "¿Iro kakachusa ââro?" ⁴² Ekalerma wishkrí wĩchã ates unharo. ⁴³ Jesúsma sukuhí ẽí eka peshwaki'ña. ⁴⁴ Ekama ti'kakií: "Akashkua payowa aâkarihrí, ta'kakaârií toh karihro kakoskaí ã ley de Moíses, i'ka Profetalerí, atah Salmoñarí, tohma âêchẽh tishpe". ⁴⁵ Akashkua Ekaña karprihí peshsamaña, i'ka arihlerpira toh kakeskaí. ⁴⁶ Ekama ti'kakií: "Tohke kakeskaí ã Cristoma ôhsi ki'lerpe akes wakatishpe toh õhri peshkeraña ân mai ki'waña. ⁴⁷ I'ka ã arrepentimiento ã perdón ã pecados leña eka apiyo ñehler piro kaha karihroña, aniña tah Jerusalenña. ⁴⁸ Pañawã chelerií i yas. ⁴⁹ Chẽiñawi, tasma katúnha pañahwa toh ta tus témpií. I'ka awakupiwa i kahaña akes en karihen ishkuatani toh poder kaânña chuyó". ⁵⁰ Akashkua Jesúsña kawakí arahnake baktishkí Betania ke. Ekama asawa ishpakí kaparenkakií. ⁵¹ I'ka akes, Ekaña kaparenkakií aâkuarí, Ekama kakasteshkí i'ka pakrí piri kaâhke. ⁵² Akes arñehra wartapehra nerí Jesusalenke ararihrí. ⁵³ Ekalerma aâkri tohñapé ã kaoña, Patatishta aershkera.