Juan_HRomeroC-pay_jhn_text

Capítulo 5

¹ Ikachkua akatikanas toh Judios ti'keleri Jesus ta'wehi kaha Jerusaleña. ² Inkita, Jerusalen abriña to kaosana Mukmukeheria, asota as chia a pinma Betesda años ebreño, kaosa anki akachurri. ³ Pesh wrihja as chira kachawá perii, achenlertarisas, tartechkerturas aña chirrii, awakri asowaro. ⁴ Angel as chuwei chrewaruwã asrii teh' penwãruwã aspe Toklerwã asoña akachkua asoma akeyhi apichkruri akuaskua chana yas insi akileruri hoisi akileruri. ⁵ Yoh' ña arwã as chiiri achana kwi may ukua ova pa'kuã akiri. ⁶ Akech Jesús chewamá apichkiriña akes ata'akuama tohña an wẽ akuaakiri, eka tikii: "¿Entichkupiriskia?" ⁷ Toh' arwa aechawamá kapachkí: "Señor asnani takachtuwã takachtoh'kerpira asataña asa apenwamá tasna boonama akuaro toh'kerla tas to ta teh'wã akuaro tokerá". ⁸ Jesús ti kii: "Ichtakú oi wasã, ã tah teshkú". ⁹ Akanskua toh arwãma achanama arteshki, onkatama tarteshkuá, toh chehrii katu ishkertipirii. ¹⁰ Akanskua toh Judios ma ñehriri toh i akachitiri: "Inkatama yari katu ishkutipii pama a'hu i ana hupii pi wã sá. ¹¹ Ékama ñehí: "Toh'i ta chana tarpeshkii, tih takii; pi wãsá sukuhu naú". ¹² Ekama arkapehrii: "¿Tasa toh arwã tihpikii: Pi wãsa sukuhu naú?" ¹³ Taro ã chana arpeshkrii arihlertii tari akana; toh Patatishtama newã'a krii katirá, Ehkakes toh yama pesh wriha tis aakrii ã chuña. ¹⁴ Tikamá, Jesús ma paskii toh arwa i akooña tih kii: "¡Chauchere pama i pikachituwãi akesh warkua kresh ishkuti, inkatama kreshripé". ¹⁵ Toh arwã ma nehi nei toh Judios ró Jesús rii toh ya chana arpesh kuaakrii. ¹⁶ Inkatama, i yas.i toh Judios arachihrii Jesús ró, Ekaña ishkuarurii i yas.i ã katu ishkertiiché. ¹⁷ Jesús ma tihkakii Ekaró wã: "Tatusma inkatani katu ishkua untaswã katu ishkawã". ¹⁸ Ña.i, toh Judios ma chah chohlerii kresh amaskerpiró, ehkakes ama ñah kakiwarurii toh katuishkertururiché, akankua toh wá arwahnaruii Patatishta atuska, patatishta kiwarurii askén. ¹⁹ Jesús ma tihkakii: "Añama chituwá chituwá tah pikaawá: ayerwama arihtuwá Ekarishki, excepto eka chewá atuska kih wai, toh atus krihró kiwama ayerwama ake kiwã ãké. ²⁰ Akanskua atusma ayerwará ama' kiwá achiwishkua ã eka yas kiwãró, Ékama ta chawishpé ã yás ahkai ima pawai arari tishkerpiró. ²¹ Akanskua toh atusma ishpakua toh onnilerii ama apesh kawishkua, akei toh wá ãyerwai cha en kiwãmã a pesh kawishkua. ²² Toh atusma asnani tihkakituwã, ãkema kawishkua krihro ã Juicio.i ã yerwaró. ²³ Akenapra toh krihró chelerii ã yer wai. Ã kenai atuska cheleri, taro ayer wã chendumã atus ma chenuwã ã tu hii. ²⁴ Yar mã, taro ta ñah weshkuama ã weshkua ã tatuhii toh ma apesh wẽ akachipé ama i akachitipé, ã kema tuhteshkua anna yari ã chiwayarí. ²⁵ Yar ma, tah kakaawá inkatama teh kua toh ya i, Akanskua toh anlerii añah weshkerpé patatishta, ayerwai tohró weshkerma chilerpé. ²⁶ Éhkakes, toh atus apesh akachuké eka kesnró, akenai Ékama wishki apeshka ayerwa Ékarishró. ²⁷ Atusma ata punró wishkii ayerwaró achewai toh Juicio i Ékamá toh arwã ayerwãi. ²⁸ Pama iro achautihiwawi inkatama ã hora tehkuá toh krihró achihrii ã ka'sho ña pesh ñahró achelerpé. ²⁹ Toh ma apaskerpé: Toh eña ishkriskei, wãkatishkrii ã peshyó, tph warkua, ishkrima wakatishkrii ã Juicio-ña. ³⁰ Tasma eyratawã tisnani parish. Ã weshkarai, tahpikaai, ta Juicio-ma eña-i ekama arwã ayer wai tas ma prohawã tahra eñao, ake nai ahra eña akachui. ³¹ Tas tañahró wishkama tas rish, tas ta ñah ma yar toh ripé. ³² Akuaña yehwã tas erña achihí tasma eyrawã aña ñehwa.i ã eka tehwai ama yah ró. ³³ Pama tuhrii a ishkerpiró toh Juan, ekama yahró ñeh wã. ³⁴ Akanskua tas tañahró sukuhama toh ma arwa tahi tasma ñahawá i yas.i pama sarvaakilerpiró. ³⁵ Juan ma kamaskuarurii ak kiwarurii yar kiwarurii pama arari tishkerpirii ki'ri kamas kii. ³⁶ Akanskua, tasta ñah ta ka chui kresh ahka i a Juan, ma hó Ehkakes ta tus tatchwai kah paró, tasrishki kaai tas rish ñehlerwa, ta tus tatu hii. ³⁷ Ta tus ma tatuhii ekapé rehwa tas erña achaharas Pama weshkutiriwawi. Ã ñeh wai cherer tuwã ã ishkui tisnanii. ³⁸ Toh añahma akachituwá alorando payowa, inke toh ma aña weshkertuwa toh i ekaña tuhi. ³⁹ Pawahí to' kakorskaí aweshkuwa a inke ekaya akachuwa unta pesh chií teshpé, y eka a kakorskaí ñehwã a tasro. ⁴⁰ y pawahí te'kutipishkiawĩ a tasña kakachipiro to' apesh chií teshpiro. ⁴¹ Tasma kasukuhtawã to' arwã ã eya ishkerí. ⁴² Akaro tasma ka arihawa pawahí Patatishta amorma kakachituwã pawahi a ekape. ⁴³ Te'kawa to' ta tus apiyó pawahí ta sukuhlertirí to' akua te'kuama eka apipe' pawahí sukuhlerpe. ⁴⁴ ¿Inke arihupiwasa, pawahí sukuhlera to' ã eya ishkerí untasrí akuarí, akes prohlertuwã a aeya ishkerí ama te'kua Patatishta aspesí? ⁴⁵ Ameshkutiwãwĩ tas ta'pikapawaí a ta tus a wakiña. To' ti'kaki'wama Moisésro, a pawahí a taro tukíñawĩsa to' esperanzaí. ⁴⁶ To' Moisésma yarií, tasro ta añaha weshkertipe akes ekaya kakorskirí. ⁴⁷ Akes pawahí añah weshketuwã to' kakorskakí, ¿Inkí añaha weshkerpisa?"